སྲོག་ཆགས་སུ་གྱུར་པ་གང་དག་ཡང་ཆོས་པ་མ་ཡིན་ཞིང་ཆོས་ཀྱི་རྗེས་སུ་ཡོངས་སུ་འཇུག་པ་ཡང་མ་ཡིན་པ། དེ་དག་རྣམས་འདིས་བདེ་ལེགས་ལ་རབ་ཏུ་སྦྱོར་བར་བྱེད་དོ། །དེ་ལྟར་ཡང་དག་པར་སྐྱེ་དགུ་སྐྱོང་བར་བྱེད་པ་ཉིད་དུ་འགྱུར་རོ། །བསྐྱངས་པར་གྱུར་པ་ལས་ཀྱང་ཆོས་དང་དོན་དང་སྙན་པ་རྣམས་དང་ཡང་དག་པར་ལྡན་པར་འགྱུར་རོ། །རེ་ཞིག་དང་པོར་ཆོས་ཀྱིས་ནི་མཆོག་ཏུ་ངེས་པར་ལེགས་པ་ལ་ཡང་དག་པར་སྦྱོར་བར་གྱུར་པ་ཡིན་ན་ཇི་ལྟར་ན་ཆོས་མ་ཡིན་པ་དང་ཀུན་ནས་ལྡན་པར་གྱུར། རྒྱལ་པོ་དོན་དང་ཡང་དག་པར་ལྡན་པར་འགྱུར་ཏེ། ཇི་ལྟ་བུའི་དོན་གྱིས་ཞེ་ན། འདི་ལྟ་སྟེ། གང་གི་ཚེ་འབྲས་བུ་ངེས་པར་བྱས་ནས་ཟ་བའི་རྒྱལ་པོར་གྱུར་པ་ན་དྲུག་ཆ་ལེན་པར་བྱེད་པ་ཡིན་ལ་དེའི་ཚེ་སྐྱེ་དགུ་རྣམས་ཕུན་སུམ་ཚོགས་པར་བྱེད་པར་འགྱུར་རོ། །ལེགས་པར་ཡོངས་སུ་བསྐྱངས་པས་ཏེ་སྐྱེ་དགུ་ཕུན་སུམ་ཚོགས་པ་དེ་ཡང་རྒྱལ་པོའི་སེམས་དགའ་བའི་དབང་གིས་རྗེས་སུ་ཆགས་པར་གྱུར་ནས་སྒྲོལ་བར་བྱེད་པ་ཡིན་ནོ། །དེ་ལས་ཡོན་ཏན་གཉིས་པ་དང་ཡང་དག་པར་ལྡན་པ་ཕུན་སུམ་ཚོགས་པར་འགྱུར་བ་ནི་རྒྱལ་པོ་སྙན་གྲགས་དང་ཡང་དག་པར་ལྡན་པར་འགྱུར་རོ། །རྒྱལ་པོས་ཡང་དག་པར་སྐྱེ་དགུ་བསྐྱངས་པར་གྱུར་པ་ན་གྲོང་ཁྱེར་པ་གང་དག་རྗེས་སུ་ཆགས་པར་གྱུར་པ་དེས་ཕྱོགས་ཐམས་ཅད་དུ་སྙན་པ་སྒྲོགས་པར་བྱེད་པར་འགྱུར་རོ། །དེ་ལྟར་ཆོས་དང་དོན་དང་སྙན་པ་རྣམས་དང་ཡང་ལེགས་པར་ལྡན་པར་འགྱུར་རོ། །རྒྱལ་པོ་ལེགས་པར་སྐྱེ་དགུ་རྣམས་བསྐྱངས་པར་གྱུར་པ་ལས་ལུས་ཞིག་པར་གྱུར་ནས་ཤི་བའི་འོག་ཏུ་མཐོ་རིས་བདེ་འགྲོའི་འཇིག་རྟེན་འཐབ་བྲལ་གྱི་ལྷ་རྣམས་ཀྱི་བདག་པོར་འགྱུར་རོ། །དེས་སྔོན་བྱས་པའི་རྒྱུ་ལས་ཀྱི་རྣམ་པར་སྨིན་པ་ལས་ཡིན་ནོ། །ཡང་ཆོས་གཞན་རྒྱལ་པོའམ་གཞན་གྱིས་ཀྱང་རབ་ཏུ་བརྩོན་པ་མང་པོ་རྣམས་ཀྱིས་བྱ་བར་བྱ་སྟེ། འདི་ཡང་གང་ཞེ་ན། འདི་ལྟ་སྟེ་དགེ་བ་བཅུའི་ལས་ཀྱི་ལམ་རྣམས་བྱ་བའོ། །དེ་མ་ལུས་པ་རྣམས་ཀྱིས་ཀྱང་མཆོག་ཏུ་བདེ་བའི་རྣམ་པར་སྨིན་པ་དང་ལྡན་པར་འགྱུར་རོ། །དེ་ལ་དགེ་བའི་ལས་ཀྱི་ལམ་དེ་ཉིད་ཀྱང་རྣམ་པ་གསུམ་སྟེ། ལུས་ཀྱི་དང་ངག་གི་དང་ཡིད་ཀྱིའོ། །ལུས་ཀྱི་རྣམས་ནི་སྲོག་གཅོད་པ་དང་མ་བྱིན་པར་ལེན་པ་དང་འདོད་པ་ལོག་པར་གཡེམ་པ་སྤོང་བའོ།