།ཤེས་རབ་ལ་གོམས་པར་བྱ་བ་ཞེས་བྱ་བ་ནི་སྡུག་བསྔལ་ཐམས་ཅད་ཀུན་ནས་འཇོམས་པར་བྱེད་པ་འཁོར་བ་ཐམས་ཅད་ལས་ངེས་པར་འབྱུང་བའི་རྒྱུར་གྱུར་པའི་ཕྱིར་ན། དེ་ལ་ཅི་ནས་ཀྱང་རྒྱལ་པོས་གོམས་པར་བྱ་བ་ཡིན། ཤེས་རབ་ཞེས་བྱ་བ་ཡང་། གང་གི་ཕྱིར་མུན་པ་ཆེན་པོར་ཀུན་ནས་ལྟུང་བའི་སྡུག་བསྔལ་དུ་མའི་མུན་པར་འཐོམས་པར་གྱུར་པ་རྣམས་ལ་རབ་ཏུ་གསལ་བར་བྱེད་པའི་མར་མེ། འཁོར་བའི་དབུལ་པོ་རྣམས་ཀྱི་ནོར། མིག་མེད་པར་གྱུར་པ་རྣམས་ཀྱི་མིག །སྟོབས་མེད་པ་རྣམས་ཀྱི་སྟོབས་དང་། གྲོགས་མེད་པ་རྣམས་ཀྱི་གྲོགས་དང་། སྐྱོབ་པ་དང་མི་ལྡན་པ་རྣམས་ཀྱི་སྐྱོབ་པར་བྱེད་པ་དང་། ནད་ཀྱིས་ཤིན་ཏུ་གཟིར་བའི་སྲོག་ཆགས་འདི་དག་རྣམས་ཀྱི་ནི་སྨན་ནོ། །ལམ་མེད་པ་ལ་རབ་ཏུ་གནས་པ་རྣམས་ཀྱི་ནི་ལམ་སྟོན་པར་བྱེད་པའོ། །འཁོར་བའི་དགོན་པར་རབ་ཏུ་ཞུགས་པར་གྱུར་པས་སྲེད་པས་ཀུན་ནས་གདུངས་པ་རྣམས་ཀྱི་ནི་ཤིན་ཏུ་བར་ཡང་བསིལ་བར་གྱུར་པའི་ཆུ་རྣམ་པ་དུ་མ་རྣམས་སོ། །འཁོར་བའི་བཙོན་རར་ཀུན་ནས་བསྡམས་པ་རྣམས་ཀྱི་ངེས་པར་འབྱིན་པའི་རྒྱུར་གྱུར་པའོ། །གཉེན་བཤེས་མེད་པ་རྣམས་ཀྱི་ཕན་པར་བྱེད་པའི་གཉེན་ནོ། །མིག་ལྡོངས་པ་རྣམས་ཀྱི་རབ་རིབ་དང་རྣམ་པར་བྲལ་བར་བྱེད་པའི་མིག་གོ། །གསོད་པར་བྱེད་པའི་ཡུལ་དང་དུས་རྣམས་སུ་སྟོབས་དང་ལྡན་པའི་གྲོགས་པོའོ། །གཤིན་རྗེའི་ཕོ་ཉ་རྣམས་ཉེ་བར་གནས་པའི་འཆི་བའི་དུས་ན་སྟོབས་དང་ལྡན་པའི་གྲོགས་པོ་རྣམས་གང་གིས་ངན་འགྲོའི་འཇིགས་པ་རྣམས་ཐམས་ཅད་ལས་ཀུན་ཏུ་འདྲེན་པར་བྱེད་པའོ། །བགྲོད་དཀའ་བ་རྣམས་དང་ངམ་གྲོག་རྣམས་དང་གཡང་ས་རྣམས་ལས་ལག་པས་འདོན་པར་བྱེད་པའི་སྟོབས་དང་ལྡན་པའི་གྲོགས་པོ་རྣམས་གང་གིས་བདེ་བ་རྣམས་ཐམས་ཅད་འཐོབ་པར་བྱེད་པའོ། །ཀུན་ནས་ཚིག་པར་གྱུར་པའི་སྐྱེས་བུ་རྣམས་ཀྱི་རིན་ཐང་མེད་པའི་གོས་རྣམས་སོ། །ཚུལ་ཁྲིམས་འཆལ་པའི་མེའི་འཇིགས་པའི་ཚ་བས་གདུངས་པ་རྣམས་ཀྱི་ཤིན་ཏུ་ཆེ་བའི་ཡལ་ག་དུ་མ་རྣམས་ཀྱིས་ཀུན་ནས་ཁྱབ་པར་གྱུར་པའི་བསིལ་བའི་གྲིབ་མ་འཇིགས་པ་མེད་པ་དང་ལྡན་པ་ལ་ཡལ་ག་དུ་མ་སྟུག་པོར་གྱུར་པ་ཡལ་ག་ཕྲེའུ་དང་། ཆིའུ་གཞོན་ནུ་དང་འདབ་མ་དང་ཟེ་བ་དང་ལྡན་པའི་ལྗོན་ཤིང་སྐྱེ་བོ་རྣམས་ཐམས་ཅད་ཀྱི་མིག་དང་རེག་པ་ན་ཤིན་ཏུ་དགའ་བར་འགྱུར་བ་ཡིན་ནོ།