།དེ་ནས་དེའི་ཚེ་འཐབ་བྲལ་བ་རྣམས་ཀྱི་བདག་པོ་མུ་སུ་ལུན་དྷ་དེས་ཚིགས་སུ་བཅད་པ་རྣམས་བརྗོད་པ། ཇི་ལྟར། རྒས་པས་མནན་ནས་གཉེར་མས་གང་། །རྗུད་པ་དབྱུག་པ་ལག་ན་ཐོགས། །གང་ཞིག་མཆོག་ཏུ་ཆོས་མི་སྤེལ། །དེ་ནི་བག་མེད་བྱེད་པས་ཡིན། །ལུས་རྣམས་ནད་ཀྱིས་ཞིག་པ་དང་། །མལ་སྟན་སྤྱོད་ལ་ཆེད་ཆེར་བྱེད། །ཤིན་ཏུ་སྐྱོ་བར་མི་འགྱུར་བ། །དེ་དག་གཏི་མུག་འདི་ཡི་འབྲས། །བཀྲེས་པའི་སྲེད་པས་འཇིགས་མཐོང་བར། །གང་དེ་འོག་གི་གནས་སུ་འགྲོ། །སླར་ཡང་སྐྱོ་བ་མི་སྐྱེ་བ། །བག་མེད་བྱེད་པས་དེ་བྱས་སོ། །མི་རྣམས་སྡུག་པ་དང་བྲལ་བའི། །སྙིང་ལ་སྡུག་བསྔལ་གང་སྐྱེ་བ། །དེ་ནི་བག་མེད་སྟེན་པ་ལས། །ཡིན་པར་དེ་བཞིན་གཤེགས་པས་གསུངས། །སྡུག་བསྔལ་གང་དག་འགྲོ་བ་ལྔར། །དུ་མ་རྣམས་ནི་ལོངས་སྤྱོད་པ། །བག་མེད་པ་ཡི་སྲོག་ཆགས་ཀྱི། །རྟག་ཏུ་དེ་དག་རྨོངས་པས་བྱས། །སྐྱེ་དགུ་འཁོར་བར་རྨོངས་པ་རྣམས། །ཀྱེ་མ་ཀྱི་ཧུད་སྐྱོ་བ་སྐྱེ། །ལས་ཀྱི་འཁོར་ལོ་ཆེན་པོ་ཡིས། །འཁོར་བར་འགྱུར་བ་ཡང་དང་ཡང་། །རྙོག་པ་མེད་པར་གང་བརྟགས་པའི། །བདེ་དེ་སྲིད་པ་གསུམ་ན་མེད། །དེ་ལྟ་ན་ཡང་ཀུན་རྨོངས་པས། །ངེས་པར་བྱིས་རྣམས་སྐྱོ་མི་འགྱུར། །ཡུལ་དགའ་བ་ལ་ཞེན་པ་ཡི། །རྨི་ལམ་བཞིན་དུ་འདི་དག་གཡོ། །འགྲོ་འདི་ཐམས་ཅད་སྡུག་བསྔལ་བ། །མིག་མེད་པས་ཀྱང་མ་མཐོང་ངོ་། །གང་ལ་ཕྱིར་བཅོས་ཐབས་མེད་པའི། །འཆི་བདག་འཇིགས་པར་སྲེད་པས་འགྱུར། །དེ་ལྟ་ན་ཡང་ཀུན་རྨོངས་པས། །བག་མེད་པས་ནི་མི་རྣམས་བཅོམ། །ཚུལ་བཞིན་མ་ཡིན་ཡིད་བྱེད་པས། །སེམས་ནི་རྣམ་པར་གཡེང་བྱས་པའི། །འཆི་བདག་རྒྱལ་པོས་འདྲེན་པ་ན། །འཇིག་རྟེན་པས་ཀྱང་གོ་བ་མིན། །ནོར་རྣམས་དང་ནི་བུ་དག་དང་། །ཤིན་ཏུ་སྡུག་པའི་སྲོག་ཀྱང་ནི། །གསོན་པ་དེ་ནི་འཕྲོག་བྱེད་པས། །འཆི་བདག་རྒྱལ་པོ་འདི་ཡིས་འདྲེན། །བག་མེད་མྱུ་གུ་ལས་བྱུང་བའི། །གང་གིས་སྐྱེ་དགུ་འདི་འཇོམས་པའི། །འཇིག་རྟེན་དོན་མིན་ཡང་གསུམ་སྟེ། །ནད་དང་རྒ་དང་འཆི་བའོ།