།ལྷ་ངོ་མཚར་བར་གྱུར་པ་མཚུངས་པ་མེད་པའི་གཟུགས་གསལ་ཞིང་སྡུག་པའི་ཡོན་ཏན་དང་ལྡན་པ་གཞན་ཡང་རྣམ་པ་གཞན་གྱིས་ལྷ་རྣམས་སྤྲུལ་པར་བྱེད་པ་ན། ཇི་ལྟར་མུ་སུ་ལུན་དྷའི་ཁ་ནས་དེ་དག་ཉིད་འགྲོ་བ་ནི་ཨུད་པ་ལའི་ཟེ་བའི་ནང་དུ་ཞོན་ཞིང་རྒྱན་རྒྱུན་བར་འབྲེལ་པའི་དབུས་སུ་སོང་ནས། ལྷ་རྫས་ཀྱི་རྔ་སྐད་ཡན་ལག་ལྔ་པ་ཉན་པར་བྱེད་ཅིང་ལྷ་མོའི་ཚོགས་རྣམས་ཀྱིས་ཡོངས་སུ་བསྐོར་ནས་ལྷ་རྫས་ཀྱི་བཏུང་བ་དག་འཐུང་བར་བྱེད་དོ། །གླུ་ཡང་ལེན་པར་བྱེད་ལ་ལྷན་ཅིག་སྤྱོད་པའི་འཁོར་རྣམས་ཀྱིས་ཡོངས་སུ་བསྐོར་ནས་ལན་བརྒྱ་ཕྲག་དང་། ཅི་སྟེ་ལན་སྟོང་ཕྲག་དང་ལན་བྱེ་བ་ཕྲག་རྣམས་སུ་ཡང་གཟུགས་དང་། ཁ་དོག་དང་། དབྱིབས་དཔེ་མེད་པའི་ལྷའི་བུ་མོ་མཆོག་རྣམས་ཀྱིས་ཡོངས་སུ་བསྐོར་ནས་དགའ་བར་བྱེད་པ་ལྷ་རྫས་ཀྱི་ནགས་དང་ཉེ་བའི་ནགས་སུ་ཐབས་དུ་མས་རབ་ཏུ་སྒྲུབ་པར་བྱེད་དོ། །ནམ་མཁའི་དཀྱིལ་དུ་མངོན་པར་འཕགས་ནས་ས་གཞི་དག་བཞིན་དུ་འགྲོ་བར་བྱེད་ལ། རང་བཞིན་པའི་ལྷ་དེ་དག་ཀྱང་གླུ་དེ་དག་རྣམས་ཉན་པར་བྱེད་དོ། །དེ་དག་གི་དྲུང་ན་ཡོན་ཏན་བརྒྱས་ལྷག་པར་སྙན་པར་གྱུར་པ། དེ་དག་གི་གླུ་དང་། དེ་དག་གི་གཟུགས་དང་། དེ་དག་གི་བདེ་བ་ཡང་རྣམ་པ་སྣ་ཚོགས་པའི་ཡོན་ཏན་དང་ལྡན་པ་ཡིན་ནོ། །དེ་ནས་རང་བཞིན་དུ་གནས་པའི་ལྷ་དེ་དག་སྔ་ན་མ་མཐོང་བའི་ངོ་མཚར་ཆེ་བ་དེ་དག་རྣམས་ཀུན་ཏུ་མངོན་པར་མཐོང་ནས། ཁ་ཅིག་ནི་ངོ་མཚར་བའི་མཆོག་དང་ལྡན་པར་གྱུར་ཏོ། །ཁ་ཅིག་ནི་རབ་ཏུ་དགའ་བར་གྱུར་ལ། ཁ་ཅིག་ནི་རྨད་དུ་བྱུང་བར་གྱུར་ནས་ཅིའི་ཕྱིར་ལྷ་དེ་དག་རྣམས་ཇི་ལྟར་ན་འཐབ་བྲལ་གྱི་བདག་པོ་མུ་སུ་ལུན་ངྷའི་ཁ་ནས་འགྲོ་བར་འགྱུར། འདི་དག་ནི་ཤིན་ཏུ་ཡང་ཡ་མཚན་ཆེའོ། །དེ་ལྟར་རང་བཞིན་གྱི་ལྷ་དེ་དག་རྣམས་སེམས་པར་བྱེད་པ་དང་ཕན་ཚུན་རྗོད་པར་ཡང་བྱེད་དེ། དེ་ལྟར་ཡང་རང་བཞིན་གྱི་ལྷ་དེ་དག་རྣམས་བྱེད་དོ། །གཞན་ཡང་མུ་སུ་ལུན་དྷས་མཆོག་ཏུ་གྱུར་པའི་རྫུ་འཕྲུལ་གཞན་དག་བྱེད་པ་ནི་འདི་ལྟ་སྟེ། ཁ་ནས་བྱུང་བའི་ལྷ་དེ་དག་ལས་སྣ་ཚོགས་པའི་ཆ་བྱད་འཛིན་པ་རལ་པ་རིང་པོ་དང་ཅོད་པན་དང་ལྡན་པ་ཤིང་ཤུན་གྱི་གོས་ཅན་ལག་ན་རིལ་བ་སྤྱི་བླུགས་ཐོགས་པ། ལྷ་རྫས་ཀྱི་ཕྲེང་བའི་རྒྱན་ཅན། གཟི་བརྗིད་ཀྱི་དཔལ་འབར་བའི་རི་དགས་ཀྱི་པགས་པ་འཛིན་པའི་རྣམ་པ་སྣ་ཚོགས་པའི་དྲང་སྲོང་དག་ཀུན་ཏུ་འབྱུང་སྟེ།