རིའི་མཆོག་ལ་ཀུན་ཏུ་འཛེག་པ་དང་བྱེས་སུ་འགྲོ་བ་དང་འགྲོ་བ་ན་གཡོག་བྱེད་པ་ལ་སོགས་པ་ཀུན་ཏུ་དུབ་པ་རྣམས། གང་ཞིག་འདི་དག་རྣམས་བྱེད་པ་དེ་དག་གི་ཚོལ་ཁྲོ་འདི་དག་རྣམས་ཐམས་ཅད་ཕལ་ཆེར་ནི་ནོར་རྫས་དང་བཟའ་རྒྱུ་དང་གོས་རྣམས་ཀྱི་དོན་དུ་ཡིན་ཏེ། དབུལ་ཞིང་ཕོངས་པས་དངོས་སུ་མནར་བའི་ཕྱིར་དང་། སྲེད་པས་ཟིལ་གྱིས་མནན་པར་གྱུར་པའི་མི་རྣམས་ཀྱིས་བྱས་སོ། །དང་པོ་སྐྱེས་པར་གྱུར་པ་ནས་བཟུང་ནས་ཇི་སྲིད་དུ་འཆི་བདག་གི་སྲེད་པའི་ཞགས་པས་ཟིལ་གྱིས་མ་མནན་གྱི་བར་དུ་བྱ་བ་མ་ཡིན་པ་གཞན་རྣམས་ཀྱང་བྱེད་དོ། །དེ་གཞན་གྱི་བསམ་པ་རྗེས་སུ་ཚོལ་བ་དང་མངོན་པར་འཚེ་བ་དང་འཇལ་བ་ལ་གཡོ་བྱེད་པ་དང་ཁྱིམ་ལ་གཡོ་བྱེད་པ་དང་། ཆང་འཚོང་བ་དང་ཏིལ་འཚོང་བ་དང་མི་རིགས་པའི་སྦྱོར་བ་རྣམས་ཀྱི་སྙེད་པ་ཡུལ་འཁོར་འཇིག་པར་བྱེད་པ་དང་། རྒྱལ་སྲིད་རླག་པར་བྱེད་པའི་ཡུལ་རྣམས་འཇོམས་པར་བྱེད་པ་དང་། ཡུལ་ལྗོངས་རྣམས་འཇོམས་པ་དང་འདི་དག་དང་གཞན་ཡང་གང་དག་རྣམ་པ་སྣ་ཚོགས་པའི་བྱ་བ་མ་ཡིན་པ་རྣམས་མིའི་འཇིག་རྟེན་པའི་མི་རྣམས་ཀྱིས་བྱེད་པ་ནི་བུ་དང་བུ་མོ་དང་བགོ་བར་བྱ་བ་དང་བཟའ་བར་བྱ་བ་དང་སྐོམ་རྣམས་ཀྱི་དོན་དུ་ཡིན་ནོ། །འདི་ནི་ཡོངས་སུ་ཚོལ་བའི་སྡུག་བསྔལ་ཞེས་བརྗོད་དོ། །གང་དག་བརྒྱ་ཕྲག་སྟོང་དུ་གྱུར་པའི་རྣམ་པ་དུ་མ་རྣམས་སུ་ཡང་ལོ་སྟོང་གིས་ཀྱང་བརྗོད་པར་ཡང་སླ་བ་མ་ཡིན་ནོ། །ལྷ་དག་དེ་ལ་དེ་དག་རྣམས་ནི་མི་རྣམས་ཀྱི་སྡུག་བསྔལ་གྱི་ཕུལ་དུ་ཕྱིན་པ་ཡིན་ནོ། །དེ་ལྟར་འཐབ་བྲལ་གྱི་བདག་པོ་དེ་ལྷ་དེ་དག་རྣམས་ལ་ཕན་པར་བྱ་བའི་དོན་དུ་སྲིད་པ་ལ་ངེས་པར་སྐྱོ་བར་བྱེད་པ་དང་ངེས་པར་འབྱུང་བར་འགྱུར་བའི་ཆོས་སྟོན་པར་བྱེད་དོ། །ཇི་ལྟར་ལྷ་འདི་དག་རྣམས་ནི་མི་དག་འདོད་པའི་བློ་སྐྱེ་བར་འགྱུར་ཏེ། དེས་ན་སྲིད་པ་ལ་མངོན་པར་སྲེད་པའི་བློ་ཅན་རྣམས་ལ་ཕན་པར་བྱ་བ་གང་གི་ཕྱིར་མངོན་པར་འཇུག་པར་བྱེད་པ་ཡིན་ནོ། །དེ་ལ་རྒྱུ་མཚན་འདི་དག་གིས་མི་རྣམས་ཀྱི་ཉེ་བར་འཚོ་བ་ཐམས་ཅད་སྟོན་པར་བྱེད་པ་ཡིན་ཏེ། ཇི་ལྟར་དེ་ལ་དེ་དག་རྣམས་སུ་སྐྱེ་བར་མ་བྱེད་ཅིག །དེ་དག་རྣམས་ནི་སྡིག་པའི་ཚོལ་ཁྲོས་ཟིལ་གྱིས་མནན་པ་རྣམས་ཀྱི་ཡིན་གྱི། དེ་གཅིག་པུ་མངོན་པར་དགའ་བའི་ཡིད་ནི་འབྱུང་བར་མི་འགྱུར་རོ།