།དེས་འཆི་བ་རྗེས་སུ་དྲན་པ་གང་ཡིན་པ་དེ་དེ་ལྟར་བཤད་པ་ན། དེའི་ཚེ་ན་འདིའི་ཡིད་སྐྱོ་བར་གྱུར་པས་ཡུལ་རྣམས་ལ་ཐོག་རྡུངས་སུ་འཇུག་པ་མ་ཡིན་ནོ། །འདོད་ཆགས་དང་ཞེ་སྡང་དང་གཏི་མུག་རྣམས་ཀྱིས་ཀྱང་འཕྲོགས་པར་མི་འགྱུར་རོ། །བུ་དང་ཆུང་མ་དང་རང་གི་སྐྱེ་བོ་རྣམས་ཀྱི་དོན་དུ་མི་དགེ་བའི་ལས་རྣམས་མི་བྱེད་དོ། །འཆི་བའི་འཇིགས་པས་སྐྲག་པར་གྱུར་པའི་ཁྱིམ་པ་རྣམས་ཐམས་ཅད་ཀྱང་ཡིད་རབ་ཏུ་ཞི་བར་འགྱུར་ན། རབ་ཏུ་བྱུང་བ་རྣམས་ལྟ་སྨོས་ཀྱང་ཅི་དགོས། རབ་ཏུ་བྱུང་བ་ཡང་འཆི་བ་རྗེས་སུ་དྲན་པར་བྱེད་པ་ལས་བརྒྱ་ལ་ཞིག་ལ་ཡང་ཚུལ་ཁྲིམས་འཆལ་བར་མི་འགྱུར་རོ། །ཡུལ་རྣམས་ལ་དགའ་བར་མི་འགྱུར་རོ། །ཡུལ་ལྗོངས་རྣམས་སུ་རྒྱུ་བར་མི་བྱེད་དོ། །ལྗོངས་རྣམས་རྒྱུ་བར་བྱེད་པས་ཀྱང་སེམས་རྣམ་པར་གཡེང་བར་བྱེད་པ་ཡིན་པ་དང་། འདུ་འཛི་དེ་དག་རྣམས་ཐམས་ཅད་ཀྱི་རྩ་བར་གྱུར་པ་ཡང་བུད་མེད་ཀྱི་འགྲོ་བ་རྣམས་ཡིན་པ་དང་། ཐམས་ཅད་ཀྱི་ཡང་སྐྱེ་མཆེད་དུ་གྱུར་པ་དེ་ནི་དགེ་སློང་འདིས་སྤོང་བར་བྱེད་དོ། །འཆི་བ་རྗེས་སུ་དྲན་པ་དེ་ལྟར་སེམས་པར་བྱེད་དོ། །ཇི་ལྟར་ལྗོངས་རྒྱུ་བ་ལ་མངོན་པར་དགའ་བ་རྣམས་ཡང་དགེ་བའི་ཆོས་རྣམས་ལས་འགའ་ཞིག་ཀྱང་སེམས་ལ་མེད་ལ། འཆི་བའི་ཡུལ་དང་དུས་སུ་ཡང་དེ་དག་རྣམས་ཐམས་ཅད་བདག་ལ་ཕན་པ་མ་ཡིན་པ་དང་བདེ་བ་མ་ཡིན་པར་འགྱུར་རོ། །གང་གི་ཚེ་བདག་ལ་གྲོག་མ་པ་དང་ཁབ་ལ་སོགས་པའི་རླུང་རྣམས་ཀྱིས་འཆི་བའི་ཡུལ་དང་དུས་སུ་རབ་ཏུ་འདེབས་པར་བྱེད་པ་དེའི་ཚེ་ན་བདག་ལ་སྐྱབས་སམ་སྐྱོབ་པ་གང་ཞིག་འབྱུང་བར་འགྱུར་བ་རང་རང་གི་ལས་ཀྱི་ཞགས་པས་ཀུན་ཏུ་བཅིངས་ནས་འདི་ནས་འཇིག་རྟེན་ཕ་རོལ་ཏུ་འཁྲིད་པར་བྱེད་པ་ན། འདི་ན་མའམ་ཕའམ་སྤུན་ཟླའམ་རང་གི་སྐྱེ་བོའམ་གྲོགས་པོ་དང་གཉེན་བཤེས་ཀྱི་ཚན་པར་གྱུར་པའི་སྐྱབས་མཆི་བའི་ཡུལ་དང་དུས་བྱུང་བར་གྱུར་པ་ནི་མེད་དོ། །དེས་འཆི་བ་རྗེས་སུ་དྲན་པ་ཡང་དེ་ལྟར་སྒོམ་པར་བྱེད་དོ། །དེའི་ཚེ་སྦྱིན་པ་དང་ཚུལ་ཁྲིམས་དང་ཤེས་རབ་རྣམས་ལ་མངོན་པར་དགའ་བར་འགྱུར་རོ། །དེ་ལྟར་ལེགས་པར་བྱེད་པར་གྱུར་པ་དེ་རྣམས་ཀྱི་དགེ་བའི་ལས་མངོན་པར་འཕེལ་བར་འགྱུར་རོ། །མི་དགེ་བའི་ལས་རྣམས་དང་ཡོངས་སུ་འབྲལ་བར་འགྱུར་རོ། །