ཉི་མ་བདུན་གྱིས་ངེས་པ་ཁོ་ནར་ཉེ་བར་སྐམས་པར་འགྱུར་བ་ཡིན་ན། བདག་གི་ལུས་ལ་ལྟ་སྨོས་ཀྱང་ཅི་དགོས་མདོར་བསྡུ་ན་འདོད་པའི་ཁམས་དང་། གཟུགས་ཀྱི་ཁམས་དང་། གཟུགས་མེད་པའི་ཁམས་དང་ཁམས་གསུམ་པོ་དེ་དག་རྣམས་ཐམས་ཅད་ཀྱང་མི་རྟག་པ་དང་མི་བརྟན་པ་དང་ཐེར་ཟུག་མ་ཡིན་པ་དང་ཡོངས་སུ་རྣམ་པར་འགྱུར་བའི་ཆོས་ཅན་ཡིན་ན། བདག་གི་ལུས་དང་སྲོག་ནི་མི་རྟག་པ་དང་མི་བརྟན་པ་དང་ཐེར་ཟུག་མ་ཡིན་པ་དང་། རྣམ་པར་འགྱུར་བའི་ཆོས་ཅན་དུ་འབྱུང་བར་འགྱུར་བ་ལྟ་སྨོས་ཀྱང་ཅི་དགོས། དེ་གང་གི་ཚེ་དེ་ལྟར་རྟག་པར་རྒྱུན་དུ་ཤིན་ཏུ་མཉམ་པར་བཞག་པའི་ཡིད་ཀྱིས་གཅིག་ཏུ་ངེས་པར་དགེ་བ་ཡིད་ལ་བྱེད་པར་གྱུར་པའི་བློས་དེ་དག་སྒོམ་པར་བྱེད་པ་དེའི་ཚེ་འདི་འགའ་ཞིག་ལ་ཡང་མངོན་པར་ཞེན་པར་མི་འགྱུར་རོ། །ཀུན་ཏུ་ཆགས་པ་མེད་པར་གྱུར་པའི་བློས་ནི་འདོད་ཆགས་རྣམས་འགའ་ཞིག་གམ་ཞེ་སྡང་གིས་ཀྱང་འཆིང་བར་མི་འགྱུར་རོ། །དེའི་འདོད་ཆགས་དང་ཞེ་སྡང་དག་རྟག་པར་རབ་ཏུ་བཅོམ་པས་གཏི་མུག་ཀྱང་མེད་པར་འགྱུར་རོ། །དེ་རྣམས་སྐྱོན་མ་ལུས་པ་ལས་གྲོལ་བར་གྱུར་པས་མཆོག་ཏུ་འཆི་བ་མེད་པ་དང་རྒ་བ་མེད་པ་དང་ཟད་པ་མེད་པའི་གོ་འཕང་ཐོབ་པར་འགྱུར་རོ། །དེའི་ཕྱིར་ན་འཆི་བ་རྗེས་སུ་དྲན་པ་དེ་དག་ལ་དམིགས་པར་བྱའོ། །དེའི་ཕྱིར་དྲན་པ་རྣམས་ཐམས་ཅད་ཀྱི་མཆོག་ཏུ་གྱུར་པ་འདི་ནི། འདི་ལྟ་སྟེ། འཆི་བ་རྗེས་སུ་དྲན་པའོ། །གཞན་ཡང་འཆི་བ་རྗེས་སུ་དྲན་པ་སྒོམ་པར་བྱེད་པ་རྣམས་ལ་ཡོན་ཏན་གཞན་ཡང་ཡོད་དོ། །དགེ་སྦྱོང་ངམ་བྲམ་ཟེ་ཡང་རུང་སྟེ། གང་གི་ཚེ་དེ་ཉིད་སྒོམ་པར་བྱེད་པ་དེའི་ཚེ། ལུས་པོ་སྡུག་བསྔལ་གྱི་སྒྲོམ་བུ་ལྟ་བུར་གྱུར་པ་ལ་སོ་སོར་རྟོག་པར་བྱེད་དོ། །ཇི་ལྟར་སྡུག་བསྔལ་རྣམས་རིག་པར་གྱུར་པ་ཡིན་ན། ཇི་ལྟར་བདག་གི་ལུས་འདི་དག་ལ་ལུས་ནི་ནད་རྣམས་ཀྱིས་དང་འཆི་བདག་ཉེ་བར་འོངས་པས་ཀྱང་ཡིད་ཉེ་བར་འཇོམས་པར་འགྱུར་རོ། །འཆི་བདག་གི་ཞགས་པ་དེས་བདག་ཉིད་ཀུན་དུ་བཅིངས་པར་གྱུར་པས་ངས་ཅི་ཞིག་བྱར་ཡོད། །སྦྱིན་པ་དང་ཚུལ་ཁྲིམས་དང་ཤེས་རབ་ཀྱང་བདག་གིས་བསྒོམ་པར་ནི་མི་ནུས་སོ། །དེའི་ཕྱིར་ན་ཇི་སྲིད་དུ་འཆི་བདག་དེ་ཡིད་ལ་འོངས་པར་མ་གྱུར་པ་དེ་སྲིད་དུ་སྦྱིན་པ་དང་ཚུལ་ཁྲིམས་དང་ཤེས་རབ་རྣམས་བསྒོམ་པར་བྱའོ།