མཆོད་སྦྱིན་དང་ཕྱུགས་གསོད་པར་བྱེད་པ། སྐྱེས་བུ་ཐ་ཆད་དུ་གྱུར་པ། སྐྱེས་བུ་ཕྱིན་ཅི་ལོག་འཛིན་པ། ཕ་མ་ལ་གུས་པ་མེད་པ་དང་རྣམ་པ་དེ་ལྟ་བུར་གྱུར་པ་རྣམས་ཡུལ་དུ་འཛིན་པར་མི་བྱེད་དོ། །དེ་དང་བསྟེན་འགྲོགས་བྱས་པར་གྱུར་པའི་སྐྱོན་གྱིས་སྐྱེས་བུ་གཞན་དག་དགེ་བའི་སེམས་དང་ལྡན་པ་རྣམས་ཀྱང་རབ་ཏུ་ཆུད་གཟོན་པར་བྱེད་དོ། །དེ་དག་རྣམས་ལ་བསྟེན་པའི་སྐྱོན་གྱིས་དེ་དག་ཆུད་གཟན་པས་འདིའི་མངའ་བྱེད་པ་རྣམས་ཡོངས་སུ་ཉམས་པར་འགྱུར་རོ། །དུས་མ་ཡིན་པར་ཆར་འབབ་པར་འགྱུར་རོ། །དུས་མ་ཡིན་པར་ལྷས་ཤིན་ཏུ་ཚ་བར་བྱེད་དོ། །དུས་མ་ཡིན་པར་ལོ་ཏོག་རྫོགས་པར་བྱེད་དོ། །ཡུལ་ལྗོངས་བརླག་པར་ཡང་འགྱུར་ཏེ། སྡིག་པ་བྱེད་པ་པོ་དེ་རྣམས་ཀྱི་ཉེས་དམིགས་ཆེན་པོས་སོ། །རྒྱུ་དེས་ན་ཆོས་བྱེད་པ་རྣམས་འཛིན་པ་ཡིན་ནོ། །སྐྱེས་བུ་ཆོས་བྱེད་པ་ཀུན་དུ་བཟུང་བས་ཀྱང་ལྷས་དུས་སུ་ཆར་འབེབས་སོ། །དུས་སུ་རླུང་རྒྱུའོ། །དུས་སུ་ལོ་ཏོག་རྫོགས་པར་བྱེད་དོ། །ཡུལ་ལྗོངས་བརླག་པར་ཡང་མི་འགྱུར་རོ། །འཇིགས་པ་དང་། མྱ་ངན་དང་། ཡ་ང་བ་དང་སྐྱེ་དགུ་རྣམས་བྲལ་བར་འགྱུར་རོ། །སྐྱེས་བུ་ཆོས་བྱེད་དེ་དག་མངའ་བྱེད་པར་གྱུར་པས་འདུ་བྱེད་རྣམས་ཐམས་ཅད་ཀྱི་སྡུག་བསྔལ་རྣམ་པར་ཆད་པར་བྱེད་དོ། །སྐྱེས་བུ་ཆོས་བྱེད་ལེགས་པར་འཛིན་ཅིང་སྟེན་པར་བྱེད་པ་འདིའི་སྙིང་པོའི་མཆོག་ནི་ཚངས་པར་སྤྱོད་པའོ། །འདི་ལྟ་སྟེ། སྐྱེས་བུ་ཆོས་བྱེད་རྣམས་སྟེན་པའམ། ལེགས་པར་འཛིན་པར་བྱེད་པའོ། །དེའི་ཕྱིར་ན་བློ་དང་ལྡན་པར་གྱུར་པའི་རྒྱལ་རིགས་རྒྱལ་པོར་སྤྱི་བོ་ནས་དབང་བསྐུར་བས་སྐྱེས་བུ་ཆོས་བྱེད་པ་ལ་ཀུན་དུ་བསྟེན་པར་བྱའོ། །དེ་ལས་ཀྱང་འཇིག་རྟེན་གཉིས་སུ་ཕན་པར་འགྱུར་རོ། །ལུས་ཞིག་པར་གྱུར་ནས་ཀྱང་མཐོ་རིས་བདེ་འགྲོའི་འཇིག་རྟེན་འཐབ་བྲལ་གྱི་ལྷ་རྣམས་ཀྱི་མངའ་བདག་ཏུ་འགྱུར་ཏེ། ལས་དེའི་རྒྱུ་དང་རྐྱེན་གྱིས་སོ། །གང་གིས་སྡིག་པའི་གྲོགས་པོ་དང་སྟེན་པར་མི་འགྱུར་བ་ལ་སྡིག་པའི་གྲོགས་པོ་ཡང་རྣམ་པ་བརྒྱད་སྤང་བར་བྱ་སྟེ། འདི་ལྟ་སྟེ། མེད་པར་སྨྲ་བར་གྱུར་པ་གང་གིས་སྦྱིན་སྲེག་མེད་དོ། །