Degé Kangyur volume 72, F.143.a

སེམས་ཅན་དམྱལ་བ་ཆེན་པོ་ངུ་འབོད་ཆེན་པོའི་སེམས་ཅན་དམྱལ་བ་རྣམས་ཀྱི་ཚེའི་ཚད་ནི་ལོ་དེ་ལྟ་བུར་བརྩིས་པའི་ལོ་བརྒྱད་སྟོང་ཡོད་དོ། །​དེ་མིའི་ལྟར་བརྩིས་ན་ལོ་བྱེ་བ་ཕྲག་ས་ཡ་གསུམ་དང་། བྱེ་བ་ཕྲག་ལྔ་འབུམ་ཁྲི་ཉིས་སྟོང་དྲུག་ཅུ་རྩ་དྲུག་ཡོད་དེ། བར་མ་དོར་འཆི་བ་ནི་ཡོད་དོ། །​དེ་ནས་བཅོམ་ལྡན་འདས་ཀྱིས་དེའི་ཚེ་ཚིགས་སུ་བཅད་དེ་བཀའ་སྩལ་པ། བལྟ་བའི་ཐིབས་པོས་ཁེབས་གྱུར་ཅིང་། །​སྲེད་པའི་གཡོག་པས་གཡོགས་པ་དག །​སྡིག་པའི་ཆོས་ནི་སྤྱོད་པ་ཡིས། །​ངུ་འབོད་དག་ཏུ་སྐྱེ་བར་འགྱུར། །​ཡིད་གཅུགས་ཉམས་པའི་མི་དག་ནི། །​བ་སྤུ་སློང་ཞིང་འབར་བ་ཡིས། །​བསྐོར་བའི་ཁྱིམ་དུ་ནང་ཆུད་ནས། །​ངུ་འབོད་ཆེན་པོར་སྲེག་པར་འགྱུར། །​གཏམས་པ་བརྣོགས་པའི་མི་དག་ནི། །​རལ་གྲི་ཡིས་ནི་ལུས་གཏུབ་ཅིང་། །​བྱ་རྒོད་བྱ་རོག་འུག་པ་ཁྱིས། །​འགུལ་བཞིན་དུ་ནི་ཟ་བར་འགྱུར། །​དགེ་སློང་དག་མི་རྣམས་ཀྱི་ལོ་སྟོང་དྲུག་བརྒྱ་གང་ཡིན་པ་དེ་གཞན་འཕྲུལ་དབང་བྱེད་ཀྱི་ལྷ་རྣམས་ཀྱི་ཉིན་ཞག་གཅིག་གོ། །ཉིན་ཞག་དེ་སུམ་ཅུ་ལ་ཟླ་བ་གཅིག །​ཟླ་བ་བཅུ་གཉིས་ལ་ལོ་གཅིག་སྟེ། གཞན་འཕྲུལ་དབང་བྱེད་ཀྱི་ལྷ་རྣམས་ཀྱི་ཚེའི་ཚད་ནི་ལོ་དེ་ལྟ་བུར་བརྩིས་པའི་ལྷའི་ལོ་ཁྲི་དྲུག་སྟོང་ཐུབ་བོ། །​དེ་མིའི་ལྟར་བརྩིས་ན་ལོ་ས་ཡ་ཕྲག་དྲུག་དང་། ལོ་བྱེ་བ་ཕྲག་དགུ་བརྒྱ་ཉི་ཤུ་རྩ་གཅིག་ཡོད་དེ། བར་མ་དོར་འཆི་བ་ནི་ཡོད་དོ། །​དེ་ནི་སེམས་ཅན་དམྱལ་བ་ཆེན་པོ་ཚ་བའི་ཉིན་ཞག་གཅིག་གོ། །​ཉིན་ཞག་དེ་སུམ་ཅུ་ལ་ཟླ་བ་གཅིག །​ཟླ་བ་བཅུ་གཉིས་ལ་ལོ་གཅིག་སྟེ། སེམས་ཅན་དམྱལ་བ་ཆེན་པོ་ཚ་བའི་སེམས་ཅན་དམྱལ་བ་རྣམས་ཀྱི་ཚེའི་ཚད་ནི་ལོ་དེ་ལྟ་བུར་བརྩིས་པའི་ལོ་ཁྲི་དྲུག་སྟོང་ཡོད་དོ། །​དེ་མིའི་ལྟར་བརྩིས་ན་ལོ་བྱེ་བ་ས་ཡ་ཕྲག་བརྒྱད་དང་། བཞི་འབུམ་དང་། ལོ་བྱེ་བ་ཕྲག་ཁྲི་དྲུག་སྟོང་ལྔ་བརྒྱ་སུམ་ཅུ་ཡོད་དེ། །​བར་མ་དོར་འཆི་བ་ནི་ཡོད་དོ། །​དེ་ནས་བཅོམ་ལྡན་འདས་ཀྱིས་དེའི་ཚེ་ཚིགས་སུ་བཅད་དེ་བཀའ་སྩལ་པ། དགེ་སློང་བྲམ་ཟེ་དགེ་བ་དང་། །​དེ་བཞིན་དུ་ནི་ཕ་མ་ལས། །​གང་ཞིག་རྟག་ཏུ་གདུང་བྱེད་པ། །​དེ་ནི་ཚ་བར་སྐྱེ་བར་འགྱུར། །​འདིར་ནི་གང་ཞིག་གདུང་བ་ཡིས། །​སྐྱེ་བོ་མང་པོ་གདུང་བྱེད་པ། །​ལས་དེ་དག་གིས་ཚ་བ་ཡི། །​དམྱལ་བ་རྣམས་སུ་སྐྱེ་བར་འགྱུར། །​དགེ་སློང་དག་ཁྱེད་ཆུ་བུར་ཅན་དུ་སྐྱེས་པའི་སེམས་ཅན་རྣམས་ཀྱི་ཚེའི་མཐའ་ཉན་པར་འདོད་དམ།



The English translation of this folio by 84000 - Translating the words of the Buddha can be found at:
https://read.84000.co/translation/toh307.html?part=UT22084-072-007-488#UT22084-072-007-488