།བག་མེད་པའི་ས་རྣམས་ལས་སླར་ཡང་རབ་ཏུ་སྤེལ་བར་མི་འགྱུར་བའི་ཕྱིར་ན་རྣམ་པ་དུ་མར་རྒྱུ་བའི་ལྷ་རྣམས་དང་། འཐབ་བྲལ་བ་རྣམས་ཀྱི་བདག་པོ་དང་དུས་བཟངས་དེ་དང་སྨྲ་བ་པོའི་ངང་པ་དེ་དག་རྣམས་དང་གཞན་ཉིད་ཀྱང་ཆོས་ཀྱི་གཏམ་རྣམ་པ་དུ་མ་རྣམས་བྱེད་དོ། །དེ་དག་རྣམས་ན་ཇི་ལྟར་བདུད་ཀྱི་རིགས་རྣམས་ཀུན་ནས་བྲལ་བ་དང་དོན་མེད་པ་རྣམས་ཐམས་ཅད་ཀྱི་རྩ་བར་གྱུར་པ་བག་མེད་པ་དེ་ཀུན་ནས་སོང་བས་ན། ལྷ་རྣམས་དང་བྱ་དེ་དག་རྣམས་བྱ་བ་བྱས་པ་བཞིན་དུ་རྣམ་པར་གནས་སོ། །དེ་ནས་དེ་ལྟ་དེ་ལྟར་བརྗོད་ནས་དེ་དག་ལས་ལྷ་གང་དག་རྩེད་མོས་ཡིད་བྲེལ་བར་གྱུར་པ་དེ་དག་རྣམས་ནི་རབ་ཏུ་དགའ་བས་རྩེ་བར་བྱེད་དེ། སྐྱེད་མོས་ཚལ་དང་ཁང་བཟངས་དང་ཀུན་དགའ་ར་བ་དང་ནགས་དང་ཉེ་བའི་ནགས་ཀྱི་ཡུལ་དེ་དག་རྣམས་སུ་ཉེ་བར་སོང་ནས་རྩེ་བར་འགྱུར་རོ། །གང་འཐབ་བྲལ་བ་རྣམས་ཀྱི་བདག་པོ་དེ་དུས་བཟངས་དང་ལྷན་ཅིག་ཏུ་བརྗོད་པ་དང་ལྡན་པའི་ངང་པ་རྣམས་དང་རྒྱུ་བར་བྱེད་དོ། །དེ་ནས་འཐབ་བྲལ་བ་རྣམས་ཀྱི་བདག་པོ་དེ་ལྷ་དེ་དག་རྣམས་མངོན་པར་མཐོང་ནས་དུས་བཟངས་ལ་སྨྲས་པ། ཇི་ལྟར་ཉེ་བར་གནས་པའི་ལྷ་གང་ཡིན་པ་འདི་དག་རྣམས་ནི་རྩེད་མོའི་གཞན་དབང་དུ་སོང་ནས་བག་མེད་པ་ཡིན་པས་བདག་ཅག་ཀྱང་གང་ན་ནགས་དང་ཉེ་བའི་ནགས་རབ་ཏུ་ཞི་བར་ཡོད་པར་འགྲོ་བར་བྱའོ། །དེ་ལྟར་རིག་ནས་ནམ་མཁའི་ཁམས་སུ་འཕགས་པར་གྱུར་ཏོ། །ལྷ་བག་མེད་པར་སྤྱོད་པ་དེ་དག་ཀྱང་འདོད་པའི་ཡོན་ཏན་ལྔ་དང་ཡང་དག་པར་ལྡན་པའི་ནགས་དང་ཉེ་བའི་ནགས་དང་རྫིང་བུ་རྣམས་ལ་ཇི་སྲིད་དུ་འདོད་པ་སྡུག་པ་ཡིད་དུ་འོང་བའི་ལས་བྱས་ཤིང་བསགས་པའི་ལས་ཟད་པར་མ་གྱུར་པ་དེ་སྲིད་དུ་རྩེ་དགའ་བར་བྱེད་དོ། །གང་གི་ཚེ་ཟད་པར་གྱུར་པ་དེའི་ཚེ་རང་གིས་བྱས་པའི་ཟས་བཟང་པོ་རྣམས་ཟོས་ནས་སླར་ཉིད་ཀྱང་དམྱལ་བ་དང་ཡི་དགས་དང་དུད་འགྲོ་རྣམས་སུ་སྐྱེའོ། །གང་ཡང་མི་རྣམས་དང་སྐལ་བ་འཐུན་པར་གྱུར་པ་མིར་སྐྱེས་པར་གྱུར་ན། དེ་མཆོག་ཏུ་ཕུན་སུམ་ཚོགས་པ་དང་། མཆོག་ཏུ་རྒྱ་ཆེ་བར་ཡང་འགྱུར་ཏེ། རྒྱལ་པོ་རྣམས་སམ་རྒྱལ་པོའི་བློན་པོ་རྣམས་སུ་གྱུར་ནས། སྐྱེ་བོ་ཐམས་ཅད་དགའ་བ་དང་མཆོག་ཏུ་སྐྱིད་པ་དང་ལས་དེའི་རྒྱུ་འཐུན་པས་ཡུལ་གྱི་མི་རྣམས་ཐམས་ཅད་བྱམས་པར་འགྱུར་རོ།