།ཡེ་ཤེས་བྱམས་པ་བཟོད་དང་དུལ། །གང་ཡང་གྲངས་མེད་འགྱུར་བ་ཡི། །ཐེག་ཆེན་དང་ཡང་ཡང་དག་ལྡན། །ཕ་རོལ་ཕྱིན་དྲུག་ལས་རྒལ་བའི། །དེ་ནི་སངས་རྒྱས་ཡིན་པར་བསྒྲགས། །འདོད་པ་ཡོངས་སུ་སྤོང་བ་གང་། །དེ་དག་ས་གསུམ་སྙིང་པོ་ཡིན། །འདོད་པ་ཐམས་ཅད་ཡོངས་བཏང་བས། །རྟག་ཏུ་བདེ་ཞེས་འདིར་བརྗོད་དོ། །འདོད་པ་རྣམས་ལ་ཆགས་ཡོད་གང་། །དེ་ཡི་སྡུག་བསྔལ་འདི་མདུན་གནས། །དེ་དག་ཉེས་དམིགས་ཤེས་བྱས་ལ། །དེ་ཕྱིར་དེ་དག་ཡོངས་སུ་སྤོངས། །དེ་ལྟར་རྨ་བྱ་རྣམས་ཀྱི་མངའ་བདག་དེས་དགའ་ལྡན་པ་དེ་དག་རྣམས་དང་འཐབ་བྲལ་གྱི་ལྷ་དེ་དག་རྣམས་ལ་ཆོས་སྟོན་པར་བྱེད་དོ། །གཞན་ཡང་རྨ་བྱའི་མངའ་བདག་དེས་ལྷ་དེ་དག་རྣམས་ལ་ཆོས་སྟོན་པར་བྱེད་དེ། ཇི་ལྟར་ཆོས་གཞན་ཡང་ཐེག་པ་ཆེན་པོ་ལ་རབ་ཏུ་གནས་པའི་དགེ་སྦྱོང་དང་བྲམ་ཟེ་རྣམས་ལ་གཅེས་པར་གྱུར་པ་ཡོད་དོ། །འདི་དག་ཀྱང་གང་ཞེ་ན། འདི་ལྟ་སྟེ། སེམས་རྣམ་པར་གཡེང་བ་མེད་པའོ། །སེམས་རྣམ་པར་མི་གཡེང་བའི་དགེ་སློང་ཡང་བློ་ཤིན་ཏུ་མཉམ་པར་བཞག་པ་དང་། གཅིག་ཏུ་ངེས་པར་རྒྱུ་བར་བྱེད་པ་དང་རྟག་ཏུ་ཚངས་པར་སྤྱོད་པ་ལ་མངོན་པར་དགའ་བ་དང་རྟག་ཏུ་བརྩོན་པ་དང་ལྡན་པར་ཡང་འགྱུར་རོ། །བདེ་ལེགས་རྣམས་ཐོབ་པར་འགྱུར་རོ། །ངན་སོང་གི་འཇིགས་པ་རྣམས་ཐམས་ཅད་ལས་ཀྱང་གྲོལ་བར་འགྱུར་རོ། །གཅིག་པུ་དགའ་བའི་དགེ་སློང་ནི་དབང་པོ་དྲུག་ལེགས་པར་བསྡམས་པ་དང་ཡུལ་རྣམས་ཐམས་ཅད་ཡོངས་སུ་སྤངས་པ་དང་། འཁོར་བའི་འཇིགས་པ་རྣམས་ཀྱིས་སྐྲག་པར་གྱུར་པས་དགེ་བའི་ཆོས་རྣམས་ཐམས་ཅད་ཡོངས་སུ་སྤོང་བར་མི་བྱེད་པ་དང་། མི་དགེ་བ་རྣམས་ཐམས་ཅད་ཡོངས་སུ་སྤོང་བར་བྱེད་པ་དང་། རྟག་པ་ཉིད་དུ་ཡང་བདེ་བར་རྒྱུ་བར་འགྱུར་རོ། །གང་དག་གི་བློ་རྣམ་པར་གཡེང་བར་མ་གྱུར་པ་རྣམས་ནི་སྒྲ་དང་། རེག་བྱ་དང་། རོ་དང་། གཟུགས་དང་། དྲི་རྣམས་ལ་རྟག་པ་ཁོ་ནར་ཡང་དེའི་སེམས་མཉམ་པར་བཞག་པར་འགྱུར་རོ། །དེའི་སེམས་མཉམ་པར་བཞག་པའི་ཕྱིར་ན་དགེ་བའི་ཆོས་རྣམས་མངོན་པར་འཕེལ་བར་འགྱུར་རོ། །དེ་དག་རྣམས་ཉིད་ལ་དགའ་བར་འགྱུར་རོ། །འཁོར་བ་ལ་ནི་དགའ་བར་འགྱུར་བ་མ་ཡིན་ནོ།