།སྐྱེ་བོ་རྣམས་ཐམས་ཅད་ཀྱིས་ཀྱང་ཆོས་ལུགས་རྣམ་པར་གཞག་པ་ལ་གཅིག་ཏུ་ཚད་མར་བྱེད་དོ། །རྣམ་པར་མ་གཙེས་པའི་སྐྱེས་བུ་རྣམས་ཀྱིས་ཀྱང་ནོར་ཆེན་པོའི་སྦས་དང་སྦས་པ་ཡང་རྒྱལ་པོ་ལ་སྟོན་པར་བྱེད་དོ། །བདེན་པར་སྨྲ་བ་ཞེས་ཟེར་ནས་ཐམས་ཅད་ལས་མི་གཡོ་བ་བཞིན་དུའོ། །ཐམས་ཅད་ལས་ཀྱང་གཡོ་བ་མེད་པར་འགྱུར་རོ། །གྲོགས་པོས་འཁྲིད་པར་མི་བྱེད་དོ། །གྲོགས་པོ་མ་ཡིན་པས་འཁྲིད་པར་མི་བྱེད་དོ། །རྣམ་པར་གཡོ་བར་མི་བྱེད་དོ། །གང་བདེན་པར་སྨྲ་བའི་མགྲིན་པ་རབ་ཏུ་རྩེ་དགའ་བར་གྱུར་ཏེ་བདེན་པའི་ཚིག་གིས་བློ་དེ་ཚིམ་པར་བྱས་པ་ལྟ་བུར་གྱུར་ནས་དགའ་བར་འགྱུར་རོ། །བདེན་པའི་ནོར་དེ་ལ་དགའ་བར་གྱུར་པའི་རྒྱུས་ཡང་དང་ཡང་དུ་བསམ་པར་བྱེད་པ་ན་ཡིད་ཁྲོ་བ་དང་དགའ་བ་ཡ་ཡ་པོས་མི་ཁྲིད་དོ། །དྲང་སྲོང་གི་མཆོག་འཇིག་རྟེན་གཉིས་སུ་ཕན་པར་བྱེད་པ་རྣམས་ཀྱི་བཅུད་དུ་གྱུར་པའི་བདེན་པའི་མཚམས་དེ་ལས་ནམ་ཡང་འདའ་བར་མི་འགྱུར་རོ། །ཆུ་མེད་པར་ཡང་བདེན་པའི་རང་བཞིན་གྱིས་མཆོག་ཏུ་གཙང་བའི་བདེན་པའི་འཇུག་ངོས་སུ་འཁྲུ་བ་རྣམས་ནི་མཆོག་ཏུ་གཙང་བར་འགྱུར་རོ། །གོས་མེད་པར་གྱུར་ཡང་མཆོག་ཏུ་དཀར་བ་མ་བཏགས་པ་བདེན་པའི་གོས་མཆོག་ཏུ་རྒྱ་ཆེ་བ་སྐད་ཅིག་མ་ཡིན་པར་རྟག་ཏུ་ལེགས་པར་གྱོན་པར་འགྱུར་རོ། །དྲི་མེད་པར་གྱུར་ན་ཡང་འདིའི་སྙན་པའི་ཚུལ་ཁྲིམས་ཀྱི་དྲིས་ཕྱོགས་དང་ཕྱོགས་མཚམས་རྣམས་སུ་རབ་ཏུ་འགྲོའོ། །འདི་མ་མཐོང་བར་གྱུར་པའི་སྐྱེ་བོ་ཐམས་ཅད་ཀྱང་གྲོགས་པོ་ཉིད་དུ་འགྱུར་རོ། །མཐོང་བ་རྣམས་ནི་དང་པོར་ཡིན་ནོ། །རི་རབ་ལྷུན་པོའི་རྩེ་མོ་ཡང་འདིས་ངེས་པར་རྒལ་ནས་འགྲོ་བར་འགྱུར་ཏེ། ཇི་ལྟར་འོད་ཟེར་མཆོག་གིས་བརྟོལ་ཞིང་ཕུག་པར་འགྱུར་བ་བཞིན་དུ་རབ་ཏུ་འཕྲོ་བར་འགྱུར་རོ། །རྒན་པོ་རྣམས་ཀྱིས་ཕ་བཞིན་དུ་མཆོད་པར་བྱེད་དེ་བདེན་པས་རྒན་པར་གྱུར་པ་ཞེས་བྱས་སོ། །ཚེ་རིང་བར་གྱུར་འཕེན་པར་བྱེད་པའི་ལས་རྣམས་ཀྱང་འཕེན་པར་བྱེད་དོ། །ཇི་སྲིད་དུ་བླ་ན་མེད་པ་ཡང་དག་པར་རྫོགས་པའི་སངས་རྒྱས་ཀྱི་ཡེ་ཤེས་ཀྱི་ལས་འཕེན་པར་བྱེད་ན་འཐབ་བྲལ་གྱི་མངའ་བདག་ལ་ལྟ་སྨོས་ཀྱང་ཅི་དགོས།