ཐོ་བ་དང་ཟངས་ཀྱི་ཁུ་བ་དམར་པོ་དང་གཏུན་ཤིང་དང་ཆུ་ཀླུང་རབ་མེད་དུ་བྱ་རྒོད་དང་བྱ་རོག་གིས་འདྲེན་པར་བྱེད་པ་དང་། ནགས་ཚལ་རལ་གྲི་ལོ་མར་འཇུག་པར་བྱེད་པ་དང་། འགྱུར་བྱེད་ཀྱི་ཆུ་ཀླུང་ལ་སོགས་པའི་ཚོར་བ་དྲག་པོ་རྩུབ་པ་དཔེ་མེད་པ་རྣམས་ཀྱིས། ཡང་སོས་དང་ཐིག་ནག་དང་བསྡུས་འཇོམས་དང་ངུ་འབོད་དང་ངུ་འབོད་ཆེན་པོ་དང་ཚ་བ་དང་རབ་ཏུ་ཚ་བ་དང་མནར་མེད་པའི་མཐར་ཐུག་པའི་ཉེ་འཁོར་གྱི་དམྱལ་བ་རྣམས་དང་། དམྱལ་བ་བརྒྱ་སུམ་ཅུ་རྩ་དྲུག་གི་བརྒྱ་ཕྲག་རྣམས་ལ་འཚེད་པར་བྱེད་གཤག་པར་བྱེད་འབྱེད་པར་བྱེད་འཆུར་བར་བྱེད་དེ། རང་གི་ལས་ཀྱིས་བསླུས་པ་ལས་ཀྱི་ཞགས་པས་བཟུང་བར་གྱུར་པ་སྲེད་པའི་མེས་ཡོངས་སུ་གང་བའི་ཕྱིར། སྐྱོབ་པར་བྱེད་པ་རྗེས་སུ་ཚོལ་བ་དང་སྐྱབས་རྩད་གཅོད་པར་གྱུར་པས་ཐམས་ཅད་དུ་ཀུན་ནས་རྒྱུག་པར་བྱེད་པ་རྣམས་ལ་འདི་ལྟར་སེམས་བསྐྱེད་པར་བྱ་སྟེ། ཅིས་འདི་དག་རྣམས་བདེ་བར་འགྱུར། ཇི་ལྟར་ན་སྐྱབས་སུ་འགྱུར་བ་ཡིན་ན། གང་གི་ཚེ་འདི་དག་རྣམས་ཀྱི་མཆོག་ཏུ་རྩུབ་པའི་སྡུག་བསྔལ་གྱི་རྒྱ་མཚོ་ཆེན་པོ་ལས་བདག་གིས་སྒྲོལ་བར་བྱེད་པར་འགྱུར་ཏེ། སེམས་ཅན་དེ་དག་ལ་དེ་ལྟར་སྙིང་རྗེ་བར་བྱེད་དོ། །སྙིང་རྗེ་དང་ལྡན་པ་དེ་ཡང་གང་གི་ཚེ་ཤི་བར་གྱུར་པ་དེའི་ཚེ་ལྷ་རྣམས་ཀྱི་མངའ་བདག་ཏུ་འགྱུར་རོ། །མི་རྣམས་ཀྱི་ཡང་སྟེ་འཁོར་ལོས་སྒྱུར་བའི་རྒྱལ་པོར་འགྱུར་རོ། །སེམས་ཅན་རྣམས་ཐམས་ཅད་ལ་ཡང་འདོད་པ་དང་སྡུག་པ་དང་ཡིད་དུ་འོང་བ་དང་དགེ་བའི་ཆོས་རྣམས་ལ་རྗེས་སུ་དགའ་བར་ཡང་འགྱུར་རོ། །དེ་ལྟར་དམྱལ་བར་གྱུར་པའི་སེམས་ཅན་རྣམས་ཀྱི་གཟེར་ཟུག་དེ་དང་དེ་དག་རྣམས་དམིགས་ཏེ་སྙིང་རྗེ་བསྐྱེད་པར་བྱའོ། །དེ་ལྟར་ན་མང་དུ་ཆེན་པོར་གྱུར་པ་དང་རྣམ་པ་དུ་མ་རྣམས་སུ་ཡང་ཚངས་པའི་བསོད་ནམས་མངོན་པར་འཕེལ་བར་འགྱུར་རོ། །གཞན་ཡང་ཐེག་པ་ཆེན་པོ་ལ་རབ་ཏུ་གནས་པའི་བྱང་ཆུབ་སེམས་དཔར་གྱུར་པ་དགེ་སྦྱོང་ངམ་བྲམ་ཟེའམ་བློ་དེ་དག་དང་མཚུངས་པར་གྱུར་པ་གཞན་ཡང་རུང་སྟེ། བསྐུལ་བའི་བློས་སེམས་ཅན་རྣམས་ལ་ཕན་པ་ལ་གཅིག་ཏུ་མངོན་པར་དགའ་བས།