དབང་པོ་དུལ་བ་རྣམས་ཀྱིས་རྗེས་སུ་སྟེན་པར་བྱེད་པ་ནི། རི་ཁྲོད་དང་རིའི་ཕུག་དང་བླ་གབ་མེད་པ་དག་ཏུ་རྒྱུ་བ་དང་། རྟག་ཏུ་ཡང་སྟོང་པ་ཉིད་དང་མཚན་མ་མེད་པ་དང་སྨོན་པ་མེད་པ་ལ་གནས་པར་གྱུར་པ་འདི་ནི་རབ་ཏུ་རྟེན་པ་བདུན་པ་ཡིན་ནོ། །དེ་ལྟར་ན་དགེ་སློང་གིས་རྣམ་པར་འཇོམས་པ་དང་། འཆིང་བ་རྣམས་ཐམས་ཅད་ལས་རྣམ་པར་གྲོལ་བར་ཡང་འགྱུར་རོ། །དེ་ནས་དེའི་དུས་འདིར་རྨ་བྱའི་མངའ་བདག་གིས་ཚིགས་སུ་བཅད་པ་གཞན་དག་བསྙད་པ། ཇི་ལྟར། ཇི་བཞིན་རབ་ཏུ་རྟེན་སྤྱོད་ལྡན། །ཡེ་ཤེས་སྤྱོད་ཡུལ་རྟེན་པའོ། །འཁོར་བའི་སྐྱོན་གྱིས་འཇིགས་པ་ཡི། །རབ་ཏུ་བྱུང་བ་འབྲས་བཅས་འདོད། །བསླབ་པའི་གཞི་ནི་ཉམས་མེད་དང་། །སྔོན་བདེ་བ་ལ་ཡང་སྤྲོ་མེད། །ཕུང་པོའི་རྒྱུན་གྱིས་འཇིགས་པ་ཡི། །ནགས་སུ་བསྟེན་པ་འབྲས་དང་ལྡན། །ངག་འཇམ་པ་དང་ཞི་བ་དང་། །མྱ་ངན་འདས་ལའང་ཁ་ཕྱོགས་པ། །ལུས་ནི་ཚུལ་ཁྲིམས་ཀྱིས་བརྒྱན་པའི། །རབ་ཏུ་བྱུང་བ་འབྲས་བཅས་འདོད། །བདག་གི་དངོས་དང་གཞན་དངོས་ལ། །གང་གི་བློ་ནི་རྨོངས་མེད་པ། །ལས་ཀྱི་རྣམ་པར་སྨིན་པས་མིན། །ལམ་དང་ལམ་མིན་དེ་བཞིན་ཉིད། །བདེ་དང་སྡུག་བསྔལ་འཇིགས་པ་དང་། །སྒྲིབ་པ་དང་ཡང་མི་ལྡན་ལ། །ཁྱིམ་གྱི་ཞགས་པ་རྣམ་གྲོལ་བས། །སྡུག་བསྔལ་ཉིད་ན་གནས་པ་མིན། །དེ་ལྟར་རབ་ཏུ་རྟེན་པའི་ཡོན་ཏན་རྣམ་པ་དུ་མ་རྣམས་སུ་རྨ་བྱའི་མངའ་བདག་འདིས་ལྷ་དེ་དག་རྣམས་ལ་བརྗོད་དེ་ལྷ་དེ་དག་རྣམས་སླར་ཡང་དད་པ་སྐྱེད་པར་བྱེད་པའི་ཕྱིར་རོ། །དེའི་ཚེ་ལྷ་དེ་དག་རྣམས་ཐམས་ཅད་ཀྱང་ཆོས་འདུལ་བ་རྣམ་པ་དུ་མར་བརྗོད་པར་གྱུར་པ་ན་མཉམ་པར་གཞག་པའི་རྣ་བའི་བུག་པས་ཉན་པར་བྱེད་དོ། །དེ་ནས་གཞན་ཡང་རྨ་བྱའི་མངའ་བདག་དེ་སྤྲོ་བ་ལྡོག་པ་མེད་པར་གྱུར་པས་སླར་ཡང་ཆོས་དེ་ཉིད་སྟོན་པར་བྱེད་དེ། འཐབ་བྲལ་གྱི་ལྷ་དེ་དག་རྣམས་དང་ཀུན་ཏུ་ལྷགས་པར་གྱུར་པའི་དགའ་ལྡན་གྱི་ལྷ་དེ་དག་རྣམས་ལ་དམ་པའི་ཆོས་སྒྲོགས་པ་ལ་གུས་པས་ཕྱིར་ཡང་རྨ་བྱའི་བདག་པོ་དེ་ཉིད་ཀྱིས་ཆོས་སྟོན་པར་བྱེད་དོ།