གཡུལ་འགྱེད་པར་བྱེད་པ་གང་ཡིན་པ་འདི་དག་ཡང་འདོད་པ་རྣམས་ཀྱི་ཉེས་དམིགས་ཡིན་ནོ། །དངོས་པོ་རྣམས་ཁོ་ནའི་རྒྱགས་པ་གང་ཡིན་པ་དེ་དག་རྣམས་ནི་འདོད་པ་རྣམས་ཀྱི་ཉེས་དམིགས་ཡིན་ནོ། །དེ་ལ་རྒྱུ་འདི་རྣམས་ཀྱིས་ཀྱང་སྤྲུལ་པ་རྣམས་བྱས་སོ། །གང་ཡང་ཀླུ་རྣམས་ཀླུ་རྣམས་དང་ལྷན་ཅིག་གཡུལ་འགྱེད་པར་བྱེད་ཅིང་ཡུལ་གཞན་དག་རྣམས་ཀྱང་འཇིག་པར་བྱེད་པ་དང་། གློག་དང་ཐོག་ལ་སོགས་པ་ཡང་གཏོང་བར་བྱེད་པ་གང་ཡིན་པ་དེ་དག་རྣམས་ཐམས་ཅད་ཀྱང་འདོད་པ་རྣམས་ཀྱི་དོན་དུ་ཡིན་ནོ། །ཡང་གང་དག་དུད་འགྲོ་རྣམས་ཀྱང་ཕན་ཚུན་དུ་ཟ་བར་བྱེད་པ་དང་། གསོད་པ་དང་འཆིང་བ་ལ་སོགས་པར་བྱེད་པ་རྣམས་དང་། འཐབ་པར་ཡང་བྱེད་པ་དེ་དག་རྣམས་ཐམས་ཅད་ཀྱང་འདོད་པ་རྣམས་ཀྱི་དོན་དུ་ཡིན་ཏེ། འདི་ཡང་འདོད་པའི་ཉེས་དམིགས་ཡིན་ནོ། །དེ་བཞིན་དུ་ཡི་དགས་རྣམས་ཀྱང་ཟས་ཀྱི་རྒྱུ་མཚན་གྱིས་སམ། འཁྲིག་པའི་རྒྱུ་མཚན་གྱིས་ཀྱང་ཕན་ཚུན་དུ་རལ་གྲིས་གཅོད་པར་བྱེད་པ་དང་། དེ་དག་རྣམས་ཐམས་ཅད་ཀྱང་འདོད་པ་རྣམས་ཀྱི་དོན་དུ་ཡིན་ནོ། །གང་ཡང་འདོད་པ་རྣམས་ཀྱིས་ཉེས་དམིགས་དེ་དག་རྣམས་ཡིན་པའི་རྒྱུ་མཚན་འདི་དག་གིས་ནི་འཐབ་བྲལ་གྱི་མངའ་བདག་དེས་བག་མེད་པ་དང་བྲལ་བར་བྱ་བའི་དོན་དུ་ལྷ་རྣམས་ལ་སྤྲུལ་པར་བྱེད་དོ། །དེ་བཞིན་དུ་དམྱལ་བ་རྣམས་ཀྱང་ཕན་ཚུན་དུ་མངོན་པར་འཇོམས་པར་བྱེད་དེ། ཉེས་པར་བྱེད་པའི་ལས་རྣམས་ཀྱིས་སྐྱེས་པ་གཞན་རྣམས་སུ་གང་དག་དང་ཞེ་འགྲས་པར་གྱུར་པ་དེ་དག་རྣམས་རྗེས་སུ་དྲན་པར་འགྱུར་ལ། རྗེས་སུ་དྲན་ནས་ཀྱང་འཁོན་དེ་དག་རྣམས་ནི་རལ་གྲི་རྣམས་ཀྱིས་ཕན་ཚུན་དུ་ལས་བྱེད་པར་འགྱུར་བ་ཁོ་ན་ཉེ་བར་གནས་པས་བདག་ཉིད་དང་གཞན་དག་རྣམས་ཀྱང་གཤོག་པར་བྱེད་དོ། །དེ་ལྟར་ཡང་དམྱལ་བ་རྣམས་ཀྱི་འདོད་པ་རྣམས་ཀྱི་ཉེས་དམིགས་ཡིན་ནོ། །དེ་ལ་རྒྱུ་མཚན་འདི་དག་གིས་ཀྱང་འདོད་པ་རྣམས་ཡོངས་སུ་སྤོང་བའི་རྒྱུར་འཐབ་བྲལ་བ་རྣམས་ཀྱི་མངའ་བདག་དེ་སྤྲུལ་པ་གཞན་རྣམས་བྱེད་པ་ཡིན་ནོ། །འགྲོ་བ་ལྔ་པོ་འདི་དག་རྣམས་ཐམས་ཅད་ན་ནི་འདོད་པ་རྣམས་ཀྱི་ཉེས་དམིགས་ཡོད་པ་ཡིན་ནོ། །གང་ཡང་འཁོར་བ་ལས་ཁ་ཕྱིར་ཕྱོགས་པར་གྱུར་པ་དེ་དག་རྣམས་ཐམས་ཅད་ནི་གནས་སྐབས་ཐམས་ཅད་དུ་འདོད་པ་རྣམས་ལས་ངེས་པར་འབྱུང་བར་སྟོན་པར་བྱེད་པ་དང་འཆད་པར་ཡང་བྱེད་དོ།