།གཞན་དག་གཡོ་དང་སེར་སྣ་དང་ལྡན་པར་གྱུར་ན་ཡང་རབ་ཏུ་འགོགས་པར་བྱེད་དོ། །སྨོད་པར་བྱེད་དོ། །བཤགས་སུ་འཇུག་གོ། །དགེ་ཞིང་ལེགས་པའི་ལམ་དམ་པར་འགོད་པར་བྱེད་དོ། །དེ་ལ་ཡོན་ཏན་དེ་དག་རྣམས་ནི་དམ་པའི་ཆོས་བསྒྲགས་པ་དང་ཉན་པ་ལས་ཡིན་ནོ། །དེའི་ཕྱིར་ན་མི་རྣམས་ཀྱི་སྙིང་པོ་ནི་གང་དམ་པའི་ཆོས་སྒྲོགས་པར་བྱེད་པ་དེ་དག་ཡིན་ནོ། །གཞན་ཡང་དམ་པའི་ཆོས་སྒྲོགས་པ་ལ་ཡོན་ཏན་ཡོད་དོ། །འདི་ཡང་གང་དག་ཞེ་ན། འདི་ལྟ་སྟེ། མ་དང་ཕ་ལ་གུས་པ་དང་ལྡན་པར་གྱུར་པའོ། །དམ་པའི་ཆོས་ཐོས་པར་གྱུར་པ་གང་གི་ཕྱིར་ལས་རྣམས་ཀྱི་རྣམ་པར་སྨིན་པ་དང་ཞིང་གི་ཡོན་ཏན་རྣམས་ཀུན་ཏུ་རིག་པར་འགྱུར་ཏེ། ཇི་ལྟར་མཆོག་ཏུ་གྱུར་པའི་ཞིང་དེ་དག་ནི། འདི་ལྟ་སྟེ། མ་དང་ཕ་དག་ཡིན་ནོ། །དེ་གང་གི་ཚེ་ལས་ཀྱི་འབྲས་བུ་ལ་ཡིད་ཆེས་པ་མངོན་པར་སྐྱེས་པར་གྱུར་ན་དེའི་ཚེ་སེམས་ལ་བསྒོམས་ནས་མ་དང་ཕ་དག་ལ་མཆོད་པར་བྱེད་དོ། །རབ་ཏུ་ཕལ་ཆེ་བར་གྱུར་པའི་ནད་ཀྱི་རྐྱེན་སྨན་དང་ཡོ་བྱད་རྣམས་ཀྱིས་ལེགས་པར་སྦྱོར་བར་བྱེད་དོ། །དེ་ཇི་ལྟ་ཇི་ལྟར་མ་དང་ཕ་དག་ལ་མཆོད་པར་བྱེད་པར་གྱུར་པ་དེ་ལྟ་དེ་ལྟར་ཚངས་པའི་བསོད་ནམས་འབྱུང་བར་འགྱུར་རོ། །དེ་དག་གིས་མྱ་ངན་ལས་འདས་པ་ཐོབ་པར་འགྱུར་རོ། །དམ་པའི་ཆོས་བསྒྲགས་པ་ལས་མ་དང་ཕ་ལ་མཆོད་པ་བྱེད་པར་གྱུར་ན་ཡོན་ཏན་གཞན་འདི་ཡང་ཡོད་དེ། སྐྱེ་བོ་རྣམས་ཐམས་ཅད་ཀྱིས་བསྔགས་པར་འགྱུར་བའོ། །མཐོང་བའི་ཆོས་ཉིད་ལ་མ་དང་ཕ་ལས་བསྔགས་པར་གྱུར་ལ། ལུས་ཞིག་པར་གྱུར་ནས་ཤི་བའི་འོག་ཏུ་མཐོ་རིས་བདེ་འགྲོ་ལྷའི་འཇིག་རྟེན་དུ་སྐྱེ་བར་འགྱུར་རོ། །རྒྱུ་དེ་ཉིད་དང་རྐྱེན་དེ་དག་གིས་ཀྱང་མཐར་ཡོངས་སུ་མྱ་ངན་ལས་འདའ་བར་འགྱུར་རོ། །དེའི་ཕྱིར་ཡོན་ཏན་དེ་དག་མངོན་པར་མཐོང་བར་གྱུར་པའི་སྐྱེས་བུ་མཁས་པ་རྣམས་ནི་ཇི་སྲིད་འཚོའི་བར་དུ་མ་དང་ཕ་དག་ལ་གུས་པར་འགྱུར་རོ། །བློ་གཞན་མ་ཡིན་པ་དང་། སྤྱོད་པ་གཞན་མ་ཡིན་པ་དང་། བློ་གྲོས་མཉམ་པར་བཞག་པར་གྱུར་པས་སྤྱོད་པ་རྣམས་ཀྱང་བསྡམས་པར་འགྱུར་རོ། །གཞན་ཡང་དམ་པའི་ཆོས་སྒྲོགས་པ་ལ་ཡོན་ཏན་གཞན་ཡང་ཡོད་དོ། །