།དེ་སྲེག་པ་མི་འདྲ་བ་གཉིས་ཀྱིས་སྲེག་པ་ན་ངུ་སྐད་འབྱིན་ཆོ་ངེས་འདེབས་ཀུ་ཆོ་འདོན་ཅིང་མིག་ཤིན་ཏུ་འགྱུར་བར་བྱེད་དེ། ཟངས་དམར་པོ་རབ་ཏུ་འབར་བ་དེས་དེའི་ལྕེ་སྲེག་པར་བྱེད་དོ། །ལྕེ་བསྲེགས་ནས་མིད་པ་སྲེག་གོ། །མིད་པ་བསྲེགས་ནས་སྙིང་སྲེག་གོ། །སྙིང་བསྲེགས་ནས་རྒྱུ་མ་སྲེག་གོ། །དེ་དག་ཀྱང་བསྲེགས་ནས་ལོང་ཀ་སྲེག་གོ། །ལོང་ཀ་ཡང་བསྲེགས་ནས་ཐུར་དུ་བྱུང་ངོ་། །དེ་ལྟར་དེ་སྲེག་པ་ན་འདི་ལྟར་གཤིན་རྗེའི་མི་རྣམས་ཀྱིས་རྗེས་སུ་བསྟན་པ་ཚིགས་སུ་བཅད་དེ་སྨྲས་པ། སྔ་ཕྱི་འབྲེལ་བ་མེད་པའི་ཚིག །དོན་མེད་ཐོག་ཏུ་མི་ཕེབས་ཏེ། །འབྲེལ་མེད་ཁྱོད་ཀྱིས་གང་སྨྲས་པ། །དེ་ཡི་འབྲས་བུ་འདི་འདྲའོ། །གང་དག་རྟག་ཏུ་བདེན་མི་སྨྲ། །ཚིག་དོན་བཟང་པོ་མ་ཡིན་ཞིང་། །ལྕེ་དེ་མཁས་པས་མི་མཐོང་སྟེ། །ཤ་ཡི་གོང་བུ་ཙམ་དུ་ཟད། །གང་དག་རྟག་ཏུ་བདེན་སྨྲ་བ། །ཡོན་ཏན་བརྟན་ཞིང་རྟག་ཏུ་ལེགས། །དེ་ནི་མཐོ་རིས་སྐས་ཡིན་ཏེ། །དེ་ལ་ལྕེ་ཞེས་མི་བརྗོད་དོ། །དེ་ནས་གཤིན་རྗེའི་མི་དེ་དག་གིས་སེམས་ཅན་དམྱལ་བ་པ་དེ་ལ་རྗེས་སུ་བསྟན་ནས་ཟངས་དམར་པོ་རབ་ཏུ་བསྐོལ་བ་དེ་དག་སེམས་ཅན་དམྱལ་བ་པའི་ཁར་ལྡུགས་ཏེ། ལོ་འབུམ་ཕྲག་དུ་མར་འབྲེལ་བ་མེད་པར་སྨྲ་བ་དེའི་རྣམ་པར་སྨིན་པ་སྙིང་རྗེ་རྗེ་ལྟར་མྱོང་ངོ་། །དེ་ནས་གལ་ཏེ་སེམས་ཅན་དམྱལ་བ་པ་དེ་གཤིན་རྗེའི་མི་དེ་དག་གིས་བཏང་ནས་གར་བབ་བབ་ཏུ་འབྲོས་སོ། །མེ་མདག་གི་ཆུ་བོའི་ནང་དག་ཏུ་བྱིང་སྟེ། རབ་ཏུ་འཇུ་བ་ན་རྐང་པ་དང་། བྱིན་པ་དང་རྐེད་པ་དག་མེ་མདག་གི་ཆུ་བོ་དེ་དག་གི་ནང་དུ་མར་སར་གྱི་གོང་བུ་ལྟ་བུར་རབ་ཏུ་འཇུ་བར་བྱེད་དོ། །དེ་ནས་ཡང་འབྱུང་བར་འགྱུར་ཏེ། དེ་ལྟར་མགོན་འདོད་པ། སྐྱབས་འདོད་པ། དཔུང་གཉེན་འདོད་པ་དེ་གར་བབ་བབ་ཏུ་འབྲོས་སོ། །དེ་ནས་ལས་ཀྱིས་བྱས་པའི་ནོར་རྫས་མང་པོ་གསོབ་གསོག་སྙིང་པོ་མེད་པ་གཞན་གྱིས་ཡོངས་སུ་བཟུང་བ་དག་ལས་ཀྱིས་བསྐུལ་བ་རྨོངས་པ་དེ་འདི་ནི། བདག་གི་ཡིན་ནོ་སྙམ་མོ། །དེ་ནས་སེམས་ཅན་དམྱལ་བ་པ་དེ་ནོར་རྫས་ག་ལ་ཡོད་པ་དེ་ཉིད་དུ་རྒྱུག་གོ། །དེ་བརྣབ་སེམས་མི་དགེ་བ་ཀུན་ཏུ་བསྟེན་ཅིང་བསྒོམས་ཏེ་མང་དུ་བྱས་པའི་འབྲས་བུ་འདི་ནི་གང་སེམས་ཅན་དམྱལ་བ་པ་དེས་དེ་ལྟར་ལོག་པར་མཐོང་བ་ཡིན་ནོ།