།དེ་གཞི་དེ་ལ་རབ་ཏུ་གནས་པར་མི་བྱེད་པ་དང་། དེ་ལ་རབ་ཏུ་ཞེ་སྡང་བར་བྱེད་པ་དང་། དེ་ལ་རྣམ་པར་གཤེ་བར་བྱེད་པ་དང་། དེ་ཡོངས་སུ་སྤོང་བར་འགྱུར་རོ། །ལོག་པར་ལྟ་བ་དང་ལྡན་པར་གྱུར་པའི་རྒྱལ་པོ་ནི་སྐྱེ་བོ་ཐམས་ཅད་ཀྱི་རྗེས་སུ་མི་འཐུན་པར་འགྱུར་རོ། །མི་འཐུན་པས་དུས་ཐམས་ཅད་དུ་ཡུལ་ལྗོངས་པ་རྣམས་ཐམས་ཅད་ཀྱིས་ཡོངས་སུ་སྤོང་བར་བྱེད་དེ་འདི་མི་བཟོད་དོ། །ཆོས་དང་ལྡན་པའི་ལྷ་དག་གིས་ཀྱང་ཡོངས་སུ་སྤོང་བར་འགྱུར་རོ། །ཡོངས་སུ་སྤངས་པར་གྱུར་པ་དེ་མོས་པ་མང་པོ་དང་མི་ལྡན་པར་འགྱུར་རོ། །དེའི་ཕྱིར་རྒྱལ་པོ་ལོག་པར་ལྟ་བ་ཅན་མ་ཡིན་པ་ཡང་དག་པར་ལྟ་བ་ཅན་གྱི་རྒྱལ་པོ་ནི་ཡང་དག་པར་སྐྱེ་དགུ་ལ་ཕན་པར་གནས་པར་འགྱུར་རོ། །ཡུལ་བ་རྣམས་ཐམས་ཅད་ཀྱིས་མཆོད་པར་འགྱུར་རོ། །ལྷ་ཆོས་པ་དག་གིས་ཀྱང་ཡོངས་སུ་མི་གཏོང་ངོ་། །ཡུལ་ལྗོངས་ཐམས་ཅད་ཀྱི་རྗེས་སུ་མི་འཐུན་པ་མ་ཡིན་པར་འགྱུར་རོ། །འདིས་ཀུན་དུ་བརྟགས་པ་ཐམས་ཅད་ཀྱང་ཕུན་སུམ་ཚོགས་པར་འགྱུར་རོ། །འདིའི་ཡིད་ལ་བསམས་པ་ཐམས་ཅད་ཀྱང་ཕུན་སུམ་ཚོགས་པར་འགྱུར་རོ། །རང་བཞིན་གྱིས་ཀྱང་ཕྱིས་འགྱོད་པ་ཅན་དུ་མི་འགྱུར་རོ། །དེ་དུས་རིང་བར་ཉེས་པ་མེད་པའི་རྒྱལ་སྲིད་བྱས་པར་གྱུར་ནས་ལུས་ཞིག་སྟེ། མཐོ་རིས་བདེ་འགྲོའི་འཇིག་རྟེན་འཐབ་བྲལ་བའི་ལྷ་རྣམས་ཀྱི་མངའ་བདག་ཏུ་རྒྱུ་དེ་དག་དང་རྐྱེན་དེས་འགྱུར་རོ། །ཡང་གཞན་རྒྱལ་པོ་རྒྱལ་རིགས་སྤྱི་བོ་ནས་དབང་བསྐུར་བས་བྱ་བར་བྱ་སྟེ། འདི་ཡང་གང་ཞེ་ན། འདི་ལྟ་སྟེ། གཏོང་བ་ཅན་དུ་གྱུར་པའོ། །རྒྱལ་པོ་འདིའི་མཆོག་ཏུ་ཁྲེལ་ཡོད་པའི་རྩ་བ་དེ་ནི་གང་སྦྱིན་པ་ཞེས་བྱ་བ་དེས་འཇིག་རྟེན་པའི་ཕན་པའི་ལམ་རབ་ཏུ་སྒྲུབ་བོ། །འཇིག་རྟེན་ལས་འདས་པ་དང་འཇིག་རྟེན་པ་ཡང་རེ་ཞིག་སྦྱིན་པ་ལས་ཡིན་ཏེ། གཏོང་བར་བྱེད་པ་ན་རྒྱལ་པོའམ་རྒྱལ་པོའི་བློན་པོ་ལ་ཡང་རུང་སྟེ། སྟེར་བའི་སྐྱེ་བོ་དེ་ལ་ཡུལ་ལྗོངས་པ་ཐམས་ཅད་རང་བཞིན་གྱིས་མཆོག་ཏུ་དགའ་བར་འགྱུར་རོ། །ཡོངས་སུ་སྤོང་བར་མི་བྱེད་དོ། །གཤེ་བ་དང་། སྨོད་པར་ཡང་མི་བྱེད་དེ། ཡུལ་འཁོར་གཞན་དུ་ཉེ་བར་འཕོས་ནས་མི་འགྲོའོ།