།བག་མེད་པས་ནི་གང་བའི་སེམས། །ཡུལ་རྣམས་ཀྱིས་ནི་འཕེལ་བར་བྱེད། །སྐྱེས་བུ་མྱུར་དུ་གཞོམ་པ་ནི། །དམྱལ་དང་ཡི་དགས་རིགས་རྣམས་ལ། །སྡུག་བསྔལ་ལ་སོགས་བདེན་པ་ཡང་། །གང་ཚེ་ཤེས་པས་རྟོགས་པ་ཡི། །དེ་ཚེ་སྐྱེས་བུ་བླ་མེད་ཀྱིས། །བདེ་ལེགས་ཤིས་པའི་གནས་ཐོབ་འགྱུར། །སྐྱོན་རྣམས་རྩད་ནས་གདོན་པ་དང་། །ཡོན་ཏན་སྤེལ་ལ་ཀུན་ཏུ་སྤྱོད། །སྡིག་པའི་གྲོགས་པོ་མི་བྱ་ཞིང་། །ལེ་ལོ་ཅན་ཁ་ཕྱིར་ཕྱོགས་ཀྱིས་། །བརྩོན་འགྲུས་བརྩམས་ཤིང་དྲན་དང་ལྡན། །དགེ་སྦྱོང་ཤེས་རབ་དཔུང་གཉེན་ཅན། །རྒ་དང་འཆི་བ་སྤངས་པ་ཡི། །བླ་ན་མེད་པའི་གནས་སུ་འགྲོ། །དབང་པོ་དང་ནི་དབང་དོན་ཡང་། །གང་ཚེ་དེ་ཉིད་ཁོ་ན་རིག །དེ་ཚེ་ཤེས་རབ་ལ་བརྟེན་ནས། །སྲིད་པའི་རྒྱ་མཚོ་ལས་རྒལ་ལོ། །ང་རྒྱལ་ཅན་དང་ལེ་ལོ་ཅན། །ཐམས་ཅད་ལ་ནི་རྟག་དོགས་ཅན། །ཁེངས་དང་སྡིག་བློ་ཅན་རྣམས་ནི། །མཁས་པས་གྲོགས་པོ་བྱ་བ་མིན། །ཤིན་ཏུ་བརྩོན་ལྡན་རང་བཞིན་འཇམ། །ཆོས་ལ་གནས་དང་སྐྱོན་སྤངས་པ། །ཡང་དག་ལྟ་དང་རྩབ་ཧྲལ་མེད། །གྲོགས་པོར་བསྟེན་གྱིས་མཛེས་པ་ཡིན། །སྡིག་ཅན་གྲོགས་པོའི་སྣོད་མ་ཡིན། །སྣོད་ནི་བླ་མེད་སྐྱེས་བུ་ཡིན། །བླ་མེད་སྣོད་དུ་བྱས་པ་ན། །སྐྱོན་རྣམས་ཀྱིས་ནི་འཇིགས་པ་མེད། །སྐད་ཅིག་ཐང་ཅིག་ཡུད་ཙམ་དང་། །ཉིན་དང་མཚན་མོ་དེ་བཞིན་དུས། །འཆི་བ་སོམས་དང་བརྟན་པ་རྣམས། །དེ་ལས་བཟློག་ཐབས་མེད་པ་ཡིན། །གང་འདི་འཆི་བ་འབྱུང་བ་ནི། །དྲན་པའི་མཆོག་ཏུ་རབ་ཏུ་བསྔགས། །དེ་བསྟེན་པ་ནི་ཞི་བའི་མཆོག །རྙོག་དང་བྲལ་བར་འགྲོ་བ་ཡིན། །འཆི་བདག་འཇིགས་པ་དྲན་ནས་ནི། །སྐྱོན་ལ་ཇི་ལྟར་ཡིད་རྒྱུག་འགྱུར། །སྐྱོན་མེད་པས་ཀྱང་དྲི་མ་རྣམས། །ཐམས་ཅད་རྟག་ཏུ་ཞི་བར་འགྱུར། །བག་ཡོད་གོ་འཕང་འདི་མཆོག་ཏུ། །དེ་བཞིན་གཤེགས་པ་རྣམས་ཀྱིས་གསུངས། །གང་ཡང་འཆི་བདག་རྟག་དྲན་དང་། །མི་དགེ་རྣམས་ཀྱང་སྤང་བར་གྱིས། །ཞེས་བྱའོ། །དེ་ལྟར་རྨ་བྱ་རྣམས་ཀྱི་མངའ་བདག་དེས་དགའ་ལྡན་གྱི་ལྷ་དེ་དག་རྣམས་དང་འཐབ་བྲལ་བ་དེ་དག་རྣམས་ལ་ཆོས་སྟོན་པར་བྱེད་དོ། །ཆོས་གཞན་ཡང་ཐེག་པ་ཆེན་པོ་ལ་རབ་ཏུ་གནས་པའི་དགེ་སྦྱོང་དང་བྲམ་ཟེ་རྣམས་ལ་གཅེས་པར་གྱུར་པ་ཡོད་དོ།