མཚོན་ཆ་འབབ་པའི་སྡུག་བསྔལ་སྣ་ཚོགས་མྱོང་བར་བྱས་ཤིང་རི་བརྩེགས་ཆར་ལྟར་འབབ་པ་དེའི་སྟེང་དུ་བབ་བོ། །དེའི་སྟེང་དུ་རི་བརྩེགས་པ་དཔག་ཚད་ཙམ་ཡོད་པ་བབ་པ་གང་གིས་དེ་བྱེ་མ་ཆང་པ་ནས་གཏོར་བ་བཞིན་ཕྱེ་མར་རློག་གོ། །ཕྱེ་མར་བརླགས་པ་དང་ཡང་སླར་སྐྱེ་བར་འགྱུར་རོ། །དེ་ནས་ཡང་ཕྱེ་མར་རློག་པར་བྱེད་དོ། །མེའི་ཕུང་པོ་བཅུ་གཅིག་གི་དབུས་སུ་བཅུག་ནས་མེ་ཐབ་ཀྱི་ནང་དུ་ལུས་མ་ལུས་པར་བསྲེགས་སོ། །དེའི་མིག་སྐྱེས་པ་ཡང་ཕྱུང་ནས་གཏུབས་ཤིང་བཅད་དེ་གཏོར་ཏོ། །དེའི་ལྕེ་ཡང་གཤིན་རྗེའི་མི་རྣམས་ཀྱིས་བཅད་དོ། །བཅད་ནས་ཀྱང་སླར་སྐྱེའོ། །དེའི་སྣ་ཡང་བཅད་ཅིང་ཞ་ཉེ་རབ་ཏུ་བསྐོལ་བས་འགེངས་སོ། །དེའི་རྣ་བ་ཡང་ཟངས་དམར་པོ་བཞུས་པས་འགེངས་སོ། །བ་ཚྭ་རབ་ཏུ་བསྐོལ་བས་ལྕགས་ཀྱི་སྣོད་རབ་ཏུ་བསྲེགས་པ་བཀང་སྟེ། ཁྱེར་ནས་དེ་ལ་ཆག་ཆག་འདེབས་ཤིང་ཡང་སྤུ་གྲི་རྣམས་ཀྱིས་ཤིན་ཏུ་འཇོག་པར་བྱེད་དོ། །ནད་བཞི་བརྒྱ་རྩ་བཞི་རྣམས་ཀྱིས་རྟག་ཏུ་གནོད་པར་བྱེད་དོ། །དེ་ཀུན་ནས་སྡུག་བསྔལ་གྱིས་ཉམ་ཐག་ཅིང་ཐམས་ཅད་ནས་རབ་ཏུ་འབར་བ་མེ་ལྕེ་གཅིག་ཏུ་གྱུར་པ་ན་སེམས་ཅན་དམྱལ་བ་པའི་སྡུག་བསྔལ་ཚ་བས་རྩུབ་པ་དག་ཇི་སྲིད་དུ་དེའི་སྡིག་པའི་ལས་བྱས་ཤིང་བསགས་པ་སོ་སོར་མྱོང་བར་འགྱུར་བ་བཅོམ་ཞིང་སྤངས་ལ་ཟད་པར་མ་བྱས་པ་དེ་སྲིད་དུ་ཡུན་རིང་པོ་ལོ་བགྲང་གིས་མི་ལང་བར་མྱོང་བར་འགྱུར་རོ། །དེ་ཕྱིས་སེམས་ཅན་དམྱལ་བ་དེ་ལས་ཐར་བར་འགྱུར་ཏེ། ཐར་ནས་ཀྱང་ལས་དེ་དང་རྒྱུ་འཐུན་པར་ཚེ་རབས་ལྔ་བརྒྱར་ཡི་དགས་གྲོག་སྦུར་ཡན་ལག་རྣོ་བ་འབབ་པས་ཉམ་ཐག་ཅིང་ཙན་ད་ནི་ཀ་ཟ་བའི་ནང་དུ་སྐྱེ་བར་འགྱུར་རོ། །དེ་གལ་ཏེ་དེ་ལས་ཐར་ནས་ཀྱང་ཚེ་རབས་བདུན་བརྒྱར་ཙི་རི་ཀ་དགོན་པ་ན་གནས་པ་མ་རུངས་པ་སྒྲ་འབྱིན་པའི་ནང་དུ་རི་དགས་རུ་རུར་སྐྱེ་བར་འགྱུར་ཏེ། ལུས་རྟག་ཏུ་བཀྲེས་པ་དང་སྐོམ་པས་གདུངས་པར་འགྱུར་ཏེ། །གལ་ཏེ་དེ་ལས་ཐར་ནས་ཀྱང་གལ་ཏེ་མི་རྣམས་དང་སྐལ་བ་མཉམ་པར་མིར་སྐྱེས་ན། དེ་རྟག་ཏུ་ཁུར་འཁུར་ཞིང་གཞན་གྱིས་བཀོལ་བར་འགྱུར།