།དེ་ནས་ལྷ་དེ་དག་རྣམས་ཀྱིས་གཙུག་ལག་གི་ཆོས་དེ་ཐོས་པར་གྱུར་ནས། རབ་ཏུ་རྣམ་པར་དང་བར་གྱུར་པའི་ཡིད་ཐམས་ཅད་ལ་སྐྱེས་ནས་དེ་ལ་དེ་དག་རྣམས་ཀྱིས་འདི་སྐད་ཅེས་བརྗོད་དེ། ཡང་ཇི་ལྟར་ཁྱོད་ཁོ་ན་འདི་ན་ལྷ་ཡིན་ཏེ། གང་ལ་ཡང་རྣམ་པ་འདི་འདྲ་བའི་བློ་དང་སྒྲུབ་པ་མེད་པའི་ཕྱིར་རོ། །བདག་ཅག་རྣམས་ནི་དུད་འགྲོ་ཡིན་ཏེ་བག་མེད་པས་རྣམ་པར་བཅོམ་པ་དང་ཡུལ་རྣམས་ལ་དཔུང་གཉེན་དུ་བྱེད་པས་རྟག་ཏུ་ཡང་སྲེད་པས་ཉེ་བར་བཅོམ་པའི་སེམས་གང་ལ་ཡང་རྣམ་པ་དེ་ལྟ་བུ་ཉིད་ནི་མེད་དེ། བདག་ཅག་རྣམས་ཐམས་ཅད་ཀྱིས་གུས་པ་ཐམས་ཅད་ཀྱིས་གླུ་བླངས་པར་གྱུར་ཀྱང་རྣམ་པ་ཇི་སྲིད་པར་གྱུར་པའི་དབྱངས་དེ་དག་རྣམས་ནི་མི་འབྱུང་ངོ་། །དེ་ནས་དེའི་དུས་འདིར་ངང་པ་རྣམས་ཀྱི་མངའ་བདག་དེས་ཚིགས་སུ་བཅད་པའི་དབྱངས་ཀྱིས་བསྙད་པ། ཇི་ལྟར། དམ་ཆོས་བྱིན་རླབས་དང་ལྡན་པ། །ཆོས་བསྒྲགས་གནས་པའི་དབང་ཇི་བཞིན། །དམ་ཆོས་བསྒྲགས་པ་ཐོས་ནས་ནི། །སྡིག་པ་རྣམ་སྤོང་སྐྱེས་བུ་དེ། །དགའ་བས་ལེགས་པར་རབ་ཏུ་བསྒྲུབ། །རྟག་པར་ཡང་ནི་སྐྱེད་པར་བྱེད། །དམ་ཆོས་བསྒྲགས་པ་ཐོས་ནས་ནི། །ཡིད་ནི་ཚིམ་པར་འགྱུར་བ་ཡིན། །དགེ་བའང་ཤིན་ཏུ་ཆེན་པོ་ནི། །རྒྱུད་ལ་ཀུན་ནས་རབ་ཏུ་འཇོག །ཐོས་ནས་ཆོས་ནི་འཛིན་པར་འགྱུར། །ཐོས་ནས་སྡིག་པ་མི་བྱེད་དོ། །ཐོས་ནས་ལས་དང་འབྲས་བུ་ཤེས། །དེ་ནི་མྱ་ངན་འདས་པར་འགྲོ། །ཐོས་ནས་ཆོས་ལ་རྟོགས་པ་དང་། །ཐོས་ནས་སངས་རྒྱས་ལ་རབ་དང་། །ཐོས་ནས་སྡུག་བསྔལ་རྣམ་གྲོལ་བའི། །མི་གང་དེ་ནི་མཁས་པ་ཡིན། །ཆོས་བསྒྲགས་དེ་ཉིད་ཤེས་པ་ནི། །ཐོས་པས་ཡིད་ཅན་རྣམས་ལ་འགྱུར། །དེ་ཕྱིར་རབ་འབད་ཐོས་པའི་བློ། །རབ་ཏུ་བརྩོན་པས་བྱ་བར་གྱིས། །ཐོས་ནས་འཁོར་བ་ལས་ཁ་ཕྱིར། །གཏམ་ནི་བདེ་བར་གཤེགས་པས་གསུངས། །སྲིད་པ་རྣམ་པ་གསུམ་བཅོམ་ནས། །གོ་འཕང་ཉམས་པ་མེད་པར་འགྲོ། །རབ་ཏུ་བརྩོན་པ་རྣམ་བཞི་ཡིས། །སྐྱེ་འགག་མེད་པའི་ཆོས་རྣམས་ནི། །ཐོས་ནས་ས་བོན་ཐམས་ཅད་པ། །དེ་ཐོས་སྐྱེས་བུས་རྣམ་པར་བསྒོམ། །ཕུང་པོ་སྐྱེ་མཆེད་ཁམས་རྣམས་ཀྱི། །གང་ཕྱིར་མཚན་ཉིད་དེ་གཉིས་དག །ཐོས་ནས་ཀྱང་ནི་ཐམས་ཅད་ཤེས། །དེ་ཕྱིར་ཤེས་རབ་མཆོག་ཡིན་ནོ།