།ཐམས་ཅད་དུ་ནི་ཡོངས་སུ་སྤངས། །འཇིགས་པ་ལྔ་པོ་འདི་ཡིས་གང་། །དང་པོར་འཇིག་རྟེན་འདི་གསོད་པ། །རྒ་དང་ན་དང་འཆི་བ་དང་། །རྣམ་པར་འབྲལ་དང་གང་གི་ལས། །དེ་ལྟར་རི་གཙུག་ན་ནོར་བུ་ཞེས་བྱ་བའི་བྱ་ནི་རྣམ་པར་བཀྲ་བ། གཙང་བ་དག་གི་རྨ་བྱའི་རྒྱལ་པོ་བྱང་ཆུབ་སེམས་དཔའི་ལྷན་ཅིག་ཏུ་སྤྱོད་པ་དང་གཉི་གའི་ཡང་སྨོན་ལམ་གྱི་དབང་གིས་རྨ་བྱའི་སྐྱེ་གནས་སུ་སྐྱེས་པར་གྱུར་པ་ཡིན་ནོ། །དེ་དག་ཀྱང་རྨ་བྱ་རྣམས་དང་འཐབ་བྲལ་གྱི་ལྷ་རྣམས་ལ་བག་མེད་པ་དང་བྲལ་བར་བྱ་བའི་དོན་དུ་ཆོས་སྟོན་པར་བྱེད་དོ། །དེ་ནས་ལྷ་དེས་སྔ་ན་མེད་པའི་ལྷ་དེ་དག་མངོན་པར་མཐོང་བར་གྱུར་པས། སླར་ཉིད་ཀྱང་ཆེས་མཆོག་ཏུ་དགའ་བར་གྱུར་པའི་ཡིད་ཀྱིས་ལེགས་པར་བཤད་པ་དེ་དག་རྣམས་ལ་བརྩི་བགྲང་མ་བྱས་པར་བག་མེད་པའི་དབང་གིས། རབ་ཏུ་རྩེ་བར་བྱེད་པ་དང་གར་བྱེད་པ་དང་རྒོད་པར་ཡང་བྱེད་ཅིང་རྔ་སྐད་ཡན་ལག་ལྔ་དང་ལྡན་པ་རྣམས་ཀྱིས་རྣམ་པ་དུ་མར་དགའ་བར་བྱེད་དེ། དཔེ་མེད་པའི་ནགས་དང་ཉེ་བའི་ནགས་རྣམས་དང་རི་དང་རིའི་ལྗོངས་རིན་པོ་ཆེ་ཀུན་ཏུ་འབར་བའི་འོད་ཟེར་གསལ་བར་སྣང་བ་རྣམས་དང་དཔག་བསམ་གྱི་ཤིང་གི་ནགས་རྣམས་དང་ལྡན་པ་རྣམས་དང་དགའ་བའི་བྱ་དང་ལྡན་པ་རྣམས་དང་རིའི་ཆུ་ཀླུང་བརྒྱ་ཕྲག་དང་ལྡན་པ་རྣམས་དང་པད་མའི་ནགས་དང་ལྡན་པ་རྣམས་ལ་ལྷན་ཅིག་སྤྱོད་པ་རྣམས་དང་བཅས་ཤིང་འདོད་པ་རྣམས་ཐམས་ཅད་ཕུན་སུམ་ཚོགས་པ་ལྷ་རྫས་ཀྱི་བདེ་བ་རྣམས་དང་ལྡན་པས་རྣམ་པ་དུ་མར་ལྷ་རྣམས་རྩེ་དགའ་བར་བྱེད་དོ། །དེ་ལྟར་རྩེ་བར་གྱུར་པའི་ལྷ་དེ་རྣམས་རིམ་གྱིས་ནོར་བུའི་ཆ་ཤས་རྣམ་པར་བཀྲ་བ་ཞེས་བྱ་བའི་རི་དེ་ལ་འཁོད་དོ། །རི་དེ་ལ་ཡང་དཔག་བསམ་གྱི་ཤིང་གི་ནགས་རིན་པོ་ཆེ་བདུན་གྱི་རང་བཞིན་གྱི་ཤིང་རྣམས་ཀྱིས་ཉེ་བར་མཛེས་པར་གྱུར་པ་སྟེ། དཔག་ཚད་ལྔ་བརྒྱ་ཡོད་པ་ཡིན་ནོ། །ནགས་ཆེན་པོ་དེ་ནི་ཤིན་ཏུ་བཀྲ་བས་རྣམ་པར་བཀྲ་བར་གྱུར་པའི་རྨ་བྱའི་རྒྱལ་པོ་རབ་ཏུ་གནས་པས། བག་མེད་པ་དང་བྲལ་བར་བྱ་བའི་དོན་དུ་ལྷ་རྣམས་ལ་ཆོས་སྟོན་པར་བྱེད་དོ། །ལྷ་རྣམས་ཀྱང་ཆོས་ལ་རྗེས་སུ་འཇུག་པར་བྱ་བའི་དོན་དུ་ཡང་སྟོན་པར་ཆེད་ཆེར་བྱེད་དོ།