།དེ་ལ་གང་དམྱལ་བ་མྱོང་བར་འགྱུར་བ་དང་ཡི་དགས་དང་དུད་འགྲོའི་འགྲོ་བ་མྱོང་བར་འགྱུར་བ་དང་ལན་གྲངས་གཞན་ལ་མྱོང་བར་འགྱུར་བ་རྣམས་སེམས་ཀྱིས་རྣམ་པར་འགྱོད་པར་བྱེད་པ་དང་། གཉེན་པོ་དཀར་པོའི་ཆོས་རྣམས་ཀྱིས་ཉེ་བར་བཅོམ་པའི་དབང་གིས་ཀྱང་རྣམ་པ་ཐམས་ཅད་དུ་མི་འགྱུར་བའམ། ཉམས་སྨོད་པར་བྱེད་པའམ་ལས་དེ་ཉིད་ཀྱིས་གང་ཆེས་སྡུག་བསྔལ་བའི་དུད་འགྲོའི་སྐྱེ་གནས་སོ་སོར་རབ་ཏུ་མྱོང་བར་འགྱུར་བ་ཡང་རུང་སྟེ། ཉེས་པར་བྱས་པ་དེ་བཤགས་པ་ལས་ལངས་པས་སམ། ཆོས་ཤིན་ཏུ་དཀར་བར་གྱུར་པའི་ལེགས་པར་བྱས་པའི་ལས་རྣམས་ཀྱིས་ཀྱང་། གང་དུད་འགྲོར་ཚེ་རིང་པོར་འཚེད་པར་བྱེད་པ་རྣམས་ཉེ་བར་བཅོམ་པས་དེ་ཚེ་ཐུང་ངུ་དང་སྡུག་བསྔལ་ཆུང་བར་ཡོངས་སུ་འཚེད་པའམ་ཐམས་ཅད་དུ་མེད་པར་བྱེད་དོ། །དེ་ལ་རྒྱུ་བ་འདི་དང་མཚན་མ་འདི་དག་གིས་ལས་དང་འབྲས་བུ་ལ་དད་པ་དང་ལྡན་པ་ཉིད་དུ་བྱའོ། །དགེ་སྦྱོང་ངམ་བྲམ་ཟེའམ་དེ་དག་དང་འདྲ་བར་གྱུར་པ་གཞན་རྣམས་ཀྱང་རུང་སྟེ། གང་ཡང་ལས་དང་འབྲས་བུ་ལ་དད་པ་དང་ལྡན་པ་དེ་ནི། ཆུ་ཀླུང་གི་ངོས་དང་བཅས་ནས་ཚད་ཡོད་པར་འཁོར་བ་ན་འཁོར་བ་ཡིན་ནོ། །དེ་ཅིའི་ཕྱིར་ཞེ་ན། གང་འགྲོ་བ་ལྔ་ན་དགེ་བ་དང་མི་དགེ་བའི་ལས་རྣམས་ཀྱིས་མ་བསྐྱེད་པའི་འབྲས་བུར་གྱུར་པ་གང་ཡིན་པའི་སྐྱེ་བ་ནི་ཅུང་ཟད་ཅིག་ཀྱང་ཡོད་པ་མ་ཡིན་ནོ། །དེའི་ཕྱིར་དེ་ཁོ་ན་བཞིན་དུ་སྐྱེས་བུའི་སྙིང་པོ་ནི་གང་ལས་དང་འབྲས་བུ་ལ་དད་པ་དང་ལྡན་པ་ཞེས་བྱ་བ་ཡིན་ཏེ། སྲོག་ཆགས་རྣམས་ནི་ཐམས་ཅད་ཀྱང་ལས་རྣམས་ཐམས་ཅད་ཀྱི་འབྲས་བུའི་བགོ་སྐལ་ལ་སྤྱོད་པ་ཡིན་ནོ། །དེའི་ཕྱིར་ན་བུད་མེད་དམ་སྐྱེས་པ་རྣམས་ཀྱིས་ཀྱང་རུང་སྟེ། ཐམས་ཅད་ཀྱིས་ཀྱང་རབ་ཏུ་བརྩོན་པས་ཉིན་མོ་དང་མཚན་མོར་ཡང་བདག་ཉིད་ཐམས་ཅད་ཀྱིས་ལས་དང་འབྲས་བུ་ལ་དད་པའི་སྟོབས་བསྐྱེད་པར་བྱའོ། །འདིར་རེ་ཞིག་འཁོར་བའི་སྲོག་ཆགས་རྣམས་ལ་དེ་དག་སྙིང་པོར་གྱུར་པའོ། །ཆོས་གཞན་ཡང་དགེ་སྦྱོང་ངམ་བྲམ་ཟེའམ་གཞན་ཡང་དེ་དང་རང་བཞིན་མཚུངས་པ་རྣམས་ཀྱིས་ཡིད་ལ་བྱའོ། །འདི་ཡང་གང་ཞེ་ན། འདི་ལྟ་སྟེ་མི་གནས་པས་ཉེ་བར་བཅོམ་པ་ཉིད་དོ།