།དེའི་ཕྱིར་རྒྱལ་པོས་རྟག་ཏུ་ངེས་པར་ལེགས་པར་སྟོན་པར་འགྱུར་བར་བྱའོ། །ངེས་པར་ལེགས་པར་སྟོན་པར་བྱེད་པའི་རྒྱལ་པོ་ཆོས་པ་གང་གིས་ཕྱིར་ལུས་ཞིག་པར་གྱུར་ནས་ཤི་བའི་འོག་ཏུ་མཐོ་རིས་བདེ་འགྲོའི་འཇིག་རྟེན་འཐབ་བྲལ་བའི་ལྷ་རྣམས་ཀྱི་མངའ་བདག་ཏུ་ལས་དེའི་རྒྱུ་དང་རྐྱེན་གྱིས་འགྱུར་རོ། །ཡང་ཆོས་གཞན་རྒྱལ་པོས་ཅིས་ཀྱང་བསྟེན་པར་བྱ་བ་ལ་འདི་ལྟ་སྟེ། གཉིད་ལ་དགའ་བར་མི་བྱ་བའོ། །གཉིད་ཀྱི་དབང་དུ་མི་འགྲོ་བའི་རྒྱལ་པོ་ནི་ལེགས་པར་བསམ་པར་བྱ་བ་རྣམས་སེམས་པར་འགྱུར་རོ། །བློ་ཤིན་ཏུ་རྣམ་པར་ཆགས་པ་དང་ལྡན་པར་མི་འགྱུར་རོ། །ཀུན་ཏུ་རྨོངས་པའི་བློར་ཡང་མི་འགྱུར་རོ། །དགྲ་བོས་བརྒལ་བར་མི་ནུས་སོ། །བློ་རྩེ་གཅིག་པར་འགྱུར་རོ། །དོན་ངེས་པར་ལྡན་པ་དང་དོན་ངེས་པ་དང་ལྡན་པར་གྱུར་ནས་ལེགས་པར་རྣམ་པར་དཔྱད་པའི་དོན་དག་བྱེད་པར་འགྱུར་རོ། །དེ་ལ་ལེགས་པར་རྣམ་པར་དཔྱད་ནས་བྱེད་པ་པོ་འདིའི་ལེགས་པར་དོན་རྣམས་སྨིན་པར་འགྱུར་རོ། །ལེགས་པར་འགྲུབ་པར་དུས་ཡུན་རིང་པོ་མ་ཡིན་པ་ན་འགྱུར་ཞིང་དུས་སྔ་བར་རྫོགས་པར་འགྱུར་བ་ཡིན་ནོ། །བག་དང་ལྡན་པར་འགྱུར་རོ། །བག་ཡོད་པས་རྒྱུ་བ་དང་དེའི་ཚེ་རིང་བར་འགྱུར་རོ། །ལེགས་པར་བསམ་པ་རྣམས་སེམས་པར་གྱུར་པས་ལེགས་པར་སེམས་པ་པོ་དེའི་རང་བཞིན་གྱིས་ཡིད་བྱུང་བར་མི་འགྱུར་རོ། །དེ་སྐྱེ་བོ་རྣམས་དང་གྲོང་ཁྱེར་རྣམས་དང་བློན་པོ་དག་གིས་ཡོངས་སུ་བསྐོར་བར་འགྱུར་རོ། །ནོར་དང་ལྡན་པར་ཡང་འགྱུར་རོ། །སྐྱེ་བོ་མང་པོ་ལ་ཡང་རྒྱལ་པོའི་ནོར་གནས་པ་ཉིད་ཀྱིས་ནོར་དང་ལྡན་པའི་དཔལ་ཀུན་ཏུ་གནས་པས་དཔལ་དང་ལྡན་པར་གྱུར་ནས་སྦྱིན་པ་གཏོང་བར་ཡང་བྱེད་དོ། །ཚུལ་ཁྲིམས་ཀྱང་སྲུང་བར་བྱེད་དོ། །དེ་ལུས་ཞིག་པར་གྱུར་ནས་ཤི་བའི་འོག་ཏུ་དེའི་རྒྱུ་དང་རྐྱེན་གྱིས་མཐོ་རིས་བདེ་འགྲོའི་འཇིག་རྟེན་འཐབ་བྲལ་བའི་ལྷ་རྣམས་ཀྱི་མངའ་བདག་ཏུ་འགྱུར་རོ། །ཆོས་གཞན་ཡང་རྒྱལ་པོས་རབ་ཏུ་བརྩོན་པས་བྱ་བར་བྱའོ། །འདི་ཡང་གང་ཞེ་ན། འདི་ལྟ་སྟེ། ལེ་ལོ་མེད་པའོ། །ལེ་ལོ་མེད་པར་གྱུར་པའི་རྒྱལ་པོ་ནི་བརྩོན་འགྲུས་བརྟན་པར་གྱུར་པའི་རིགས་པས་བརྩམས་པའི་ཕྱིར་ན་ལས་ཐམས་ཅད་ཀྱང་རྒྱས་པར་བྱེད་དོ།