སེམས་ཅན་ཐམས་ཅད་ལ་སྙིང་རྗེ་དང་ལྡན་པས་དུད་འགྲོ་རྣམས་ལ་སྙིང་རྗེ་སྐྱེད་པར་གྱུར་ཅིང་། ཤིན་ཏུ་ཉེས་པར་སྤྱོད་པའི་ལས་ཀྱི་འབྲས་བུའི་ས་པ་རྣམས་མཆོག་ཏུ་སྡུག་བསྔལ་བ་མཆོག་ཏུ་རྩུབ་པར་གྱུར་པའི་འགྲོ་བ་གསུམ་པོ་རྣམས་ལ་སྙིང་རྗེ་བསྐྱེད་ནས་འདོད་པ་ན་སྤྱོད་པའི་ལྷ་དྲུག་པོ་རྣམས་ཀྱི་དབང་དུ་བྱས་ནས་སྙིང་རྗེ་བསྐྱེད་པར་བྱའོ། །ལྷ་རྣམས་ཀྱིས་ཀྱང་རི་དང་སྨན་ལྗོངས་རྣམས་ལ་དང་ནགས་དང་ཉེ་བའི་ནགས་རྣམས་ལ་ཡང་དཔེ་མེད་པའི་མཐོ་རིས་བདེ་བ་རྣམ་པ་དུ་མ་རྣམས་ཉེ་བར་ལོངས་སྤྱོད་ཅིང་པད་མའི་རྫིང་བུ་དང་ནགས་རྣམས་ལ་བུད་མེད་དང་ལྷན་ཅིག་ཏུ་རྩེ་དགའ་བརྒྱ་སྟོང་ཉེ་བར་ལོངས་སྤྱད་ནས་ལས་ཟད་པར་གྱུར་པ་ན་འཆི་འཕོ་བའི་སྡུག་བསྔལ་འབྱུང་ངོ་། །དེའི་རྗེས་ཐོགས་ལ་དམྱལ་བ་དང་ཡི་དགས་དང་དུད་འགྲོ་རྣམས་སུ་སྐྱེ་བར་འགྱུར་རོ། །དེའི་ཕྱིར་ན་འཁོར་བ་འདིར་ཤིན་ཏུ་ཐོ་བཙམས་པར་གྱུར་པ་དག་སྲོག་ཆགས་རྣམས་ཀྱིས་ཉེ་བར་ལོངས་སྤྱོད་པར་བྱེད་དེ། སྲེད་པའི་འཆིང་བ་རྣམས་ཀྱིས་ཤིན་ཏུ་དམ་པར་བཅིངས་ནས་སྔོན་གྱི་མཐའ་དང་ཕྱི་མའི་མཐའ་རྣམས་སུ་ཀུན་ཏུ་རྒྱུག་པར་བྱེད་ཀྱང་། འདི་དག་གིས་ལམ་དམ་པ་ཚོལ་བར་བྱེད་པ་ཡང་མ་ཡིན་ནོ། །དེ་ལྟར་ལྷ་རྣམས་ལ་ཡང་འཆི་འཕོ་བའི་སྡུག་བསྔལ་རྣམས་ལ་ཉེ་བར་དམིགས་ནས་སྙིང་རྗེ་སྐྱེད་པར་བྱེད་དོ། །དེ་བཞིན་དུ་མི་རྣམས་ལ་ཡང་སྙིང་རྗེ་སྟེ། རྣམ་པ་སྣ་ཚོགས་པའི་ལམ་གྱི་འབྲས་བུར་སྐྱེས་པ་རྣམས་དམན་པ་དང་བར་མ་དང་ཁྱད་པར་དུ་འཕགས་པའི་བདེ་བ་དང་སྡུག་བསྔལ་གྱི་འབྲས་བུ་དག་ཉེ་བར་ལོངས་སྤྱོད་པར་བྱེད་པ་རྣམས་དམན་པ་དང་བར་མ་དང་ཁྱད་པར་དུ་འཕགས་པའི་ལས་ལ་ཉེ་བར་ཞུགས་པ་རྣམས་སྤྱོད་པ་དང་རབ་ཏུ་རྒྱུ་བར་སྣ་ཚོགས་པ་དང་བསམ་པ་དང་མོས་པ་སྣ་ཚོགས་པ་དང་དབུལ་བས་གཟིར་བ་རྣམས། སྐྱབས་མེད་པ་རྣམས་གཞན་གྱིས་ཟིལ་གྱིས་མནན་པས་ཤིན་ཏུ་ཡང་གཟིར་བར་གྱུར་པ་རྣམས་ཡོངས་སུ་ཚོལ་བའི་སྡུག་བསྔལ་གྱི་མཆོག་ཏུ་ཡོངས་སུ་ལོངས་སྤྱོད་པར་བྱེད་པའི་མིའི་འཇིག་རྟེན་དེ་མངོན་པར་མཐོང་ནས་སྙིང་རྗེ་སྐྱེད་པར་བྱེད་དོ། །འདི་ཡང་མཆོག་ཏུ་དགའ་བར་གྱུར་པ་དང་མྱ་ངན་ལས་འདས་པའི་ཐར་བར་འགྱུར་བའི་ཆོས་ཡིན་ནོ།