།གཞན་ཡང་གྲོགས་པོ་མ་ཡིན་པ་བདེ་ལེགས་སུ་འགྱུར་བར་མི་བྱེད་པ་ཀུན་ཏུ་བསྟེན་པར་མི་བྱའོ། །དཔེར་ན་སྐྱེ་བོ་ཐམས་ཅད་སླུ་བར་བྱེད་པ་འབའ་ཞིག་པ་ཤིན་ཏུ་ལམ་ལོག་པ་སྟོན་པར་བྱེད་པ་དང་བསམ་པ་ངན་པ་སེམས་པར་བྱེད་པ་ཉེ་བར་སྟེན་པར་བྱེད་པ་ཡང་དེས་ནི་དོན་མ་ཡིན་པ་ཆེན་པོ་དང་ཀུན་ཏུ་སྦྱོར་རོ། །རླག་པར་བྱེད་པའི་རྩ་བ་དེ་ཡང་རྣམ་པ་གཉིས་ཡིན་ཏེ། རབ་ཏུ་འགེབས་པར་བྱེད་པ་དང་ངེས་པར་སྦེད་པར་བྱེད་པའོ། །དེ་ལ་རབ་ཏུ་འགེབས་པར་བྱེད་པ་ཞེས་བྱ་བ་ནི་འཇིག་རྟེན་པ་སླུ་བར་བྱེད་པ་རབ་ཏུ་དང་བ་མ་ཡིན་པར་གྱུར་པ་ཚུལ་འཆོས་པའི་རྟགས་འཛིན་པར་བྱེད་པ་ལས་ཅི་ཡང་མེད་པ་ཟོང་བཅོས་མ་དང་འདྲ་བའི་མུ་སྟེགས་ཀྱི་ཚེར་མས་རང་དང་གཞན་སླུ་བར་བྱེད་པ་འཇིག་རྟེན་ཕ་རོལ་སྤངས་པ་བཟང་པོའི་ཆ་བྱད་ཆེས་འཛིན་པར་བྱེད་པ་དོན་མ་ཡིན་པ་རྣམས་བྱེད་པར་འགྱུར་བ་པོ་རྐུན་མ་དེ་དག་རྣམས་ལ་ལེགས་པར་ཕྲད་པར་བྱ་བ་དང་ཀུན་བརྗོད་པར་ཡང་སླ་བར་སྦྱིན་པར་མི་བྱ་ན། ལྷན་ཅིག་ཏུ་འགྲོགས་པར་བྱ་བ་ལྟ་སྨོས་ཀྱང་ཅི་དགོས། དེ་དག་དང་ལྷན་ཅིག་པར་གྱུར་པ་ནི་དེས་ཤིན་ཏུ་བར་ཡང་སྤང་བར་བྱའོ། །དེ་དག་ལ་ནི་བདག་ཉིད་ལ་ཡང་ཡོད་པ་མ་ཡིན་ན་གཞན་དག་ལ་ཅི་ལ་འབྱུང་བར་འགྱུར། གང་སྡིག་པའི་གྲོགས་པོ་སྤོང་བར་གྱུར་པ་རྣམས་ཀྱིས་ནི། སྒྱུ་ཅན་ལ་རྗེས་སུ་བསྟེན་པར་མི་བྱའོ། །ཚུལ་འཆོས་པར་བྱེད་པ་དང་ཡང་མ་ཡིན་ལ་དེ་དག་དང་གྲོགས་པོ་མི་བྱེད་པས་ཡང་དག་པའི་ལེགས་པར་གཞིགས་ནས་བྱེད་པར་འགྱུར་རོ། །དེས་གྲོགས་པོ་རྩབ་ཧྲལ་ཅན་ལ་བསྟེན་པར་མི་བྱའོ། །དེ་དེ་ཉིད་ཀྱིས་བག་ཆགས་ཀྱིས་བསྒོས་པར་གྱུར་པ་ནི་ལུས་ཞིག་ནས་ཀྱང་མཐོ་རིས་བདེ་འགྲོའི་འཇིག་རྟེན་འཐབ་བྲལ་གྱི་ལྷ་རྣམས་ཀྱི་མངའ་བདག་རྒྱུ་རྐྱེན་དེས་བྱེད་པར་འགྱུར་རོ། །གཞན་ཡང་ཆོས་གཉིས་རྒྱལ་པོས་ཅི་ནས་ཀྱང་སྤང་བར་བྱ་སྟེ། གཉིས་པོ་གང་ཞེ་ན། འདི་ལྟ་སྟེ། ཁྲོ་བ་དང་རྒོད་པ་ཆེས་སྡོམ་པར་བྱེད་པའོ། །ཁྲོ་བ་དང་རྒོད་པའི་ཡང་གང་དག་ཤུགས་སྡོམ་པར་བྱེད་པའི་རྒྱལ་པོ་དེ་ནི་རྒྱལ་སྲིད་བརྟན་པར་འགྱུར་ཞིང་རང་བཞིན་བསྒོ་བར་བྱེད་པ་ཡིན་པས་ཕན་ཚུན་གྱིས་ཀྱང་མངོན་པར་གདུལ་བར་མི་ནུས་སོ། །འདི་ལ་འགའ་ཞིག་གིས་ཀྱང་གླགས་མི་རྙེད་དོ། །ཁྲོ་བ་སྡོམ་པར་བྱེད་པའི་རྒྱལ་པོ་དེ་དག་ནི་མ་བསམས་པར་བྱ་བ་རྣམས་བྱེད་པར་མི་འགྱུར་རོ།