སྲོག་གཅོད་པ་རྣམ་པར་སྤངས་པས་ནི་དམན་པ་དང་བར་མ་དང་ཁྱད་པར་དུ་འཕགས་པའི་ལྷ་རྣམས་ཚེ་རིང་བར་འགྱུར་རོ། །གཞན་ཡང་དེ་ཁོ་ན་བཞིན་དུ་ལྷའི་རིས་དྲུག་ཏུ་མ་བྱིན་པར་ལེན་པ་རྣམ་པར་སྤངས་པས་ནི་ནོར་བརྟན་པར་འགྱུར་ཏེ། རིན་པོ་ཆེ་བདུན་གྱི་རང་བཞིན་ཕུན་སུམ་ཚོགས་པར་འགྱུར་བའི་ནགས་དང་ཉེ་བའི་ནགས་དང་རིའི་རྩེ་མོ་སྣ་ཚོགས་པར་དགའ་བར་གྱུར་པ་རྣམས་ལའོ། །འདོད་པས་ལོག་པར་གཡེམ་པ་རྣམ་པར་སྤངས་པས་ནི་ཇི་སྲིད་དུ་འདི་ཤི་འཕོས་པར་མ་གྱུར་གྱི་བར་གྱི་དུས་དེ་སྲིད་དུ་ལྷ་མོ་རྣམས་ལྷའི་བུ་གཞན་དག་རྣམས་ལ་འཕོ་བར་མི་འགྱུར་རོ། །གསོན་བཞིན་དུ་ཡང་ལྷའི་བུ་གཞན་དག་རྣམས་ལ་ནམ་ཡང་ཀུན་ཏུ་འཕོ་བར་མི་འགྱུར་ཞིང་ཁྱུད་འཕྱང་ཡང་མི་བྱེད་ཀྱི་དེ་ཉིད་ཁོ་ན་ལ་གཟུགས་བཟང་བ་ཐམས་ཅད་ཀྱིས་གཟི་བརྗིད་ཐམས་ཅད་ཀྱིས་ཀྱང་ལྟ་བར་བྱེད་དོ། །གང་ཡང་འདོད་པ་ལོག་པར་གཡེམ་པ་ལེགས་པར་བསྲུངས་པ་མ་ཡིན་པ་དེ་དག་རྣམས་ཀྱི་ལྷ་མོ་རྣམས་ནི་གཞན་དག་ལ་འཕོ་བར་འགྱུར་ཏེ། སོ་སོ་དང་སོ་སོར་ལས་ཀྱི་རྣམ་པར་སྨིན་པ་རྣམས་རབ་ཏུ་སྟེར་བར་བྱེད་པ་ཡིན་ནོ། །དེ་ལྟར་ལུས་ཀྱིས་ལེགས་པར་སྤྱོད་པ་རྣམས་བསྲུངས་ཤིང་བསྟེན་ལ་བསྒོམས་ལ་ལན་མང་དུ་བྱས་པས་ནི་ལྷ་རྣམས་ཀྱི་ནང་དུ་སྐྱེ་བར་འགྱུར་བ་ཡིན་ནོ། །རྣམ་པར་སྨིན་པ་བདེ་བ་དང་ལྡན་པ་གཉིས་པར་གྱུར་པ་ངག་གི་རྣམ་པ་བཞིས་བསྟེན་ཅིང་བསྒོམས་ལ་ལན་མང་དུ་བྱས་པས་ལྷ་རྣམས་ཀྱི་ནང་དུ་སྐྱེའོ། །ལས་གང་གི་རྣམ་པར་སྨིན་པས་ལྷ་རྣམས་ཀྱི་ནང་དུ་སྐྱེས་ནས་བདེ་བ་གང་ལ་ལོངས་སྤྱོད་པ་ཡིན་ན། ངག་ལེགས་པར་བསྡམས་པ་རྣམས་ཀྱང་བཞིའོ། །དེ་ལ་རྫུན་རྣམ་པར་སྤངས་པས་ནི་གསལ་ཞིང་སྙན་ལ་ཟུར་ཐོན་པའི་ངག་ཏུ་འགྱུར་རོ། །རྟག་ཏུ་ཡང་ལེགས་པར་སྦྱར་བའི་མཆོག་གི་སྨྲ་བ་པོར་འགྱུར་ཏེ། གང་དང་གང་ཉིད་སྨྲ་བར་བྱེད་པ་ན་བདེ་བས་དེ་དང་དེ་ཁོ་ན་འདིས་ལྷན་ཅིག་ཏུ་རྗོད་པར་བྱེད་པ་ནི་ལྷ་འདི་དག་ལ་ཉེ་བར་གནས་པ་ཡིན་ཏེ། དེ་དག་གིས་རྫུན་ལེགས་པར་སྤངས་པ་ཡིན་པའི་ཕྱིར་རོ། །ཕྲ་མ་རྣམ་པར་སྤངས་པས་ནི་ཡུལ་ལྗོངས་རྣམས་འཇིག་པར་མི་འགྱུར་རོ།