།དེ་བཞིན་དུ་འཁྲི་ཤིང་གི་ཁང་པ་གཞན་དག་ཀྱང་བཻ་ཌཱུརྱའི་རང་བཞིན་གྱི་ཡལ་ག་རྣམས་ཀྱིས་རྣམ་པར་བརྒྱན་པ། ཨིན་དྲ་ནཱི་ལ་ཆེན་པོའི་འདབ་མ་རྣམས་ཀྱིས་ལེགས་པར་གཡོགས་པ་རབ་ཀྱི་མཆོག་གི་ནོར་བུ་མདོག་རྣམ་པར་བཀྲ་བ་རྣམས་ཀྱིས་བརྒྱན་པ་ལ་བྱ་རྣམས་ཀྱིས་ཀུན་དུ་སྟེན་པར་བྱེད་པ་རྣམས་ནགས་དེ་འཇམ་པ་མནན་ན་ནེམ་ལ་བཏེག་ན་འཕར་བའི་ས་གཞིའི་ཆ་ཤས་ལེགས་པར་ཕྱེ་བ་རྣམས་དང་། ལྷ་རྫས་ཀྱི་དྲི་རྣམས་ཀྱིས་བསྒོས་པ་ལྷའི་བུ་མོའི་ཚོགས་རྣམས་དང་བཅས་པ་མཐོང་བར་གྱུར་ཏོ། །དེ་བཞིན་དུ་གནས་གཞན་དག་རྣམས་ཀྱང་མཐོང་བར་གྱུར་པ་ལ་ལྷ་གསར་དུ་སྐྱེས་པ་དེས། གང་འགའ་ཞིག་སྔར་མ་མཐོང་བ་སའི་རྣམ་པའི་ཆ་ཀུན་ཡང་ཡོངས་སུ་ཚོགས་པ་བཞིན་དུ་ལྷ་རྫས་ཀྱི་ཁ་དོག་གི་རིན་པོ་ཆེ་བདུན་གྱི་རང་བཞིན་རྣམས་ཀྱིས་ལེགས་པར་རྣམ་པར་གཡོགས་པ། ཤིན་ཏུ་དགའ་བ་དང་ལེགས་པར་མཉམ་པའི་ས་ཕྱོགས་ཀྱི་ཆ་མཆོག་ཏུ་དགའ་བ་རྣམས་ཕྱི་བཞིན་རྗེས་སུ་འབྲང་བའི་འཁོར་དང་བཅས་པ་རྣམས་མཆོག་ཏུ་ངོ་མཚར་བས་རྣམ་པར་གཡེངས་པའི་མིག་གིས་མཐོང་བར་འགྱུར་རོ། །ནགས་དེར་ལྷ་དེས་གང་དག་ཁོ་ན་མཐོང་བར་གྱུར་པ་དེ་དག་ཁོ་ན་འདོད་པ་སྡུག་པ་ཡིད་དུ་འོང་བ་མཐོང་བར་འགྱུར་རོ། །གང་དག་ཁོ་ན་ཐོས་པ་དེ་དག་ཉིད་འདོད་པ་སྡུག་པ་ཡིད་དུ་འོང་བ་ཡིད་མངོན་པར་དགའ་བ་རྣམས་ཐོས་པར་འགྱུར་རོ། །དེས་གང་དང་གང་ཉིད་སྣོམ་པར་བྱེད་པ་ན་དེ་དང་དེ་ཉིད་འདོད་པ་དགའ་བ་ཡིད་དུ་འོང་བ་རྣམས་སྣོམ་པར་བྱེད་དོ། །རྣམ་པ་དུ་མ་དེ་དག་རྣམས་ལས་དེས་གང་ཁོ་ན་སེམས་པར་བྱེད་པ་དེ་དག་ཉིད་འདོད་པ་དགའ་བ་ཡིད་དུ་འོང་བ་རྣམས་མྱོང་བར་བྱེད་པ་ཡིན་ནོ། །རབ་ཀྱི་ཕུལ་གྱི་ལྷ་རྫས་ཀྱི་རོའི་རོ་གཅིག་ཕུན་སུམ་ཚོགས་པ་ལས་ཀྱང་། དེ་གང་ཁོ་ན་ཉན་པར་བྱེད་པ་དེ་དང་དེ་ཉིད་རྣམ་པ་དུ་མར་དགའ་བ་ཡིད་དུ་འོང་བ་རྣམས་ཐོས་པར་འགྱུར་རོ། །དེ་གང་དང་གང་ལ་རེག་པར་བྱེད་པའམ། གང་དང་གང་ཉིད་སེམས་པར་བྱེད་པ་དེ་དང་དེ་ཉིད་འདོད་པ་དགའ་བ་ཡིད་དུ་འོང་བ་རྣམས་འདིའི་སེམས་བསྐྱེད་པ་དང་དུས་གཅིག་ཁོ་ནར་འདི་ལ་ཕུན་སུམ་ཚོགས་པར་འགྱུར་རོ། །དེ་ལྟར་འདི་འདོད་པ་རྣམས་ཐམས་ཅད་ཀྱི་འཆིང་བས་བཅིངས་ནས་རབ་ཏུ་རྒྱ་ཆེ་བའི་བདེ་བ་དང་ལྡན་པ་ནི།