Degé Kangyur volume 72, F.187.a

།དེ་བཞིན་གཤེགས་པའི་དབུ་སྐྲ་རིན་པོ་ཆེ་ཨན་ད་རྙིལ་ལྟ་བུ་འདི་ནི་སྔོན་སེམས་ཅན་གྱི་སྲོག་ལ་སྙིང་བརྩེ་བ་དང་བོང་བ་དང་དབྱུག་པ་དང་མཚོན་ཆ་བོར་བས་གྲུབ་པའོ། །​དེ་བཞིན་གཤེགས་པའི་སྨིན་མཚམས་ཀྱི་སྒོའི་བར་གྱི་དཔྲལ་བའི་སྤུ་ཤིན་ཏུ་དཀར་བ་འདི་ནི་སྔོན་བསྔགས་པར་འོས་པ་རྣམས་ཀྱི་བསྔགས་པ་བརྗོད་པས་མངོན་པར་གྲུབ་པའོ། །​དེ་བཞིན་གཤེགས་པའི་དབུ་གཙུག་ཏོར་དང་ལྡན་པ་འདི་ནི་སྔོན་བླ་མ་ལ་གུས་པར་བྱས་པས་མངོན་པར་གྲུབ་པའོ། །​དེ་བཞིན་གཤེགས་པའི་སྐུ་ཤིང་ནྱ་གྲོ་ལྟར་ཆུ་ཞེང་གབ་པ་འདི་ནི་སྔོན་བདག་དང་གཞན་ཏིང་ངེ་འཛིན་ལ་སྦྱོར་བས་མངོན་པར་གྲུབ་པའོ། །​དེ་བཞིན་གཤེགས་པའི་སྐུ་སྲེད་མེད་ཀྱི་བུ་ཆེན་པོ་ལྟ་བུར་ཀུན་ཏུ་མཛེས་པ་འདི་ནི་སྔོན་དེ་བཞིན་གཤེགས་པའི་སྐུ་གཟུགས་བྱས་པ་དང་། མཆོད་རྟེན་ཞིག་པ་བཅོས་པ་དང་། གཞན་དག་འཇིགས་པ་ལས་དབུགས་དབྱུང་བ་བྱས་པས་གྲུབ་པ་སྟེ། དགེ་བའི་རྩ་བ་ཚད་མེད་པས་ཆོས་འདི་དག་ལ་དབང་སྒྱུར་བའི་ཕྱིར། དེ་བཞིན་གཤེགས་པའི་སྐྱེས་བུ་ཆེན་པོའི་མཚན་སུམ་ཅུ་རྩ་གཉིས་པོ་དག་སྐུ་ལ་མངོན་པར་གྲུབ་པའོ། །​དཔེ་བྱད་བཟང་པོ་བརྒྱད་ཅུ་གང་ཞེ་ན། སངས་རྒྱས་བཅོམ་ལྡན་འདས་ཀྱི་སེན་མོ་ཟངས་ཀྱི་མདོག་ལྟ་བུ་དང་། སེན་མོ་མདོག་སྣུམ་པ་དང་། སེན་མོ་མཐོ་བ་དང་། སེན་མོ་རྣམས་ཟླུམ་པ་དང་། སོར་མོ་རྣམས་རྒྱས་པ་དང་། སོར་མོ་རྣམས་བྱིན་གྱིས་ཕྲ་བ་དང་། རྩ་མི་མངོན་པ་དང་རྩ་མདུད་པ་མེད་པ་དང་ལོང་བུ་མི་མངོན་པ་དང་ཞབས་མི་མཉམ་པ་མེད་པ་དང་། སེང་གེའི་སྟབས་སུ་གཤེགས་པ་དང་། གླང་པོ་ཆེའི་སྟབས་སུ་གཤེགས་པ་དང་། ངང་པའི་སྟབས་སུ་གཤེགས་པ་དང་། ཁྱུ་མཆོག་གི་སྟབས་སུ་གཤེགས་པ་དང་། གཡས་ཕྱོགས་སུ་ལྡོག་ཅིང་གཤེགས་པ་དང་། མཛེས་པར་གཤེགས་པ་དང་། མི་གཡོ་བར་གཤེགས་པ་དང་། སྐུ་འཁྲིལ་བག་ཆགས་པ་དང་། སྐུ་བྱི་དོར་བྱས་པ་ལྟ་བུ་དང་། སྐུ་རིམ་པར་འཚམ་པ་དང་། སྐུ་ཁོ་ལག་ཡངས་ཤིང་བཟང་བ་དང་། མཚན་ཡོངས་སུ་རྫོགས་པ་དང་།



The English translation of this folio by 84000 - Translating the words of the Buddha can be found at:
https://read.84000.co/translation/toh317.html?part=UT22084-072-017-461#UT22084-072-017-461