།འཇིག་པར་བྱེད་དོ། །སྐྱེ་བ་གཞན་གང་དག་བརྒྱ་སྟོང་རྣམས་སུ་དམྱལ་བ་དང་ཡི་དགས་རྣམས་སུ་སྐྱེ་བར་འགྱུར་བ་རྣམས་འགོག་པར་བྱེད་དོ། །འདི་ཡང་དམ་པའི་ཆོས་བསྒྲགས་པ་ཉན་ཅིང་བསྟེན་པ་ལ་བསྒོམས་ཤིང་རྣམ་པར་དཔྱད་པ་རྣམས་ཀྱི་ཡོན་ཏན་ཆེན་པོ་གཞན་ཡིན་ནོ། །ཆོས་ཉན་པར་བྱེད་པ་རྣམས་ལ་དམ་པའི་ཆོས་སྒྲོགས་པ་རྣམས་ནི་ཤིན་ཏུ་གཅེས་པར་གྱུར་པ་ཡིན་ནོ། །མྱ་ངན་ལས་འདས་པ་ཉེ་བར་སྟོན་པར་བྱེད་པའི་ཕྱིར་ན་དོན་གྱིས་ན་སངས་རྒྱས་ཡིན་ནོ། །གང་གིས་ཆོས་ཀྱི་དབང་དུ་བྱས་ནས་རབ་ཏུ་འགོད་པར་བྱེད་པའི་དམ་པའི་ཆོས་སྨྲ་བ་པོ་དེ་ལ་བླ་ལྷག་ཏུ་འཐུན་པར་འཛིན་པ་དང་གུས་པ་ཆེན་པོ་དང་རབ་ཏུ་དང་བར་གྱུར་པ་རྣམས་གཡོ་མེད་པས་སྟོན་པ་བཞིན་དུ་བྱའོ། །འདི་ནི་དམ་པའི་ཆོས་ཉན་པའི་ཡོན་ཏན་ལྔ་པ་ཡིན་ནོ། །གཞན་ཡང་དམ་པའི་ཆོས་སྒྲོགས་པའི་ཡོན་ཏན་དྲུག་པ་འདི་དག་ཀྱང་གང་ཞེ་ན། འདི་ལྟ་སྟེ། རང་རབ་ཏུ་གནས་པར་གྱུར་ནས་གཞན་ཡང་རབ་ཏུ་གནས་པར་བྱེད་ཅིང་། གཞན་དག་རྣམས་ཀྱང་རབ་ཏུ་དད་པར་བྱེད་དོ། །གང་དག་གི་སྐྱེ་བ་གཞན་བརྒྱ་སྟོང་དུ་དམྱལ་བ་དང་ཡི་དགས་སུ་སྐྱེས་པར་གྱུར་པའི་སྡུག་བསྔལ་དུ་མ་རྣམས་བཅོམ་ནས་སྣོད་དུ་བྱེད་དོ། །འཁོར་བ་ལས་སྐྱོ་བ་སྐྱེད་པར་བྱེད་དོ། །བདེ་ལེགས་ཡང་དག་པར་སྟོན་པར་བྱེད་དོ། །སྡུག་བསྔལ་དང་ཀུན་འབྱུང་བ་དང་འགོག་པ་དང་ལམ་རྣམས་ཀྱི་གཏམ་བྱེད་དོ། །དེ་གཉིས་ཀའི་རྒྱུད་ལས་བསོད་ནམས་རབ་ཏུ་འབྱུང་བར་བྱེད་དོ། །དེ་རང་གི་རྒྱུད་ལ་ཡང་སྟེ། དེ་ནི་བདག་གཞན་ལ་ཕན་པར་བྱེད་པ་ཡིན་པས་བསོད་ནམས་ཆེན་པོ་རབ་ཏུ་འབྱུང་བར་འགྱུར་རོ། །ཇི་ལྟ་ཇི་ལྟར་དམ་པའི་ཆོས་སྒྲོགས་པ་ཉན་པར་བྱེད་པ་དེ་ལྟ་དེ་ལྟར་ཤེས་རབ་མངོན་པར་འཕེལ་བར་འགྱུར་རོ། །དེ་ལྟ་དེ་ལྟར་ཉོན་མོངས་པ་རྣམས་ཟད་པར་བྱེད་དོ། །དེ་ཉོན་མོངས་པ་རྣམས་ཟད་པས་ཡོངས་སུ་མྱ་ངན་ལས་འདའ་བར་འགྱུར་རོ། །དམ་པའི་ཆོས་སྒྲོགས་པའི་ཡོན་ཏན་ནི་དེ་དག་རྣམས་ཡིན་ནོ། །གཞན་ཡང་དམ་པའི་ཆོས་སྒྲོགས་པ་བསྟེན་ཅིང་བསྒོམས་ལ་ལན་མང་དུ་བྱས་པའི་ཡོན་ཏན་བདུན་པ་ཡོད་དོ། །འདི་ཡང་ཞེ་ན། འདི་ལྟ་སྟེ། རྒུད་པས་སེམས་ཞུམ་པར་མི་འགྱུར་རོ།