སེམས་ཅན་དམྱལ་བ་པ་དེའི་ལུས་ཀྱང་མི་མངོན་པར་འབུད་དོ། །དེ་ལྟར་དེ་ལོ་འབུམ་ཕྲག་དུ་མར་ཞི་ག་དག་གི་ནང་དུ་བཅུག་ནས་ཇི་ལྟར་མེས་གསེར་འཇུ་བ་ལྟར་འཚེད་དོ། །དེ་ལྟར་དེ་སེམས་ཅན་དམྱལ་བ་དེར་ཉེས་པར་བྱས་པའི་ལས་ཀྱི་མཐའ་སྤྱད་པས་འཚེད་དེ། དེ་གལ་ཏེ་ལས་ཟད་པས་ཞི་ག་དེ་དག་གི་ཞབས་ཀྱི་ནང་དུ་ལྷུང་སྟེ། གཤིན་རྗེའི་མི་རྣམས་ཀྱིས་བཟུང་ནས་བརྡུང་བ་རྣམས་ཀྱིས་ཇི་ལྟར་ལྕགས་མགར་ས་དག་ལ་ལྕགས་གོང་བུར་བྱས་ཏེ། ལྕགས་མགར་གྱིས་ཀུན་ཏུ་རྡུང་བ་དེ་ལྟར་ཀུན་ཏུ་རྡུང་ངོ་། །དེ་ལྟར་ཀུན་ཏུ་རྡུང་བ་ན་བརྡུངས་པ་དང་སྲོག་ཆད་ལ་དེ་ནས་ཡང་བརྡུང་བ་བཏེག་པ་དང་ཡང་འཚོ་སྟེ། དེ་ལྟར་སེམས་ཅན་དམྱལ་བ་པ་དེ་ཡུན་རིང་དུ་ལོ་བགྲང་གིས་མི་ལང་བར་འཚེད་དོ། །དེ་བརྒྱ་ལ་དེ་ལས་ཐར་ན་གཤིན་རྗེའི་མི་རྣམས་ཀྱིས་རྔ་བོ་ཆེའི་ནང་དུ་འཇུག་པར་བྱེད་དོ། །བཅུག་ནས་ཀྱང་ལས་ཀྱིས་བྱས་པའི་རྔ་བོ་ཆེའི་སྒྲ་གང་གིས་དེའི་སྙིང་ཞིགས་པར་བྱེད་པ་རྣམ་པ་དེ་ལྟ་བུ་འབྱུང་བར་འགྱུར་ཏེ། སྙིང་རྣམ་པར་ཞིགས་པ་དེ་ཡང་འཚོ་བར་འགྱུར་ལ་དེ་ནས་ཡང་འཆི་བར་འགྱུར་ཏེ། དེ་ལྟར་དེ་ཇི་སྲིད་དུ་དེའི་སྡིག་པའི་ལས་བྱས་ཤིང་བསགས་པ་བཅོམ་ཞིང་སྤངས་ལ་ཟད་པར་མ་བྱས་པ་དེ་སྲིད་དུ་འཚོ་ཞིང་འཆིའོ། །དེ་ཕྱིས་སེམས་ཅན་དམྱལ་བ་དེ་ལས་ཐར་བར་འགྱུར་ཏེ། ཐར་ནས་ཀྱང་ལས་དེ་དང་རྒྱུ་འཐུན་པའི་འབྲས་བུས་ཚེ་རབས་དྲུག་བརྒྱར་དུད་འགྲོ་དག་ཏུ་སྐྱེ་བར་འགྱུར་རོ། །གལ་ཏེ་བརྒྱ་ལ་མི་རྣམས་དང་སྐལ་བ་མཉམ་པར་མིར་སྐྱེས་ན་དེ་རྟག་ཏུ་སྙིང་སྐྲག་པར་འགྱུར། རི་དགས་ཀྱི་སེམས་ལྟར་རྣམ་པར་འཁྲུལ་ཅིང་རྒྱལ་པོའི་འཁོར་ནས་རྟག་ཏུ་འཚེ་བར་འགྱུར། གཞན་གྱིས་སྒྲ་འབྱིན་པར་བྱེད་ཅིང་བཅིང་བས་ཀྱང་ཚེ་ཟད་པར་བྱེད་དེ། ནམས་ཀྱང་སེམས་བདེ་བར་མི་འགྱུར་བ་མཐོང་ངོ་། །དེ་ནས་ཡང་དགེ་སློང་ལས་ཀྱི་འབྲས་བུ་རྣམ་པར་སྨིན་པ་ཤེས་པ་དེས་སེམས་ཅན་དམྱལ་བ་ཆེན་པོ་རབ་ཏུ་ཚ་བའི་འཁོར་ལ་བརྟགས་ན། དེས་ཐོས་པ་ལས་བྱུང་བའི་ཤེས་པས་སེམས་ཅན་དམྱལ་བ་སྙིང་རྗེ་རྗེ་སྐད་སྒྲ་འབྱིན་པ་ཞེས་བྱ་བ་མཐོང་ངོ་། །དེར་སེམས་ཅན་དག་ལས་གང་གིས་སྐྱེ་བར་འགྱུར་སྙམ་ནས་དེས་བརྟགས་ན།