།པད་མ་གཞན་ཁ་ཅིག་ནི་ཨུད་པ་ལ་དང་ཆ་འདྲ་བ་དང་། ཡུ་བ་དང་། འདབ་མ་དང་། ཟེ་འབྲུ་དང་། སྙིང་པོ་རྣམས་ཐམས་ཅད་ནས་སྔོན་པོར་གྱུར་པ་ལ་བུང་བའི་ཚོགས་རྣམ་པར་སྒྲོགས་པ་རྣམས་ཀྱིས་ཉེ་བར་མཛེས་པའོ། །གཞན་ཡང་པད་མ་གཞན་རྣམས་རྣམ་པར་མཛེས་པར་གྱུར་པ་པད་མའི་རྫིང་བུ་དེ་ཉིད་ན་ཁ་དོག་རྣམ་པར་བཀྲ་བའི་པད་མ་རྣམས་ལ་འདི་ལྟ་སྟེ། པད་མ་གཅིག་ཀྱང་རིན་པོ་ཆེ་བདུན་གྱི་རང་བཞིན་གྱིས་རྣམ་པར་བཀྲ་བ་དང་དབྱིབས་རྣམ་པ་སྣ་ཚོགས་པ་དང་རྣམ་པ་སྣ་ཚོགས་པར་རབ་ཏུ་སྐྱེས་པར་གྱུར་པའི་པད་མ་རྣམས་ཡིན་ཞིང་། རྣམ་པ་སྣ་ཚོགས་པའི་དྲི་དང་ལྡན་པ་དང་འདབ་མ་ཁ་དོག་སྣ་ཚོགས་པས་ཉེ་བར་མཛེས་པར་གྱུར་པ་རྣམས་ལ་འདི་ལྟ་སྟེ། སྔོན་པོ་དང་། སེར་པོ་དང་། དཀར་པོ་དང་། དམར་པོ་དང་། ནག་པོ་དང་། རྣམ་པར་འདྲེས་པའི་འདབ་མས་ཉེ་བར་མཛེས་པར་བྱས་པའི་པད་མའི་རྫིང་བུ་ལས་སྐྱེས་པ་ལས་བུང་བའི་ཚོགས་རྣམས་ཀྱིས་མཛེས་པར་གྱུར་པའོ། །རྣམ་པ་དེ་སྲིད་པ་རྣམས་ཉིད་ཀྱིས་ཉེ་བར་མཛེས་པར་གྱུར་པས་པད་མའི་གསེབ་རྣམས་རབ་ཏུ་གསལ་ལོ། །རྣམ་པ་དེ་ལྟ་བུར་རྣམ་པར་བཀྲ་བར་གྱུར་པའི་པད་མའི་རྫིང་བུ་དེ་ན་མཆོག་ཏུ་དགའ་བར་གྱུར་པ་རབ་ཏུ་དང་བའི་ཆུ་བསིལ་ཞིང་མངར་བའི་ཆུ་ལ་མཆོག་ཏུ་དགའ་བའི་ལྷ་རྫས་ཀྱི་མདོག་དང་། དྲི་དང་། དབྱིབས་དང་ལྡན་པའི་པད་མས་ཉེ་བར་མཛེས་པར་གྱུར་པ་འདི་ན། ལྷ་གསར་དུ་སྐྱེས་པ་དེ་ལྷ་མོའི་ཚོགས་རྣམས་ཀྱིས་ཡོངས་སུ་བསྐོར་ཅིང་ལྷན་ཅིག་ཏུ་ལྷ་རྫས་ཀྱི་འདོད་པའི་ཡོན་ཏན་ལྔ་དང་ལྡན་པར་གྱུར་ནས་རྔ་སྐད་ཡན་ལག་ལྔ་པས་རྩེ་བར་བྱེད་ཅིང་རྒོད་པར་བྱེད་དོ། །རྣམ་པ་སྣ་ཚོགས་པར་རྣམ་པར་བཀྲ་བའི་པད་མའི་རྫིང་བུ་དེའི་མཐའ་མ་ན་ཡང་། ལྷ་རྫས་ཀྱི་འགྲམ་ནས་སྐྱེས་པར་གྱུར་པའི་ལྗོན་ཤིང་གི་རིགས་ཡོད་པ་རྣམས་ནི་གང་དག་གིས་པད་མའི་རྫིང་བུ་དེ་བརྒྱ་འགྱུར་དུ་ཡང་རྣམ་པར་མཛེས་པར་བྱེད་པ་སྟེ། ནམ་ཟླ་ཐམས་ཅད་དུ་རབ་ཏུ་ཁ་བྱེ་བར་གྱུར་པའི་མེ་ཏོག་གི་ཚན་ཀ་ཀུན་ནས་དུད་པ་རྣམས་ཀྱིས་ཡོངས་སུ་བསྐོར་བ་རྣམས་ལ་འདི་ལྟ་སྟེ། ཤིང་གི་ཚོགས་སུ་གྱུར་པ་རྣམས་ལ་ཤིང་གང་དག་གི་མཛེས་པ་འདི་དག་ཡིན་ཏེ། འདི་ལྟར་རྩ་བ་ནས་བཟུང་ནས་སྔོན་པོ་དང་། སེར་པོ་དང་། དཀར་པོ་དང་། ནག་པོ་དང་། དམར་པོའི་མདོག་གི་མེ་ཏོག་རྣམས་ཀྱིས་ཉེ་བར་མཛེས་པ་དང་ལྡན་པའི་ལྗོན་ཤིང་རྣམས་ཡིན་ནོ།