།རྒྱལ་རིགས་རྒྱལ་པོར་སྤྱི་བོ་ནས་དབང་བསྐུར་བ་དག་དེ་མཆོད་པར་བྱེད་པས་འདི་ལ་རྟག་ཏུ་ཕན་པར་འགྱུར་བ་དང་། ལུས་ཞིག་ནས་ཀྱང་མཐོ་རིས་བདེ་འགྲོའི་འཇིག་རྟེན་འཐབ་བྲལ་བའི་མངའ་བདག་ཏུ་འགྱུར་ཏེ། དགེ་བའི་ལས་དེའི་རྐྱེན་རྣམས་དང་དགེ་བ་དེ་དག་གི་རྒྱུ་ལས་སོ། །གཞན་ཡང་རྒྱལ་རིགས་རྒྱལ་པོར་སྤྱི་བོ་ནས་དབང་བསྐུར་བ་ལ་གཅེས་པར་འགྱུར་བའི་ཆོས་སུ་གྱུར་པ་དག་གིས་འཇིག་རྟེན་གཉིས་སུ་ཕན་པར་གྱུར་པ་ནི་འདི་ལྟ་སྟེ། སྔར་བྱིན་ནས་ཕྱིས་ཀྱང་སྟེར་བར་གྱུར་པའོ། །གང་ཡང་ཕས་སམ་མེས་པོས་སམ་ཡང་མེས་པོས་སམ་གཞན་གྱིས་སམ་དེ་དག་དང་དེ་ལས་གཞན་པ་རྣམས་ཀྱིས་ཀྱང་རུང་སྟེ་རྟག་ཏུ་གང་བྱིན་པར་གྱུར་པ་ལས་གཞིའམ་དབྱིག་ལ་སོགས་པ་རྣམས་འདྲེན་མ་དང་རྙོག་མ་ཅན་དུ་གྱུར་པའི་སེམས་མ་ཡིན་པས་དང་ཕན་པ་དང་མཆོག་ཏུ་དང་བས་དེ་དག་ལ་རྗེས་སུ་ཡི་རང་བར་བྱེད་ཅིང་དེ་དག་ཉིད་ལ་དགའ་བ་དང་། སླར་ཉིད་ཡང་སྦྱིན་པ་བསྔགས་པར་བྱེད་དོ། །གཞན་ཡང་སྦྱིན་པ་རྗེས་སུ་གཏོང་བ་ལ་རབ་ཏུ་འཇུག་པར་བྱེད་དོ། །དེ་ཉིད་ཀྱང་དེ་བཞིན་དུ་རབ་ཏུ་གནས་པ་དང་རབ་ཏུ་འཇུག་པར་བྱེད་པ་གང་ཡིན་པའི་རྒྱལ་རིགས་རྒྱལ་པོར་སྤྱི་བོ་ནས་དབང་བསྐུར་བ་འདིའི་ལུས་ཞིག་ནས་ལས་དེ་དག་རྣམས་ཀྱི་རྒྱུ་དང་། རྐྱེན་དེ་དག་གིས་ཀྱང་མཐོ་རིས་བདེ་འགྲོའི་འཇིག་རྟེན་འཐབ་བྲལ་བའི་མངའ་བདག་ཏུ་སྐྱེ་བར་འགྱུར་རོ། །ཆོས་གཞན་ཡང་རྒྱལ་རིགས་སྤྱི་བོ་ནས་དབང་བསྐུར་བའི་འཇིག་རྟེན་གཉིས་སུ་དོན་དང་། ཕན་པ་དང་། བདེ་བར་འགྱུར་བ་འདི་ཡང་གང་ཞེ་ན། འདི་ལྟ་སྟེ། སྦྱིན་པའོ། །སྦྱིན་པ་ཞེས་བྱ་བ་ཡང་གནས་སྐབས་ཐམས་ཅད་དང་། ཐམས་ཅད་ཉིད་ལ་དང་། རྣམ་པ་ཐམས་ཅད་དུ་དང་། དུས་ཐམས་ཅད་དུ་དང་། བློ་གྲོས་ཐམས་ཅད་ལ་ཡང་ཕན་པར་འགྱུར་བ་དང་། བདེ་བར་འགྱུར་བ་དང་། ཐམས་ཅད་ནས་འགྲོ་བ་ཐམས་ཅད་དུ་ཡང་དམྱལ་བ་དང་། ཡི་དགས་དང་། དུད་འགྲོར་སྐྱེས་པ་རྣམས་ལ་ཡང་བཀྲེས་པ་རྣམ་པར་འཇོམས་པ་དང་། སྐོམ་པ་རྣམ་པར་འཇོམས་པར་བྱེད་པ་ཡིན་ན་ལྷ་དང་མི་རྣམས་ལ་འབྱུང་བར་འགྱུར་བ་ལ་ལྟ་སྨོས་ཀྱང་ཅི་དགོས། གཏོང་བ་ཅན་གྱི་རྒྱལ་པོ་ནི་མཐོང་བའི་ཚེ་འབྲས་བུ་དང་ཡང་ལྡན་པ་ཡིན་ནོ།