།རྐྱེན་གྱི་དབང་གིས་བྱུང་བ་རྣམས་ཀྱང་ཡོངས་སུ་སྤོང་བར་བྱེད་དོ། །དེ་དག་གི་དབང་དུ་འགྲོ་བར་མི་འགྱུར་རོ། །དམྱལ་བ་དང་ཡི་དགས་དང་བྱོལ་སོང་རྣམས་སུ་དེ་དག་སྐྱེའོ། །དེ་ལ་ཀྱེ་ཧོ་ལྷ་རྣམས་འགྲོ་བ་གསུམ་པོ་རྣམས་ངན་སོང་ཞེས་མངོན་པར་བརྗོད་དོ། །ལྷ་དང་མིའི་འགྲོ་བ་གཉིས་པོ་ནི་བདེ་འགྲོ་ཞེས་མངོན་པར་བརྗོད་དོ། །དེ་དག་རྣམས་ཉིད་རེ་ཞིག་ཇི་ལྟར་རབ་ཏུ་སྟོབས་ཆེ་བར་གྱུར་པའི་སྡུག་བསྔལ་དག་མངོན་པར་བརྗོད་པར་མི་ནུས་སོ། །རྒྱས་པར་ནི་སྟོན་པས་མངོན་པར་བརྗོད་པར་སྤྱོད་དོ། །མདོར་བསྡུ་བར་གྱུར་ན་ལྷ་དང་མི་རྣམས་ཀྱི་སྡུག་བསྔལ་རྣམས་ནི་རྣམ་པ་བཅུ་དྲུག་གོ། །ཡང་ལྷ་དང་མི་རྣམས་ཀྱི་དེ་ཡང་གང་དག་ཡིན་ན། བདེ་འགྲོའི་འགྲོ་བས་བསྡུས་པའི་སྡུག་བསྔལ་དུ་གྱུར་པ་རྣམས་ལ། འདི་ལྟ་སྟེ་སྲིད་པ་བར་མ་དོའི་སྡུག་བསྔལ་དང་མངལ་ན་གནས་པའི་ཡ་ང་བའི་སྡུག་བསྔལ་དང་མངལ་ནས་ཀུན་དུ་འབྱུང་བའི་སྡུག་བསྔལ་དང་ཟས་ཀྱི་སྡུག་བསྔལ་དང་འདོད་པའི་སྡུག་བསྔལ་དང་མི་འཐུན་པ་རྣམས་དང་ཀུན་དུ་ཕྲད་པའི་སྡུག་བསྔལ་དང་སྡུག་པ་རྣམས་དང་བྲལ་བའི་སྡུག་བསྔལ་དང་གྲང་བ་དང་ཚ་བ་ལ་སོགས་པས་བཅིངས་པའི་སྡུག་བསྔལ་དང་ནད་ཀྱི་སྡུག་བསྔལ་དང་གཞན་གྱི་དབང་དུ་གྱུར་པའི་སྡུག་བསྔལ་དང་ཚོལ་ཁྲོའི་སྡུག་བསྔལ་དང་སྡིག་པའི་གྲོགས་པོ་དང་འདྲེ་བར་བྱེད་པའི་སྡུག་བསྔལ་དང་བུ་དང་བུ་མོ་དང་གཉེན་འདུན་རྣམས་ཀྱི་བྲེལ་དོག་གི་སྡུག་བསྔལ་དང་བཀྲེས་པ་དང་སྐོམ་པའི་སྡུག་བསྔལ་དང་དབང་ཆུང་བའི་སྡུག་བསྔལ་དང་རྒ་བའི་སྡུག་བསྔལ་དང་ལྷག་པར་གྱུར་པའི་སྡུག་བསྔལ་ཤིན་ཏུ་སྡུག་བསྔལ་བས་ཤིན་ཏུ་སྡུག་བསྔལ་བ་ནི་འཆི་བའི་སྡུག་བསྔལ་ལོ། །ཇི་ལྟར་རབ་ཏུ་སྟོབས་ཆེ་བའི་སྡུག་བསྔལ་ཆེན་པོ་བཅུ་དྲུག་པོ་དེ་དག་རྣམས་ནི་མིའི་འཇིག་རྟེན་པ་རྣམས་ཀྱི་ཡིན་ཏེ་འཆི་བའི་མཐར་ཐུག་པ་རྣམས་མིའི་འཇིག་རྟེན་དུ་སྐྱེས་པ་རྣམས་ཀྱི་ཡིན་ནོ། །གང་སེམས་ཅན་གཞན་དག་རྣམས་ལ་ནི་རྣམ་པ་སྣ་ཚོགས་པའི་སྡུག་བསྔལ་གཞན་དག་རྣམས་འབྱུང་བར་འགྱུར་བ་ཡིན་ཏེ། ཤིན་ཏུ་ཡང་བསྲན་པར་མི་བཟོད་པ་རྣམས་ཡིན་ནོ། །གང་ཡང་མཐར་ཐུག་པ་ཁོ་ནར་ཟད་པར་མི་འགྱུར་བའི་ཆོས་ཅན་དང་རབ་ཏུ་འཇིག་པར་མི་འགྱུར་བའི་ཆོས་ཅན་གྱི་བདེ་བ་ནི་འདི་དང་སྲིད་པ་གཞན་རྣམས་ན་ཡང་མེད་དོ།