དེ་ལྟར་གཟིར་བར་བྱེད་པ་མནར་བའི་མཆོག་ཏུ་ཕྱིན་པ་ལ་ཡང་གོ་སྐབས་ཡེ་མེད་པ་སྐབས་མེད་པ་རྣམ་པར་ཁྲོ་བར་བྱེད་པ་ན་ཡང་སྤུངས་མེད་པ། གཅིན་དང་རྟུག་པའི་ཕུང་པོ་ཆེན་པོའི་ནང་དུ་བྱིང་བར་གྱུར་པ་རྣམས་ཀྱི་སྡུག་བསྔལ་ཆེན་པོ་རྣམ་པ་དུ་མ་རྣམས་ཡོད་དོ། །དེ་ལ་འདི་ནི་གཞན་གཉིས་པ་ཡིན་ཏེ། བདེ་འགྲོ་བ་རྣམས་ཀྱང་དེ་འདྲ་ན་དམྱལ་བ་དང་ཡི་དགས་དང་དུད་འགྲོ་རྣམས་ལྟ་སྨོས་ཀྱང་ཅི་དགོས། གཞན་ཡང་སྡུག་བསྔལ་གསུམ་པ་ཡོད་དེ། དེའི་རྗེས་ཐོགས་ལ་གལ་ཏེ་མངལ་ནས་འབྱུང་བར་འགྱུར་བ་ན་མའི་སྐྱེ་གནས་ཀྱི་བུག་པའི་ཟུར་མ་མིག་ནས་གཟིར་བར་གྱུར་པ་ནི། ཇི་ལྟར་བུ་རམ་གྱི་ཤིང་འཁྲུལ་མིག་གི་བུ་གུ་ནས་འབྱུང་བ་ན་བཙིར་བར་གྱུར་པས་འབྱུང་བར་འགྱུར་བ་དེ་བཞིན་དུ་མངལ་གྱི་དེ་ཡང་མའི་སྐྱེ་གནས་ཀྱི་བུ་ག་ནས་ཀུན་དུ་འབྱུང་བ་ཡིན་ནོ། །དེ་ལ་འདི་ནི་མངལ་ནས་སྐྱེ་བ་སྟེ་སྡུག་བསྔལ་གཞན་ཡིན་ནོ། །དེ་དག་གི་རྗེས་ཐོགས་ལ་སྡུག་བསྔལ་བཞི་པ་ཡོད་དེ། མར་སར་པ་དང་ཆུ་ཤིང་གི་ལོ་མ་ལྟར་ཤིན་ཏུ་འཇམ་པར་གྱུར་པའི་ལུས་རབ་ཏུ་སྨིན་པ་གཞོན་ཤ་ཅན་གྱི་དཔེར་གྱུར་པའི་ལུས་དང་ལྡན་པ་རྣམས་གང་གི་ཚེ་བཙས་པ་ན་མ་མས་རྩུབ་པ་དང་རོད་རོད་པོ་དང་རྡོལ་བ་དང་མདོག་ངན་པ་དང་ལས་སུ་མི་རུང་བ་དང་རིད་པ་དང་། བར་མིག་ཅན་མཐུག་པ་དང་རྩེ་མོ་དང་སྒྲ་མི་སྙན་པ་དག་གི་ལག་པ་གཉིས་ཀྱིས་ལེན་པར་བྱེད་པ་དེའི་ཚེ་ཇི་ལྟར་མེས་སྲེག་པར་བྱེད་པའམ། རལ་གྲིས་གཏུབ་པར་བྱེད་པ་དེ་བཞིན་དུ་ཤིན་ཏུ་འཇམ་པའི་ཕྱིར་ན་འདི་ལ་ཡང་ཟུག་གཟེར་སྐྱེད་དོ། །དེའི་ལུས་ཤིན་ཏུ་འཇམ་པོར་གྱུར་པ་འདི་གལ་ཏེ་དང་པོར་གོས་འཇམ་པོ་རྣམས་བསྐོན་པར་གྱུར་ཀྱང་དེ་དག་རྣམས་ནི་ཇི་ལྟར་བསླངས་པ་དང་མཐུག་པ་དང་རྩུབ་པ་དང་རྡོལ་བ་དང་རབ་ཏུ་རྙིངས་པ་དང་བཙེམས་པ་དང་བསྐུམས་པ་རྣམས་ཀྱི་ནང་དུ་ལུས་བཅུག་པ་བཞིན་དུ་འགྱུར་རོ། །གྲང་བའི་དུས་སུ་འདི་ཡང་ཤིན་ཏུ་གྲང་བར་འགྱུར་ཏེ། བཙས་པ་ན་ཁྱིམ་གང་ཡིན་པར་ནི་གྲང་བས་ཤིན་ཏུ་ཡང་ཉེན་པར་འགྱུར་རོ། །དེ་བཞིན་དུ་ཚད་པའི་དུས་སུ་ཚད་པ་ཤིན་ཏུ་སྟོབས་ཆེ་བར་འགྱུར་ཏེ། གང་གིས་ཤིན་ཏུ་སྲེག་པར་བྱེད་པ་སྦྱིན་པ་དམན་པ་ཉིད་ཀྱི་ཕྱིར་ན་མནར་བར་འགྱུར་རོ། །ནང་དུ་ཡང་བསྲེགས་པས་སྡུག་བསྔལ་གྱིས་མའི་སྐྱེ་གནས་ནས་འབྱུང་བར་འགྱུར་རོ།