།རང་དང་གཞན་ལ་ཕན་པ་ལ་རབ་ཏུ་ཞུགས་པའི་ཆོས་ཀྱི་ལམ་དེ་དག་རྣམས་ལྷ་དེ་དག་གི་དྲུང་ནས་ཐོས་པར་གྱུར་ནས། སླར་ཉིད་ཀྱང་རྨ་བྱའི་བདག་པོ་དེས་ལྷ་དེ་དག་རྣམས་ཐམས་ཅད་ཉིད་ཀྱང་སེམས་རྩེ་གཅིག་ཏུ་གྱུར་པས་ཇི་ལྟ་བ་བཞིན་དུ་ཆོས་ཉན་པར་བྱེད་པའི་ལྷ་དེ་དག་རྣམས་ཀྱི་ཡིད་དེ་དག་ཀྱང་ཀུན་ཏུ་རྟོགས་པས། བདག་གིས་ཕྱིར་ཞིང་ཉིད་ཀྱང་ཆེས་རབ་ཏུ་རངས་པར་གྱུར་པའི་ཡིད་དུ་གྱུར་པས་སླར་ཉིད་ཀྱང་དེ་དག་རྣམས་ལ་བསྟན་པར་བྱའོ། །དེ་ནས་ཕྱིར་ཡང་སེམས་རྟོགས་ནས་སླར་ཡང་ཆོས་དེ་ཉིད་རྣམ་པ་དུ་མ་རྣམས་སུ་སྒྲ་དབྱངས་བརྟན་ཞིང་རྒྱ་ཆེ་བ་དང་མཆོག་ཏུ་སྙན་པར་གྱུར་པ་དང་། གཞན་ལ་ཕན་པ་ལ་རབ་ཏུ་ཞུགས་པའི་སྙན་པས་སྟོན་པར་བྱེད་དེ། ཀྱེ་ཧེ་ལྷ་དག་གཞན་ཡང་ཐེག་པ་ཆེན་པོ་ལ་རབ་ཏུ་གནས་པའི་དགེ་སྦྱོང་ངམ་བྲམ་ཟེའམ་དེ་དག་དང་འདྲ་བ་རྣམས་ཀྱིས་ཆོས་ཡིད་ལ་བྱ་ཞིང་། དེ་ལ་རབ་ཏུ་བརྩོན་པས་ཀྱང་འཇིགས་པར་བྱའོ། །འདི་ཡང་གང་ཞེ་ན། འདི་ལྟ་སྟེ། གྲགས་པ་མ་ཡིན་པས་འཇིགས་པ་ཉིད་དོ། །གྲགས་པ་མ་ཡིན་པས་འཇིགས་པའི་དགེ་སློང་ནི་གཅིག་ཏུ་ངེས་པའི་བློར་འགྱུར་རོ། །དེ་སྐྱོན་འདི་དག་རྣམས་གྲགས་པ་མ་ཡིན་པ་ལ་འཇིགས་པས་སྤོང་བར་བྱེད་དེ། ཇི་ལྟར་རྩབ་ཧྲལ་ཅན་གྱི་བུད་མེད་ཀྱི་སྐྱོན་གྱི་དྲི་མ་ཕལ་ཆེ་བར་གྱུར་པའི་ཁྱིམ་དུ་འཇུག་པར་མི་བྱེད་ཅིང་འདྲེ་བར་ཡང་མི་བྱེད་དོ། །ཆང་འཚོང་དང་ལྷན་ཅིག་ཀུན་བརྗོད་པར་མི་བྱེད་ཅིང་མི་སྲུན་པ་རྣམས་དང་མ་ཡིན་ནོ། །རྐུན་མ་དང་ཡང་མ་ཡིན་ལ་སྡིག་པ་བྱེད་པ་རྣམས་དང་མ་ཡིན་ནོ། །རྒོད་བག་ཅན་དང་མ་ཡིན་ཞིང་ཀུན་ཏུ་འགྱེད་པ་རྣམས་དང་ཡང་མ་ཡིན་ནོ། །རྟགས་གཞན་པ་རྣམས་དང་རྟགས་གཞན་པ་ལ་སོ་སོར་འབྲང་བ་རྣམས་དང་མ་ཡིན་ནོ། །ཆོ་ལོ་བ་རྣམས་དང་མ་ཡིན་ཞིང་རྟོག་མི་རྣམས་དང་ཡང་མ་ཡིན་ནོ། །བྱིས་པ་དང་མ་ཡིན་ཞིང་བུད་མེད་ཀྱིས་འཚོ་བ་རྣམས་དང་ཡང་མ་ཡིན་ནོ། །རྐོ་ཏྲོག་ཅན་རྣམས་དང་མ་ཡིན་ཞིང་ཁ་མི་འཚམ་པ་རྣམས་དང་མ་ཡིན་ནོ། །ཤིན་ཏུ་བརྐམ་ཆགས་ཅན་རྣམས་དང་མ་ཡིན་ཞིང་འཇལ་བ་ལ་སྒྱུ་བྱེད་པས་སླུ་བ་རྣམས་དང་ཡང་མ་ཡིན་ནོ། །འཇིག་རྟེན་པ་རྣམས་དང་འགལ་བར་གྱུར་པའི་ཚོང་པ་དང་མ་ཡིན་ཞིང་ཆུ་ཀླུང་གི་ངོས་ལ་བཅོམ་ནས་སྒྲོལ་བ་རྣམས་དང་མ་ཡིན་ནོ།