གཟུགས་དག་སྟོབས་ཉམས་པར་བྱེད་པ་པོ་ཁ་དྲག་པའི་སྐྱེས་གནས་ལུས་ཀྱི་རྒྱབ་ཀྱི་སྒལ་ཚིགས་སྒུ་བར་བྱེད་པ། སྐྲ་རྣམས་གཟུགས་མི་འདྲ་བར་བྱེད་པ། འཆི་བར་འགྱུར་བའི་དང་པོའི་ཕོ་ཉ་བཀྲེན་པའི་སྐྱེས་གནས་ལུས་དང་། དབང་པོ་དང་། ཡིད་རྣམས་རྒུད་པར་བྱེད་པ་སྟེ། མི་རྣམས་གསོན་པ་ཉིད་ན། དེ་དག་གིས་སྐྱེ་བ་གཞན་ཉིད་དུ་ཁྲིད་པར་བྱེད་པ་ཡིན་ནོ། །ཀྱེ་ལྷ་དག་དེ་ལ་འདི་ནི་མིའི་འཇིག་རྟེན་དུ་མི་རྣམས་ལ་མིང་དང་གཟུགས་གཉིས་ལ་ཅོ་འདྲི་བར་བྱེད་པར་གྱུར་པ་ཡིན་ཏེ། ངེས་པར་མྱོང་བར་འགྱུར་བ་ཡིན་གྱིས་དུས་རིང་དུ་ཁྱེད་ཀྱིས་ཡོངས་སུ་གཞིགས་དང་། ཁྱེད་ཅག་གིས་རྟོགས་པར་གྱུར་ནས་སྡུག་བསྔལ་བར་མི་འགྱུར་བ་དེ་དག་རྣམས་ནི་ངེས་པར་སེམས་མེད་པ་ཡིན་ཏེ། ཤིང་དང་རྡོ་བ་དང་མཚུངས་པ་ཡིད་དང་བྲལ་བར་གྱུར་པ་དང་མིའི་གཟུགས་བརྙན་གྱི་དུད་འགྲོ་རྣམས་ཡིན་ནོ། །ཀྱེ་ཧེ་ལྷ་དག་དེ་ལས་གཞན་མི་རྣམས་ཀྱི་མིའི་འཇིག་རྟེན་ན་སྡུག་བསྔལ་ཆེན་པོར་གྱུར་པ་ནི་སྐྱེ་བའི་སྡུག་བསྔལ་ཞེས་བྱ་བ་ཡིན་ཏེ། སྐྱེ་བ་ཉིད་ལས་རྒས་པར་འགྱུར་བའི་སྡུག་བསྔལ་འདི་ཡིན་པར་རིག་པར་གྱིས་ལ་ཁྱེད་རྣམས་སྲིད་པ་ལ་མངོན་པར་ཞེན་པར་མ་བྱེད་དང་། ཀྱེ་ཧེ་ལྷ་དག་གཞན་ཡང་རྣམ་པ་མང་པོ་རྣམས་སུ་དང་བཟོད་པར་དཀའ་བ་དུ་མ་རྣམས་སུ་ཡང་ཤིན་ཏུ་སྡུག་བསྔལ་སྐྱེ་བ་ནས་སྐྱེ་བ་རྣམས་སུ་འགྱུར་རོ། །དེ་དག་ཀྱང་གང་ཞེ་ན་འདི་ལྟ་སྟེ། འཆི་བའི་སྡུག་བསྔལ་ཞེས་བྱ་བ་སྐྱེ་བ་དེ་དག་ཏུ་སླར་མི་ལྡོག་པ། ལུས་དང་དབང་པོ་དང་སྐྱེ་མཆེད་རྣམས་འགག་པར་བྱེད་པ་སྲོག་གི་དབང་པོ་དང་སྐྱེ་མཆེད་རྣམས་རྣམ་པར་འཇིག་པ་རང་གི་སྐྱེ་བོ་དང་གྲོགས་པོ་དང་གཉེན་འབྲེལ་རྣམས་དང་ཕྱིས་མི་འཕྲད་པར་འགྱུར་བ་སྐལ་བ་འཐུན་པ་རྣམས་རླག་པར་བྱེད་པ། སྐྱེ་བ་གཞན་དུ་འགྲོ་བར་གྱུར་པས་རང་གི་ལས་ཀྱི་འབྲས་བུའི་ལམ་རྣམས་ཟ་བར་བྱེད་པའི་སྐྱེས་བུ་ཚེ་མཐར་ཐུག་པ་ན་ལུས་གཏོང་བ་ནི་སེམས་ཅན་རྣམས་ཀྱིས་ངེས་པར་མྱོང་བར་གྱུར་པ་ཡིན་ནོ། །དེའི་རྗེས་ཐོགས་ལ་སྲིད་པ་བར་མ་དོ་བར་སྐྱེ་བར་འགྱུར་བ་འདི་ནི་འཆི་བ་ཞེས་བརྗོད་དེ། ཀྱེ་ལྷ་དག་དེ་ལ་དེ་དག་ནི་ཅི་ནས་ཀྱང་ཉམས་སུ་མྱོང་བར་འགྱུར་བ་ནི་སྐྱེ་བ་ཡིན་པ་གང་གི་ཕྱིར་ཐམས་ཅད་ལ་འཆི་བ་ངེས་པར་འབྱུང་བ་ཡིན་ནོ།