གང་གི་ཚེ་ལྷ་དེ་དག་རྣམས་པད་མའི་རྫིང་བུ་དེ་ཉིད་ན་རྩེ་བར་བྱེད་པ་ན་དེའི་ཚེ་ཤིང་དེ་དག་རླུང་འཇམ་པོ་རྣམས་ཀྱིས་རབ་ཏུ་བསྐྱོད་པར་གྱུར་པས་ཕན་ཚུན་དུ་འདྲུད་པར་བྱེད་དོ། །ཀུན་དུ་འདྲུད་པར་གྱུར་པ་དེ་དག་རྣམས་ཀྱི་ཕན་ཚུན་དུ་སྙན་པར་གྱུར་པ་དང་ཕན་ཚུན་དུ་ཡིད་དུ་འོང་བ་དང་སྒྲ་རྒྱ་ཆེན་པོ་རྣམ་པ་སྣ་ཚོགས་པ་རྣམས་རབ་ཏུ་འབྱུང་བར་འགྱུར་རོ། །ལྷ་རྫས་ཀྱི་ནོར་བུའི་ཕུང་པོ་ཡང་མཆོག་ཏུ་ཡང་བར་གྱུར་པ་དག་མེ་ཏོག་བཞིན་དུ་རབ་ཏུ་འབབ་པའོ། །གང་དག་ནོར་བུ་རྣམས་ཀྱིས་དེའི་ཚེ་ན་ནམ་མཁའ་མ་ལུས་པར་ཀུན་དུ་སྣང་བར་བྱེད་པ་རྣམས་ལ། དཔེར་ན་ཉི་མ་དང་ཟླ་བ་འདི་དག་གིས་འཛམ་བུའི་གླིང་རབ་ཏུ་སྣང་བར་བྱེད་པ་དེ་བཞིན་དུ་ནོར་བུ་དེ་དག་རྣམས་ཀྱིས་རབ་ཏུ་གསལ་བར་བྱེད་དོ། །དེའི་ཚེ་ནམ་མཁའི་རང་བཞིན་རབ་ཏུ་གསལ་བར་བྱེད་པ་ཡང་ཡིན་ནོ། །ལྗོན་ཤིང་གཞན་ཡང་པད་མའི་རྫིང་བུ་དེ་ཉིད་ཀྱི་ངོས་ན་ཡོད་པ་རྣམས་ལ། འདི་ལྟ་སྟེ་སྐྱེ་བོ་མི་གཡོ་བ་ཞེས་བྱ་བའི་ཤིང་ལྗོན་པའོ། །པད་མའི་རྫིང་བུ་དེ་དག་ཉིད་ན་ལྷ་དེ་དག་རྣམས་རྩེ་བར་བྱེད་པ་ན། དེའི་ཚེ་ལྗོན་ཤིང་དེ་དག་ལས་ལྷ་དེ་དག་རྣམས་ཉིད་ཀྱིས་ལེགས་པར་བྱས་པའི་ལས་རྣམས་ཀྱི་འབྲས་བུ་ཁ་དོག་དཀར་བར་གྱུར་པའི་ཁུ་བའི་རྩི་ལྷ་རྫས་ཀྱི་དྲི་དང་རོ་དང་ཁ་དོག་དང་རེག་བྱ་ཅན་དེ་དག་རབ་ཏུ་འབྱུང་ངོ་། །དེའི་ཚེ་ལྷ་དེ་དག་རྣམས་འཐུང་བར་བྱེད་དོ། །དེས་བཅུ་འགྱུར་གྱིས་ཀྱང་ལྷག་པར་ཡིད་ཆེས་རབ་ཏུ་རངས་པར་འགྱུར་རོ། །མྱོས་པའི་སྐྱོན་རྣམས་དང་ནི་བྲལ་བ་ཡིན་ནོ། །ལྷན་ཅིག་སྤྱོད་པར་བྱེད་པ་དེ་དག་རྣམས་ཀྱིས་ཡོངས་སུ་བསྐོར་ནས་གར་དང་རྒོད་པར་ཡང་བྱེད་དོ། །བཟའ་བ་ཡང་བདུད་རྩིའི་རང་བཞིན་རྣམས་རབ་ཏུ་ཟ་བར་བྱེད་དོ། །དེ་ལྟར་ཤིང་དེ་དག་རྣམས་ཉིད་ལས་ལྷ་དེ་དག་རྣམས་ཀྱི་ལས་ཇི་ལྟ་བུ་རྣམས་དང་འདྲ་བར་འགྱུར་རོ། །གཞན་ཡང་པད་མའི་རྫིང་བུ་དེ་ཉིད་ན་རྣམ་པ་སྣ་ཚོགས་པར་རྣམ་པར་བཀྲ་བའི་དྲི་དང་ཁ་དོག་ཅེས་བྱ་བ་འགྲམ་ན་སྐྱེས་པའི་ཤིང་ལྗོན་པ་གཞན་དག་ཡོད་དོ། །གང་གི་ཚེ་ན་ལྷ་དེ་དག་རྣམས་པད་མའི་རྫིང་བུ་དེ་ན་རྩེད་མོ་རྩེ་བར་བྱེད་པ་ན། དེའི་ཚེ་ལྷ་དེ་དག་རྣམས་ཉིད་ཀྱི་ལེགས་པར་བྱས་པའི་ལས་ཀྱིས་བདེ་བའི་རེག་པའི་རླུང་འཇམ་པོ་རབ་ཏུ་འཕྱུར་རོ། །རླུང་དེ་དག་གིས་ཀྱང་ལྗོན་ཤིང་དེ་དག་རྣམས་ཀྱི་འདབ་མ་དེ་དག་འདྲུད་པར་བྱེད་དོ།