འཆི་བདག་ཅེས་ནི་མངོན་པར་བརྗོད། །འབྱུང་པོ་ཀུན་གྱིས་ཐུབ་མིན་དང་། །ལས་རྣམས་ཀུན་གྱིས་རྒྱལ་མིན་པས། །སེམས་ཅན་ཐམས་ཅད་རྣམ་འཇོམས་པ། །འཆི་བདག་ཅེས་ནི་འདི་ལ་བརྗོད། །ངེས་པ་ཁོ་ནར་མྱོང་འགྱུར་དང་། །ལུས་ཅན་ཐམས་ཅད་ལྟུང་བའི་མཐའ། །རིགས་འཐུན་འཇིག་པར་བྱེད་པ་འདི། །འཆི་བདག་ཅེས་ནི་མངོན་པར་བརྗོད། །ལྷར་བཅས་གནོད་སྦྱིན་དྲི་ཟ་དང་། །ཤ་ཟ་ཀླུ་དང་སྲིན་པོ་ཡང་། །དུས་ཀྱི་འཁོར་ལོས་རྣམ་འཇོམས་པ། །འཆི་བདག་ཅེས་ནི་བརྗོད་པ་ཡིན། །མ་བསྡམས་པ་དང་བག་མེད་པ། །ལུས་ཅན་ཀུན་ལ་མེ་དང་འདྲ། །ཁྲོ་བ་ཡང་ནི་ཕྱིར་མི་ཟློག །འཆི་བདག་ཅེས་ནི་འདི་ལ་བརྗོད། །ཕུང་པོ་སྐྱེ་མཆེད་འཇིག་པ་དང་། །ཚེ་དང་དྲོད་དང་ཅི་སྟེ་སེམས། །དུས་ཀྱི་ཆོས་ནི་ཤུགས་པོ་ཆེ། །འཆི་བདག་ཅེས་ནི་བརྗོད་པ་ཡིན། །དེ་ལ་འདི་དག་མྱུར་རྒྱུག་པས། །ལུས་ཅན་རྣམས་ནི་ལོག་པར་འཁྲིད། །དགེ་ལེགས་དག་ནི་འབད་པར་གྱིས། །ཡིད་ནི་བག་མེད་པར་མ་བྱེད། །དེ་ལྟར་དུས་སུ་ལེགས་པར་འབོད་པ་ཞེས་བྱ་བའི་བྱས་བག་མེད་པ་བག་མེད་པར་སྤྱོད་པར་བྱེད་པའི་ལྷ་དེ་དག་རྣམས་ལ་འཆི་བདག་གི་འཇིགས་པ་བདེན་པ་གྱུར་པ་ངེས་པར་མྱོང་བར་བྱ་བ་རྣམས་སྟོན་པར་བྱེད་དོ། །དེ་དག་རྣམས་དེ་ལྟར་ཐོས་པར་གྱུར་ཡང་ལྷ་བག་མེད་པར་སྤྱོད་པ་དེ་དག་རྣམས་ཇི་ལྟར་མ་ཐོས་པ་ཁོ་ན་བཞིན་དུ་སྐྱོ་བར་ཡང་མི་འགྱུར་ཏེ་རང་བཞིན་གྱིས་ཀྱང་དབང་པོ་རྣམས་ནི་གཡོ་བ་ཡིན་ལ། ཁྱད་པར་དུ་ཡང་གང་དག་བདེ་སྐྱིད་ཅན་དེ་དག་རྣམས་ནི་ཆེས་ཀྱང་གཡོ་འགྱུར་ཅན་ཡིན་པའི་ཕྱིར་དང་། ཁྱད་པར་དུ་ཡང་ལྷ་རྣམས་ནི་རྟག་ཏུ་བདེ་བས་རྒྱུ་བ་ཡིན་པའི་ཕྱིར་རོ། །དེ་ལ་རྒྱུ་འདི་དག་གིས་ན་ལྷ་དེ་རྣམས་ལ་ཡང་དག་པ་དང་། དེ་ཁོ་ན་དང་ཕན་པ་དང་སྙིང་པོ་དང་ཇི་ལྟ་བའི་དོན་རྣམས་བརྗོད་པར་གྱུར་པ་ན་ཡང་ཀུན་དུ་རྟོགས་པ་མ་ཡིན་ནོ། །དེ་དག་རྣམས་ལས་ངེས་པར་རྟོགས་པ་དེ་དག་རྣམས་ཀྱང་མི་འཛིན་ཏེ། ཡུལ་གྱི་སྲེད་པའི་དུག་གིས་རྣམ་པར་འཁྲུལ་བར་བྱས་པའི་ཕྱིར་རོ། །དེ་ལ་རྒྱུ་འདིས་ཀྱང་ལྷ་དག་ཡང་དག་པར་གྱུར་པ་རྣམས་མི་འཛིན་ཏོ། །དེ་ལྟར་རྩིས་བཏབ་མ་བྱས་པར་སླར་ཡང་དེ་ཁོ་ན་བཞིན་དུ་རྒྱ་ཆེན་པོ་མངར་མོའི་ཡུལ་གྱི་བདེ་བ་རྣམས་ལ་དགའ་བར་བྱེད་དེ།