གང་དག་འཐབ་བྲལ་བ་དེ་དག་རྣམས་ནི་ནགས་དང་ཉེ་བའི་ནགས་དང་རྫིང་བུ་དང་པད་མའི་རྫིང་བུ་རྣམས་སུ་རྩེད་མོའི་དོན་དུ་རབ་ཏུ་ཞུགས་པར་གྱུར་ཏོ། །དགའ་ལྡན་གྱི་ལྷ་གང་ཡིན་པ་དེ་དག་རྣམས་ཀྱང་ནམ་མཁའི་དབྱིངས་ནས་གང་ན་དགའ་ལྡན་གྱི་ལྷ་རྣམས་ཡོད་པ་དེར་དེ་དག་རྣམས་ཕྱིར་སོང་ངོ་། །ཆོས་ཀྱི་རྣམ་གྲངས་ཉི་ཤུ་རྩ་གཉིས་པར་གྱུར་པ་རྫོགས་སོ།། །།དེ་ནས་འཐབ་བྲལ་གྱི་ལྷ་དེ་དག་རྣམས་ནགས་དང་ཉེ་བའི་ནགས་དེ་དག་ལ་ཇི་སྲིད་དུ་འདོད་པ་སྡུག་པ་ཡིད་དུ་འོང་བ་ངེས་པར་མྱོང་བར་འགྱུར་བའི་ལས་རྣམས་ཟད་པར་མ་གྱུར་གྱི་བར་དེ་སྲིད་དུ་དགའ་བར་བྱེད་རྩེ་བར་བྱེད་དོ། །དེ་ནས་རང་གིས་བྱས་པའི་ལས་ལ་ལོངས་སྤྱོད་པས་དམྱལ་བ་དང་ཡི་དགས་དང་དུད་འགྲོ་རྣམས་སུ་སྐྱེ་བར་འགྱུར་རོ། །ཡང་གལ་ཏེ་ལན་གྲངས་གཞན་ལ་མྱོང་བར་འགྱུར་བའི་ལས་ཀྱིས་མི་རྣམས་སུ་སྐྱེས་པར་གྱུར་ན། དེ་རྟག་ཏུ་ཆོས་ལ་གནས་པར་འགྱུར་ཞིང་ཆེན་པོའི་རིགས་དང་མདངས་དང་། དབང་ཕྱུག་གི་ཡོན་ཏན་རྣམས་ཕུན་སུམ་ཚོགས་པར་གྱུར་པའི་ཡུལ་བཟང་པོ་རྣམས་སུ་རྒྱལ་པོའམ་རྒྱལ་པོའི་བློན་པོར་ཡང་ལེགས་པར་བྱས་པའི་ལས་དེའི་རྒྱུ་འཐུན་པས་འགྱུར་རོ། །གཞན་ཡང་དགེ་སློང་ལས་ཀྱི་འབྲས་བུ་རྣམ་པར་སྨིན་པ་ཤེས་པ་དེས་འཐབ་བྲལ་བའི་ལྷ་རྣམས་ཀྱི་ས་ལ་ཀུན་ཏུ་ལྟ་བར་བྱེད་དོ། །དེས་ཐོས་པ་ལས་བྱུང་བའི་ཤེས་པས་སམ་ལྷའི་མིག་གིས་ཇི་ལྟར་ཡོད་པའི་འཐབ་བྲལ་བ་རྣམས་ཀྱི་ས་མཐོང་བར་གྱུར་པ་ནི་རཱ་ཛ་ནི་ན་རྒྱུ་བ་ཞེས་བྱ་བའོ། །ས་དེ་ལ་ལས་གང་དག་གིས་སེམས་ཅན་རྣམས་སྐྱེ་བར་འགྱུར་བ་ཡང་དེས་མཐོང་བ་ནི། སེམས་ཅན་ཆེན་པོ་སྐྱེས་བུ་དམ་པ་དགེ་ལེགས་སུ་སྤྱོད་པ་དྲང་པོ་དྲང་པོའི་རིགས་ཅན་གང་དག་གིས་རྟག་ཏུ་ཡང་ཚུལ་ཁྲིམས་དང་ལྡན་པར་གྱུར་པས་སྲོག་གཅོད་པ་དང་མ་བྱིན་པར་ལེན་པ་ཡོངས་སུ་སྤངས་པར་གྱུར་པ་ནི་སྔ་མ་བཞིན་ཏེ། འདོད་པ་ལ་ལོག་པར་གཡེམ་པ་ཡང་ཡོངས་སུ་སྤངས་པར་གྱུར་པ་ནི་བུད་མེད་ཀྱི་ཡུལ་རྣམས་ལ་རྩིག་པ་ལས་གྱུར་པ་ཡང་རུང་སྟེ། རྣམ་པ་ཐམས་ཅད་དུ་བག་ཙམ་ཅིག་ཀྱང་ཚུལ་བཞིན་མ་ཡིན་པའི་ཡིད་ལ་བྱེད་པར་གྱུར་པ་འདོད་ཆགས་དང་ལྷན་ཅིག་འགྲོགས་པས་ཀུན་ཏུ་ལྟ་བར་མི་བྱེད་དོ། །གཞན་དག་བྱེད་པར་གྱུར་པ་རྣམས་ཀྱང་རབ་ཏུ་འགོག་པར་བྱེད་དོ།