གཞན་གྱི་ཡོན་ཏན་དང་ཀུན་དུ་སོ་སོར་འབྲེལ་བས་དོན་བྱེད་པ་དང་མ་ཡིན་ཏེ། དེ་ནི་རྒྱལ་པོ་གཞན་གྱིས་ཉེ་བར་འཚོ་བར་འགྱུར་རོ། །འདྲ་བ་མ་ཡིན་པ་མ་ཡིན། ཡུལ་དུས་མི་ཤེས་པ་མ་ཡིན། བསྒྲུབ་པར་དཀའ་བ་མ་ཡིན། རྟག་ཏུ་སྡིག་པ་དྲག་པོ་བྱེད་པ་མ་ཡིན། ཡུལ་གྱིས་རབ་ཏུ་དཀྲུགས་པ་རྣམས་ཀྱང་མ་ཡིན། གཡོ་སྒྱུའི་རྒྱུ་སྨྲ་བ་ཡང་མ་ཡིན། ངོ་བོ་ཉིད་ཀྱི་བཤེས་ཀྱིས་ཆོག་ཤེས་པ་མ་ཡིན། འཇིག་རྟེན་ལ་མི་ཕན་པ་མ་ཡིན། གཞན་དུ་སྡིག་པ་བྱས་པ་མ་ཡིན། མངོན་པའི་ང་རྒྱལ་ཅན་མ་ཡིན། དགྲ་བོ་མ་ཡིན། སྡུག་བསྔལ་ཅན་མ་ཡིན། ངག་རྩབ་ཧྲལ་ཅན་མ་ཡིན། ཡིད་རྩབ་ཧྲལ་ཅན་མ་ཡིན་པ་སྟེ། རྣམ་པ་དེ་ལྟ་བུའི་སྐྱེས་བུ་ངན་པ་འཛིན་པར་མི་བྱེད་དོ། །རྒྱལ་པོས་རྣམ་པ་ཇི་ལྟ་བུ་རྣམས་འཛིན་པར་བྱེད་ན་འདི་ལྟ་སྟེ། ཆོས་པ་དང་ཚུལ་འཆོས་ཅན་མ་ཡིན་པ་དང་། ང་རྒྱལ་ཅན་མ་ཡིན་པ་དང་། བདེན་པར་སྨྲ་བ་དང་། ཤེས་རབ་ཅན་དང་། ཡིད་གཞུངས་པ་དང་། བརྟན་པ་དང་གཞན་ལ་གདུང་བར་མི་བྱེད་པ་དང་། དྲང་པོ་དང་གཡོ་རྣམས་སྤངས་པ་དང་། ཆེས་མཆོག་ཏུ་དཀོན་མཆོག་གསུམ་མཆོད་པར་བྱེད་པ་དང་། སེམས་ཆོག་ཤེས་པ་ཐོབ་པ་དང་། དབང་དུ་གྱུར་པ་དང་། རྒྱུན་དུ་ལས་ཀྱི་རང་བཞིན་ཅན་དང་། འཇིག་རྟེན་པ་རྣམས་བློ་འཐུན་པ་དང་། སྙིང་རྗེ་དང་ལྡན་པ་དང་། མི་རྣམས་ཀྱིས་བསྔགས་པ་ལ་རྗེས་སུ་ཆགས་པར་འགྱུར་བ་དང་། ཡང་དག་པའི་ལྟ་བ་ཅན་དང་ཤེས་ཉེན་ཅན་དང་། དུལ་བ་དང་སྐྱེས་པ་ནས་བཟུང་ནས། ལུས་དང་། ངག་དང་། ཡིད་དག་པར་བྱེད་པ་པོ་མེད་པར་སྨྲ་བ་མ་ཡིན་པ་དང་། རྒྱུ་རྐྱེན་ལ་ཤིན་ཏུ་བར་ཡང་རྟེན་པ་དང་ལས་ཀྱི་འབྲས་བུ་རྣམ་པར་སྨིན་པ་ཤེས་པ་དང་། བག་མེད་པ་མ་ཡིན་པ་དང་། གཉིད་ཀྱི་དབང་དུ་སོང་བའི་རང་བཞིན་ཅན་མ་ཡིན་པ་དང་། དགེ་བའི་བཤེས་གཉེན་ལ་སྟེན་པར་བྱེད་པ་པོ་དང་། གཏོང་བ་ཅན་དང་། ཚུལ་ཁྲིམས་དང་ལྡན་པ་དང་། ཤེས་རབ་དང་ལྡན་པ་དང་། རྣམ་པ་དེ་ལྟ་བུའི་སྐྱེས་བུ་རྣམས་རྟག་པ་ཁོ་ནར་རྒྱལ་པོ་གང་དག་གིས་འཛིན་པར་བྱེད་པ་དེ་དག་ནི་ཁྱད་པར་ཤེས་པ་ཡིན་ནོ། །གང་ལས་གང་ལ་ངེས་པར་སྦྱོར་བར་བྱེད་པའི་རྒྱལ་པོ་དེ་ནི་གཞན་དག་གིས་རྒྱལ་སྲིད་ལས་ཉམས་པར་བྱ་བར་མི་ནུས་སོ།