།གཞན་ཡང་དགེ་སྦྱོང་ངམ་བྲམ་ཟེ་རྣམས་ཀྱིས་ཀྱང་རེག་བྱ་ལ་རེག་པར་གྱུར་པ་ན་ཀུན་དགའ་བས་ཆོག་ཤེས་པ་དྲན་པ་དང་ལྡན་པ་རྣམས་རེག་བྱ་ལ་རེག་པར་གྱུར་ནས་ཡང་དག་པ་ཇི་ལྟ་བ་བཞིན་དུ་ཀུན་ཏུ་ལྟ་བར་བྱེད་པ་ན། ཇི་ལྟར་རེག་བྱ་འདི་དག་རྣམས་རང་བཞིན་ཉིད་ཀྱིས་རྟག་པའམ་བརྟན་པའམ། ཐེར་ཟུག་གམ་ཡོངས་སུ་མི་འགྱུར་བའི་ཆོས་ཅན་ནི་མ་ཡིན་གྱི། འདི་དག་རྣམས་ནི་གསོག་གསོབ་སྙིང་པོ་མེད་པ་ཡིན་ཏེ། རེག་བྱ་འདི་དག་ནི་བྱུང་ནས་མེད་པར་འགྱུར་བ་དང་། བྱུང་ནས་ཀྱང་ཕྱིར་ལྡོག་པར་འགྱུར་བ་ཡིན་ནོ། །དེས་ཡང་དག་པ་ཇི་ལྟ་བ་བཞིན་དུ་རེག་བྱ་འདི་དག་རྣམས་ལ་ལྟ་བར་བྱེད་དོ། །རྣམ་པར་རྟོག་པར་མི་བྱེད་དོ། །འདས་པའི་རེག་བྱ་རྣམས་ལ་དྲན་པས་རྗེས་སུ་འབྲེལ་བར་མི་བྱེད་དོ། །སྲེད་པ་རྣམས་སྐྱེད་པར་མི་བྱེད་ཅིང་རེག་བྱ་དེ་དག་རྣམས་ལ་ཆགས་པར་ཡང་མི་བྱེད་དོ། །ཕྱིར་ཞིང་ཡང་དང་ཡང་དུ་རེག་བྱ་གཞན་རྣམས་དོན་དུ་གཉེར་བར་མི་བྱེད་དོ། །ཅི་ཡང་རུང་བའི་རེག་བྱ་དེ་དག་གིས་ཀྱང་ཆོག་ཤེས་པར་ཡང་འགྱུར་རོ། །ཇི་ལྟ་བ་བཞིན་དུ་འདུན་པའི་འདོད་ཆགས་དང་རྣམ་པར་བྲལ་བའི་རེག་བྱ་དག་གིས་ཆོག་ཤེས་པར་བྱེད་དོ། །འདི་ནི་རེག་བྱས་ཆོག་ཤེས་པ་ཞེས་བྱ་བར་ཡང་བརྗོད་དོ། །གཞན་ཡང་དགེ་སྦྱོང་ངམ་བྲམ་ཟེའམ་དེ་དག་གི་རིགས་ཅན་གཞན་རྣམས་ཀྱིས་ཀྱང་ཡིད་ཀྱིས་ཆོས་འདོད་པ་རྣམས་དང་མི་འདོད་པ་རྣམས་དཔྱད་པར་གྱུར་ནས་ཡང་དག་པ་ཇི་ལྟ་བ་བཞིན་དུ་རྗེས་སུ་ལྟའོ། །ཆོས་འདི་དག་ནི་རྟག་པའམ་བརྟན་པའམ། ཐེར་ཟུག་གམ་ཡོངས་སུ་མི་འགྱུར་བའི་ཆོས་ཅན་ནི་མ་ཡིན་གྱི། འདི་དག་རྣམས་ནི་སྟོང་པ་དང་མེད་པ་དང་སྙིང་པོ་མེད་པ་ཡིན་ནོ། །འདི་དག་ནི་མི་རྟག་པ་དང་སྡུག་བསྔལ་བ་དང་སྟོང་པ་དང་བདག་མེད་པ་ཡིན་ཏེ། མེད་པར་གྱུར་ནས་ཀྱང་འབྱུང་བར་འགྱུར་ལ། བྱུང་ནས་ཀྱང་ཕྱིར་ལྡོག་པར་འགྱུར་བ་ཡིན་ནོ། །དེ་དག་རྣམས་ཐམས་ཅད་ཀྱང་རྣམ་པར་ཉམས་པར་འགྱུར་བའི་ཆོས་ཅན་གྱི་འདོད་པ་དང་མི་འདོད་པའི་ཆོས་དེ་དག་རྣམས་བསམས་ནས་ཀུན་ཏུ་དགའ་བའི་མཆོག་ཏུ་གྱུར་པས་མི་འདོད་པ་རྣམས་ཀྱིས་རྣམ་པར་ཉམས་པར་མི་འགྱུར་ཞིང་། འདོད་པ་རྣམས་ལ་ཆགས་པར་ཡང་མི་འགྱུར་རོ། །འདས་པ་རྣམས་ལ་ཡང་དྲན་པར་གྱུར་ནས་རྗེས་སུ་འབྲེལ་བར་མི་བྱེད་དོ། །འདས་པ་རྣམས་ཀྱི་རོ་མྱོང་བར་ཡང་མི་བྱེད་དོ། །དེ་ལྟར་ཡིད་ཀྱིས་ཆོས་རྣམས་ལ་ཚུལ་བཞིན་དུ་ཡིད་ལ་བྱེད་པས་མངོན་པར་ཞེན་པར་མི་བྱེད་དོ།