།རྒྱལ་པོ་གང་ཞིག་ཡུལ་རྣམས་མཆོག་ཏུ་བྱེད་པར་གྱུར་པ་རྣམ་པ་ཐམས་ཅད་དུ་དགེ་ལེགས་སུ་འོས་པའི་སྒྲ་དང་རེག་བྱ་དང་རོ་དང་གཟུགས་དང་དྲི་རྣམས་ཀྱིས་ཀུན་ཏུ་ཕྲོགས་པའི་རྒྱལ་པོ་ནི་ཐབས་རྣམས་ཐམས་ཅད་ཀྱིས་ཀྱང་དགེ་བར་བྱ་མི་ནུས་སོ། །རྣམ་པ་དེ་ལྟ་བུ་དག་གིས་ཡུལ་རྣམས་ཀྱང་དག་པའི་བདེ་བས་ཡོངས་སུ་སྐྱོང་བར་མི་འགྱུར་རོ། །བདག་ཉིད་ཀྱང་ཡུལ་དེ་དག་རྣམས་ལ་མཆོག་ཏུ་བྱེད་པར་ཡང་མི་འགྱུར་ཞིང་བློ་དེ་ལ་སོང་བར་གྱུར་པས་ཀྱང་ཆོས་དང་ནོར་དང་སྙན་པ་རྣམས་ལས་ཀྱང་ཡོངས་སུ་ཉམས་པར་འགྱུར་རོ། །ཡོངས་སུ་ཉམས་པ་ལས་ནི་མི་འཐུན་པའི་རྒྱལ་པོ་གཞན་གྱིས་མངོན་པར་འཚེ་བར་བྱེད་དོ། །དེ་དེས་མངོན་པར་གཙེས་པ་ལས་ནི་དེའི་གྲོང་ཁྱེར་བ་རྣམས་དགའ་བ་དང་རྣམ་པར་བྲལ་བར་གྱུར་ནས་རྒྱལ་སྲིད་འཆོར་བར་འགྱུར་རོ། །སྡུག་བསྔལ་ཆེན་པོ་རྣམས་སུ་ཡང་ལྷུང་ནས་སྲོག་ཀྱང་ངམ་བརྒྱ་ལ་ན་སྟེ་མེད་པར་འགྱུར་རོ། །དེའི་ཕྱིར་ན་ཡུལ་རྣམས་ལ་ཆེད་ཆེར་འགྱུར་བར་མི་བྱའོ། །གང་ཡང་རྒྱལ་པོ་ཡུལ་རྣམས་ལ་ཆེད་ཆེར་བྱེད་པ་མ་ཡིན་པ་དང་རང་གི་ཆོས་ཡོངས་སུ་སྐྱོང་བར་བྱེད་པ་དང་། སེམས་ཀྱང་ཤིན་ཏུ་མཉམ་པར་བཞག་པ་དག་ནི་སྒྲ་དང་རེག་བྱ་དང་རོ་དང་གཟུགས་དང་དྲི་རྣམས་ཀྱིས་ཀུན་ནས་འཁྲིད་པར་མི་འགྱུར་རོ། །དེ་ལྟར་རྒྱལ་པོ་དེས་སྐྱེ་དགུ་རྣམས་བསྐྱངས་པར་གྱུར་པ་ན་ཆོས་དང་ནོར་དང་སྙན་གྲགས་དང་ཡང་རྟག་ཏུ་ཡང་དག་པར་ལྡན་པར་འགྱུར་རོ། །ལེགས་པར་ལྡན་པས་ཕྱིར་ཞིང་ཡང་རྒྱལ་འབངས་རྣམས་སྐྱོང་བར་བྱེད་དོ། །དེ་རྟག་ཏུ་སྐྱེ་དགུ་རྣམས་ལ་ཕན་པར་འདོད་པ་དང་། གནོད་སེམས་མེད་པ་དང་བརྣབ་སེམས་མེད་པར་གྱུར་པས་ཀྱང་ལུས་ཞིག་ནས་མཐོ་རིས་བདེ་འགྲོའི་འཇིག་རྟེན་པ་རྣམས་ལས་འཐབ་བྲལ་གྱི་ལྷ་རྣམས་ཀྱི་མངའ་བདག་ཏུ་འགྱུར་བ་ཡིན་ཏེ་དེས་སྔོན་བྱས་པའི་རྒྱུ་དང་རྐྱེན་རྣམས་ཀྱིས་སོ། །ཡང་ཆོས་གཞན་ཡང་རྒྱལ་པོས་མི་བྱ་བར་གྱུར་པ་འདི་ཡང་གང་ཞེ་ན། འདི་ལྟ་སྟེ་གདུལ་དཀའ་བ་རྣམས་ཡུལ་དུ་འཛིན་པར་མི་བྱེད་དོ། །གང་ཡང་རྒྱལ་པོར་གྱུར་ནས་གདུལ་དཀའ་བའི་སྡིག་པའི་ལས་ཅན་ཚུལ་ཁྲིམས་འཆལ་པ་རྣམས་ཡུལ་དུ་འཛིན་པར་བྱེད་པ་ན་དེ་ནི་དུས་མི་རིང་བ་ཉིད་ན་དེས་བྱས་པར་གྱུར་པའི་སྐྱོན་ཆེན་པོ་ཀུན་ཏུ་ལྟུང་བར་འགྱུར་རོ། །སྐྱོན་ཆེན་པོ་དེ་དག་རྣམས་ཀྱིས་ཀྱང་ཡུལ་ལྗོངས་འཇིགས་པར་འགྱུར་བ་དང་། མངའ་བྱེད་རྣམས་ལས་ཡང་ཡོངས་སུ་ཉམས་པར་འགྱུར་རོ།