།ལེགས་པར་གསོན་པ་དེ་ཡིན་ཏེ། །གང་གི་ཡིད་ལ་ཆོས་གནས་པའོ། །ཆོས་དང་རྣམ་པར་བྲལ་བ་ཡི། །གསོན་པ་གསོན་པར་འདོད་པ་མིན། །གང་གིས་ཡིད་ལ་སངས་རྒྱས་གནས། །དེ་ནི་ལེགས་པར་གསོན་པ་ཡིན། །སངས་རྒྱས་དང་ནི་རྣམ་བྲལ་བའི། །གསོན་པ་གསོན་པ་མིན་པར་འདོད། །གང་གི་ཡིད་ལ་ཆོས་གནས་པ། །དེ་ནི་ལེགས་པར་གསོན་པ་ཡིན། །ཆོས་དང་རྣམ་པར་བྲལ་བ་ཡི། །གསོན་པ་གསོན་པ་མིན་པར་འདོད། །གང་གི་ཡིད་ལ་དགེ་འདུན་གནས། །དེ་ནི་ལེགས་པར་གསོན་པ་ཡིན། །དགེ་འདུན་རྣམ་པར་སྤངས་པ་ཡི། །གསོན་པ་གསོན་པ་མིན་པར་འདོད། །གང་ཞིག་བདེན་པ་ལ་གནས་ཡིད། །དེ་ནི་ལེགས་པར་གསོན་པ་ཡིན། །བདེན་པ་རྣམ་པར་སྤངས་པ་ཡི། །གསོན་པ་གསོན་པ་མིན་པར་འདོད། །གང་ཞིག་ཡིད་ནི་ལམ་ལ་གནས། །དེ་ནི་བདེ་བར་འཚོ་བ་ཡིན། །ལམ་ནི་རྣམ་པར་སྤངས་པ་ཡི། །གསོན་པ་གསོན་པ་མིན་པར་འདོད། །མྱ་ངན་འདས་པར་འགྲོ་བ་ལ། །གང་གི་བློ་ནི་རྟག་ཏུ་གནས། །དེ་ནི་ལྷ་ཡི་ལྷ་ཞེས་བརྗོད། །འདི་ན་གང་རྩེ་ལྷ་མ་ཡིན། །རྟག་ཏུ་སེམས་ནི་རྩེ་གཅིག་པས། །བསམ་གཏན་བྱེད་པས་རྩེ་འགྱུར་གང་། །དེ་ནི་བདེ་ལྡན་ཆགས་བྱེད་པའི། །སྲིད་པའི་རྩེད་མོ་རྩེད་མོ་མིན། །རྨོངས་ཆགས་མང་དུ་ཉེར་རྩེ་བའི། །སྲིད་སྐྱོན་འདི་རྣམས་གོ་གྱིས་ལ། །མྱ་ངན་འདས་ལ་བརྩོན་པར་གྱིས། །དེ་དག་སྙིང་པོ་དམ་པར་འདོད། །དེ་ལྟར་འཐབ་བྲལ་གྱི་བདག་པོ་དེས་རྣམ་པ་དུ་མར་གཞན་རྣམས་ལ་ཕན་པ་སྒྲུབ་པར་བྱེད་དེ། ལྷ་དེ་དག་རྣམས་ཀྱི་ཡིད་དེ་དག་རླན་པར་བྱེད་དོ། །ཇི་ལྟར་འཐབ་བྲལ་གྱི་ལྷ་དེ་དག་རྣམས་ངན་སོང་དུ་འགྲོ་བར་མི་འགྱུར་བར་བྱེད་དོ། །དེ་ནས་འཐབ་བྲལ་གྱི་ལྷ་དེ་དག་རྣམས་ཀྱིས་མུ་སུ་ལུན་དྷ་ལ་འདི་སྐད་ཅེས་བརྗོད་དོ། །ཀྱེ་འཐབ་བྲལ་བ་རྣམས་ཀྱི་བདག་པོ་ཇི་ལྟ་བ་བཞིན་གོ་ལགས་ཀྱིས། ཇི་ལྟར་ཁྱོད་ཀྱིས་བཤད་པ་དེ་དག་རྣམས་ཐམས་ཅད་ནི་བདེན་པ་ལགས་ཏེ། བདག་ཅག་གིས་འདིར་མངོན་སུམ་དུ་བགྱིས་སོ། །ཇི་ལྟར་བདག་ཅག་རྣམས་ཀྱི་དྲུང་ན་རིམ་པ་རྣམས་ཐམས་ཅད་ཀྱིས་གླགས་པར་གྱུར་པའི་ལྷ་རྣམས་བཟོད་པར་དཀའ་བའི་ཤིན་ཏུ་སྡུག་བསྔལ་བར་གྱུར་ཏོ།