།དེ་ལྟ་དེ་ལྟར་བག་མེད་པའི། །དུག་གིས་རྨོངས་ནས་རབ་ཆུད་འཛའ། །བག་མེད་ལྷ་རྣམས་ཐམས་ཅད་ཀྱིས། །སྔར་ནི་དགའ་བ་བཞིན་དུ་མཐོང་། །ཕྱི་ནས་སྡུག་བསྔལ་མཐོང་ནས་ནི། །མི་རྣམས་ལ་ནི་དགྲ་བཞིན་སྐྱེ། །བུད་མེད་དང་འདྲེ་བློ་ལྡན་གྱིས། །བག་མེད་རྣམས་ལས་ལྷག་པར་བརྗོད། །དེ་དང་འདྲེ་ལས་ལྷ་རྣམས་འཇིག །ལྷ་མིན་ལྟོ་འཕྱེ་ཆེན་པོ་ཡང་། །བུད་མེད་དང་འབྲེལ་ཆང་འཐུང་དང་། །རྩེད་མོ་ཡུལ་དང་ལྷན་ཅིག་ཏུ། །རྩབ་ཧྲལ་དེ་ནས་ལེ་ལོ་དང་། །དེ་དག་བག་མེད་མྱུ་གུ་ཡིན། །དེ་དག་བྱ་དེས་ལྷ་དེ་དག་རྣམས་མངོན་པར་མཐོང་ནས་རྗེས་སུ་འདོམས་པར་བྱེད་པའི་ཚིགས་སུ་བཅད་པ་རྣམས་བརྗོད་དོ། །དེ་ནས་ལྷ་དེ་དག་ལ་དེ་ལྟར་ཕན་པ་རྣམས་བརྗོད་པར་གྱུར་པ་ན་ཡང་རྟོགས་པར་མི་འགྱུར་བར། ཡུལ་རྣམས་ཀྱིས་ཉེ་བར་བཅོམ་ནས་དེ་ཁོ་ན་བཞིན་དུ་གར་བྱེད་པར་གྱུར་ཅིང་རྒོད་པར་གྱུར་པ་དང་རྩེ་བར་ཡང་གྱུར་པས། སླར་ཡང་འཁྲི་ཤིང་ལྗོན་ཤིང་གིས་ཀུན་ནས་ཁྱབ་པའི་ནགས་འོད་སྣང་བ་དེ་ཉིད་དུ་རབ་ཏུ་འཇུག་པར་བྱེད་དོ། །ནགས་དེ་ན་ནི་མཆོག་ཏུ་དགའ་བར་གྱུར་པ་རྣམ་པ་སྣ་ཚོགས་པའི་ཤིང་དང་འཁྲི་ཤིང་དང་ལྗོན་ཤིང་དང་པད་མའི་རྫིང་བུ་དང་ཁྲུས་ཀྱི་རྫིང་བུ་དང་འབབ་ཆུ་རྣམས་ལ་དགའ་བ་རྣམ་པ་སྣ་ཚོགས་པའི་བྱའི་ཚོགས་བརྒྱ་ཕྲག་གི་སྒྲ་འབྱིན་པ་རྣམས་དང་། མེ་ཏོག་བརྒྱ་སྟོང་ཕྲག་ཁ་བྱེ་བས་དགའ་བར་གྱུར་པ་མན་དཱ་ར་བ་ཀུན་ནས་དུད་པའི་ལྗོན་ཤིང་དང་མྱུ་གུ་ལ་ལྷ་བརྒྱ་ཕྲག་གིས་གང་བས་དགའ་བ། ལྷ་རྫས་ཀྱི་རྔ་སྐད་ཡན་ལག་ལྔ་པའི་སྒྲ་སྒྲོགས་པར་གྱུར་པའི་སྒྲས་ལྷ་དེ་དག་ལྷ་གསར་དུ་སྐྱེས་པ་དེ་དང་ཡང་དག་པར་ལྡན་པས་རྩེ་བར་བྱེད་ཅིང་དགའ་བར་ཡང་བྱེད་དོ། །དེ་ལ་ལྷ་གང་དག་སྐྱེས་ནས་རིང་དུ་ལོན་པ་དེ་དག་རྣམས་ལན་ཅིག་དང་ལན་ཅིག་མ་ཡིན་པར་རྣམ་པ་དུ་མར་ནགས་དེ་དག་དང་ནགས་ཀྱི་བཀོད་པ་དག་རྣམས་ལ་དང་འཇུག་ངོས་དེ་དག་དང་པད་མའི་རྫིང་བུ་དེ་དག་དང་ས་གཞིའི་ཆ་དེ་དག་དང་འཁྲི་ཤིང་གི་ཁང་པ་དེ་དག་དང་། ནགས་ཀྱི་གསེབ་དེ་དག་དང་དཔག་བསམ་གྱི་ཤིང་དེ་དག་དང་ནགས་ཁྲོད་ཀྱི་གསེབ་རིན་པོ་ཆེ་བདུན་གྱི་འོད་ཀུན་ནས་འབར་བའི་འོད་ཟེར་དང་ལྡན་པ་དང་ཁང་བུ་སྔ་ན་མ་མཐོང་བ་དེ་དག་རྣམས་ཀྱིས་དེ་ལྟར་ཀུན་དུ་འཁྲིད་པར་བྱེད་དོ།