།དུར་ཁྲོད་དུ་ཡང་མེས་སྲེག་པར་བྱེད་པ་འབྱུང་བར་འགྱུར་ཞིང་། ཀུན་ཏུ་དྲངས་ནས་བྱ་རྒོད་དང་འུག་པ་དང་ཅེ་སྤྱང་དང་ཁྭ་ཏ་ལ་སོགས་པ་རྣམས་ཀྱིས་ཀྱང་ཟ་བར་བྱེད་པར་འགྱུར་གྱིས་ཞེས་དེ་ལྟར་སྒོམ་པར་བྱེད་པའི་སྐྱེས་བུ་དམ་པ་དེའི་གཟུགས་དང་བཙན་ཕྱུག་གི་རྒྱགས་པ་གང་ཡིན་པ་འདི་དག་དེས་ཐམས་ཅད་ནས་ཐམས་ཅད་དུ་བྲལ་བར་འགྱུར་བའམ་མགོ་གནོན་པར་འགྱུར་རོ། །གཞན་ཡང་གང་གི་ཚེ་ཇི་ལྟ་ང་ནི་བཟང་པོའི་རིགས་སུ་སྐྱེས་པ་ཡིན་ནོ་ཞེས་དགེ་སྦྱོང་དང་བྲམ་ཟེ་འདི་དག་རྣམས་ལ་རིགས་ཀྱི་རྒྱགས་པ་སྐྱེས་པར་གྱུར་ན། དེའི་ཚེ་གལ་ཏེ་ན་གང་ཁོ་ན་རིགས་ཡིན་པ་ཡང་དག་པ་ཇི་ལྟ་བ་ཁོ་ན་བཞིན་དུ་སོ་སོར་རྟོག་པར་བྱེད་དེ། དོན་དམ་པར་ན་རིགས་ནི་ཡོད་པ་མ་ཡིན་གྱི། ཀུན་ཏུ་བརྟགས་པ་འབའ་ཞིག་ཙམ་ཁོ་ན་ལ་བྱིས་པ་རྣམས་ཀྱིས་འདི་དག་ཏུ་གོ་བར་ཟད་དོ། །ཇི་ལྟར་རིགས་འདི་དག་རྣམས་ནི་རིགས་མེད་པ་ཡིན་ཏེ་རྒྱུ་མེད་པའི་ཕྱིར་རོ། །དེ་བཞིན་དུ་རུས་ཀྱང་མེད་པ་ཡིན་ནོ། །དགེ་བའི་རྒྱུ་རྣམས་ཀྱིས་གཞན་ཉིད་ཁོ་ན་རིགས་ཡིན་ནོ། །གང་དག་ཞེ་ན། འདི་ལྟ་སྟེ། གང་ལ་བདེན་པ་དང་ཚུལ་ཁྲིམས་དང་སྦྱིན་པ་དང་ཤེས་རབ་དང་རབ་ཏུ་ཞི་བ་དང་དུལ་བའི་ཡོན་ཏན་རྣམས་ཡིན་ནོ། །གང་དག་རིགས་ངན་པར་གྱུར་ན་ཡང་ཆེན་པོའི་རིགས་སུ་ལེགས་པར་སྐྱེས་པ་ཡིན་ནོ། །རྒྱུ་གང་གི་ཕྱིར་ཡོན་ཏན་རིགས་ཡིན་པའི་ཕྱིར་དང་སྐྱེ་བ་ནི་རྒྱུ་མཚན་མ་ཡིན་པའི་ཕྱིར་རོ། །དེ་ལྟ་བས་ན་དགེ་སྦྱོང་ངམ་བྲམ་ཟེའམ་དེའི་རིགས་ཅན་གཞན་དག་རྣམས་ཀྱིས་ཀྱང་དེ་ལྟར་སྐྱེ་བ་དང་རིགས་དང་བཙན་ཕྱུག་གིས་རྒྱགས་པར་མི་བྱའོ། །གཞན་ཡང་དེའི་ཚེ་ན་དགེ་སྦྱོང་ངམ་བྲམ་ཟེའམ་དེ་དག་གི་རིགས་ཅན་གཞན་རྣམས་ཀྱིས་ཀྱང་གཟུགས་གང་ཡིན་པ་དེ་ཁོ་ན་ཡང་དག་པ་ཇི་ལྟ་བར་རྣམ་པ་གཞན་གྱི་སྒོ་ནས་སོ་སོར་རྟོག་པར་བྱེད་དོ། །ཇི་ལྟར་བདག་གི་གཟུགས་འདི་ནི་ཇི་ལྟ་བུའི་རྣམ་པར་བདག་བྱིས་པ་ཕྱིས་རྒན་ན་ཉལ་བར་གྱུར་པའི་རྣམ་པ་དེ་ལྟ་བུ་ནི་གོག་འགྲོས་བྱེད་པར་གྱུར་པ་ན་མ་ཡིན་ལ། གོག་འགྲོས་བྱེད་པའི་རྣམ་པ་དེ་ལྟ་བུ་ནི་ཇི་སྲིད་གཙུག་པུད་བཞག་པ་ན་མ་ཡིན་ཏེ། གཙུག་པུད་ཀྱི་དེ་ལྟར་ནི་ཇི་སྲིད་དུ་ལང་ཚོ་ལ་བབ་པའི་བདག་གི་གཟུགས་འབྱུང་བར་མི་འགྱུར་རོ། །