།དེ་ལྟར་ཀུན་དུ་ཆགས་པར་གྱུར་པའི་བློ་དང་སྤྱོད་པ་དང་ལྡན་པ་བློ་དེ་ལ་སོང་བར་གྱུར་པས་ཆོས་དང་ཆོས་མ་ཡིན་པ་དཔྱོད་པར་མི་བྱེད་དོ། །ཡུལ་འཁོར་རྗེས་སུ་སྒྲུབ་པར་མི་བྱེད་དོ། །ཡུལ་ལྗོངས་ཀྱི་དོན་དག་དཔྱོད་པར་མི་བྱེད་དོ། །རང་བཞིན་ལེགས་པར་བསྒོ་བར་མི་བྱེད་དོ། །བཀའ་བློན་པ་རྣམས་ཁུར་ལ་སྦྱོར་བར་མི་བྱེད་དོ། །དོན་དག་ལྕི་མོ་དང་ཡང་མོ་རྣམས་རྟོགས་པ་མ་ཡིན་ནོ། །དེ་རྟག་པར་ཡང་དོན་རྣམས་ལས་ཉམས་པར་འགྱུར་རོ། །དེ་ཡོངས་སུ་ཉམས་པ་ལས་ཀྱང་འབྱོར་བ་དམན་པར་འགྱུར་ལ་དེས་ཀྱང་ཟས་དང་སྐོམ་མིང་མེད་པར་འགྱུར་རོ། །དེ་དེ་ལས་ཡོངས་སུ་ཉམས་པར་གྱུར་པས་ཀྱང་འཇིག་རྟེན་པ་རྣམས་ཐམས་ཅད་ཀྱི་སྐྱུག་བྲོ་བའི་གནས་སུ་གྱུར་པ་མཆོག་ཏུ་དབུལ་བར་འགྱུར་རོ། །སྲེད་པའི་རྣམ་པར་གཡེང་བ་དེས་འཇིག་རྟེན་པའི་དོན་རྣམས་ཀྱི་ཡང་བར་དུ་གཅོད་པར་བྱེད་པར་འགྱུར་བ་ཡིན་པ་དང་། ཟས་དང་སྐོམ་ཉེ་བར་སྟེན་པར་གྱུར་པས་ཇི་ལྟར་འཇིག་རྟེན་ལས་འདས་པ་རྣམས་ལ་ཡང་རྣམ་པར་གཤེ་བར་གྱུར་པ་ཡིན་ནོ། །འདི་ལྟ་སྟེ་ཤིན་ཏུ་ཁོ་ན་ཡང་ཟས་སྐོམ་ལ་སྲེད་པར་གྱུར་པའི་རང་བཞིན་དང་ལྡན་པ་དེ་ལ་ཡིད་སོང་བར་གྱུར་པ་དེའི་ངང་ཚུལ་ཅན་དག་ནི་རྟག་པར་ཡང་རོའི་སྲེད་པས་ཀུན་ཏུ་ཁྲིད་པར་བྱེད་པས་ཡིད་མཉམ་པར་བཞག་པ་མ་ཡིན་པར་འགྱུར་རོ། །ལུས་སུ་གཏོགས་པའི་དྲན་པ་དག་མེད་པར་འགྱུར་རོ། །ཚོར་བར་གཏོགས་པ་ཡང་མེད་དོ། །སེམས་སུ་གཏོགས་པ་དག་ཀྱང་མེད་དོ། །ཆོས་སུ་གཏོགས་པ་དག་ཀྱང་མེད་དོ། །སྡུག་བསྔལ་དང་ཀུན་འབྱུང་དང་འགོག་པ་དང་ལམ་གྱིས་བསྡུས་པ་རྣམས་ཀྱང་མེད་དོ། །ཟས་དང་སྐོམ་ལ་གུས་པར་འགྱུར་བ་ལས་མ་གཏོགས་པ་འདི་དག་དོན་གཞན་རྣམས་འགའ་ཞིག་ལ་ཡང་བློ་ལས་སུ་རུང་བར་མི་འགྱུར་རོ། །དེ་ནི་དུད་འགྲོ་དང་རང་བཞིན་མཚུངས་པར་འགྱུར་བ་ཡིན་ནོ། །དེ་ཟས་དང་སྐོམ་གྱི་སྤྱོད་ཡུལ་རྣམས་ལས་ཟས་ལ་རྣམ་པར་སྤྱོད་པའི་བརྩོན་པ་དེ་དག་ལས་གྲོལ་བ་ནི་ལུས་ངག་གི་སྤྱོད་པས་བསྡུས་པ་དང་དབང་པོ་རྣམས་ཀྱང་ཡང་དག་པར་ཡོངས་སུ་སྨིན་པར་འགྱུར་རོ། །ཡང་དག་པའི་ལམ་རྣམས་སྤྱོད་པར་བྱེད་དོ། །དེའི་སེམས་ལས་སུ་རུང་བར་འགྱུར་རོ།