དེ་གཅོད་པ་ན་སྙིང་རྗེ་རྗེ་སྐད་དུ་ཀུ་ཆོ་འདོན་ཅིང་ཡོངས་སུ་སྨྲེ་སྔགས་འདོན་ལ་ཐམས་ཅད་དུ་འབྲོས་སོ། །རང་གི་ལུས་དང་ཡིད་ཀྱིས་ཀུན་ནས་བསླང་བའི་མི་དགེ་བའི་ལས་ཀྱིས་བསླུས་པ་དེ་བདག་ཉིད་ཐམས་ཅད་དུ་ལས་དེས་ཤིན་ཏུ་འཚེད་པར་བྱེད་དོ། །རྣམ་པར་སྨིན་པ་མ་མྱོང་བར་དེ་དག་འགག་པར་མི་འགྱུར་ཞིང་མི་དགེ་བའི་ལས་དེ་མ་མྱོང་བར་ཐར་བ་མེད་དེ། གང་གི་ཚེ་སོ་སོར་མྱོང་ན་དེ་སེམས་ཅན་དམྱལ་བ་དེ་ལས་ཐར་བར་འགྱུར་རོ། །ཐར་ནས་ཀྱང་ལས་དེ་དང་རྒྱུ་འཐུན་པར་ཚེ་རབས་སྟོང་དུ་ཡི་དགས་མཆིལ་མ་ཟ་བ་རྣམས་ཀྱི་ནང་དུ་སྐྱེ་བར་འགྱུར་རོ། །དེ་ལས་ཐར་ནས་ཀྱང་ཚེ་རབས་ལྔ་བརྒྱར་འོད་མའི་ཚལ་དུ་སྲིན་བུར་སྐྱེ་བར་འགྱུར་ཏེ། གང་དང་གང་དུ་སྐྱེས་པར་རྡོ་འབབ་པས་འདམ་བུ་སྲབ་མོར་བརྡུངས་པ་ལྟར་ལུས་ཤིན་ཏུ་སྲབ་མོར་རྡུང་བའི་གནོད་པ་མྱོང་བར་བྱེད་དོ། །དེ་ལས་ཐར་ནས་ཀྱང་གལ་ཏེ་མི་རྣམས་དང་སྐལ་བ་མཉམ་པར་མིར་སྐྱེས་ན། དེ་དབུལ་ཞིང་ནད་བུ་ཅན་དང་། གཞན་གྱིས་མངག་པ་དང་། ཡུལ་བྱེ་མ་ཅན་དང་། མྱ་ངམ་དང་། གཡངས་དང་། ཆུ་མེད་པ་དང་། རྩྭ་མེད་པ་དང་། ནགས་ཚལ་མེད་པ་དང་། ནེའུ་གསིང་མེད་པ་དང་། ལྟེང་ཀ་མེད་པའི་འཁོར་རྟག་ཏུ་གནོད་པར་སྐྱེ་བར་འགྱུར་བ་མཐོང་ངོ་། །དེ་ནས་ཡང་དགེ་སློང་ལས་ཀྱི་འབྲས་བུ་རྣམ་པར་སྨིན་པ་ཤེས་པ་དེས་སེམས་ཅན་དམྱལ་བ་ཆེན་པོ་མནར་མེད་པའི་འཁོར་ལ་བརྟགས་ན། དེས་ཐོས་པ་ལས་བྱུང་བའི་ཤེས་པས་སེམས་ཅན་དམྱལ་བ་ལུས་ཞུམ་མི་བཟད་འཕྱང་ཞེས་བྱ་བ་མཐོང་ངོ་། །དེར་སེམས་ཅན་དག་ལས་གང་གིས་སྐྱེ་བར་འགྱུར་སྙམ་ནས་དེས་ཐོས་པ་ལས་བྱུང་བའི་ཤེས་པས་བརྟགས་ན། སྦྱིན་པ་པོའམ་སྦྱིན་བདག་གང་གིས་འདི་ལྟར་རྫས་འདིས་ནད་པ་དེ་དག་ཉིད་ཀྱི་དོན་དུ་འགྱུར་བར་བྱའོ་སྙམ་ནས་གུས་པ་དང་། དད་པ་དང་། དང་བ་དང་། ཡིད་གསལ་བས་ནད་པ་ཁྱིམ་གྱི་ནང་ནས་བྱུང་བ་དེའི་ནད་ཞི་བར་བྱ་བའི་ཕྱིར་རྫས་བྱིན་པ་སྡིག་པ་ཅན་ལུང་བོང་ལྟར་སྤྱོད་པ་ཁོང་གསོག་ཏུ་འདུག་པ་གོས་ངུར་སྨྲིག་བགོས་པ་དེས་ནད་པའི་གསོས་སྨན་གྱི་རྐྱེན་གྱིས་ཡོ་བྱད་དུ་བྱས་པ་འཕྲོག་པར་བྱེད་དོ།