ཆུ་ཀླུང་དང་འབབ་ཆུས་རྣམ་པར་བརྒྱན་པ་ལྗོན་ཤིང་གི་ནགས་དུ་མས་ཉེ་བར་རྒྱས་པ་རྣམས་ལ་རི་དགས་དང་བྱའི་ཚོགས་རྣམ་པ་སྣ་ཚོགས་པ་རྣམ་པར་བཀྲ་བར་གྱུར་པས་སྤྲས་པའི་རིན་པོ་ཆེ་བདུན་གྱི་རང་བཞིན་གྱི་ཤིང་འཁྱིལ་པ་བརྒྱངས་པའི་ཁང་པ་རྣམས་ཀྱིས་ཉེ་བར་མཛེས་པར་གྱུར་པ། ཀུ་ཧ་ར་དང་སྐད་སྙན་པ་དང་བྱའི་ཚོགས་གཞན་རྣམས་ཀྱི་སྐད་རྣམས་ཀྱིས་ཀྱང་ཐོས་ན་དགའ་བར་འགྱུར་བ་དང་རིན་པོ་ཆེའི་བཞོན་པས་ཀྱང་ཆུ་ཀླུང་བརྒྱན་པར་གྱུར་པ་སྟེ་དེས་རྣམ་པ་དེ་ལྟ་བུའི་ནགས་ལེགས་པར་རྗེས་སུ་ཐོབ་ནས། ལྷ་དེ་དག་རི་དེ་ལ་ལན་བརྒྱ་ཕྲག་རྣམས་དང་གལ་ཏེ་ན་ལན་སྟོང་ཕྲག་དུ་ཡང་གར་བྱེད་པར་གྱུར་པ་དང་གླུ་ལེན་པར་གྱུར་པ་ཕན་ཚུན་ལྷན་ཅིག་ཏུ་དེ་དག་གིས་ནགས་དེར་མཐར་གྱིས་སླེབ་པར་གྱུར་ནས་དུས་ཡུན་རིང་པོར་དགའ་བར་བྱེད་དོ། །ལྷན་ཅིག་སྤྱོད་པ་དང་བཅས་པ་དང་ཕན་ཚུན་གཡོག་བྱེད་པར་གྱུར་པས་ཀྱང་ཡུལ་རྣམས་ཀྱི་འདོད་པ་ལས་ཕྱིར་ཞིང་ངོམས་པ་མེད་པར་གྱུར་ནས་ལྷ་དེ་དག་རྣམས་རིའི་ཕྲེང་བའི་རི་བོ་དེ་ཉིད་ལ་ལན་གྲངས་དུ་མར་རྣམ་པར་སྤྱོད་པར་བྱེད་དོ། །བག་མེད་པར་གྱུར་པས་དེ་དག་གི་གཞན་ཡང་མཐོང་བར་གྱུར་པ། མཆོག་ཏུ་དགའ་བར་གྱུར་པའི་རི་བོ་དེ་ཉིད་ཀྱི་ནགས་རིའི་ཉེ་འཁོར་ཞེས་བྱ་བའོ། །ནགས་དེ་ན་དྲི་ཞིམ་པོ་འདི་དག་རྣམས་ཡོད་དེ། ཤིང་འཁྲིལ་པ་དུད་པ་རྣམས་ཀྱི་མེ་ཏོག་དང་གསེར་གྱི་ཤིང་འཁྲིལ་པ་རྣམ་པར་བརྒྱངས་པ་ལས་ཀུན་ཏུ་བྱུང་བ་དང་པད་མའི་བཞོན་པ་རྣམས་དང་མཆོག་ཏུ་དྲི་ཞིམ་པ་རྣམས་དང་མན་དཱ་ར་བའི་ལྗོན་ཤིང་རྣམས་དང་ལྷ་རྫས་ཀྱི་མེ་ཏོག་གཞན་རྣམས་ཀྱང་སྟེ་དྲི་རྣམས་ནི་ཉེ་འཁོར་ཁོར་ཡུག་ཏུ་དཔག་ཚད་བརྒྱར་རླུང་གིས་འདེབས་སོ། །ལྷ་རྣམས་ཀྱང་ངོ་མཚར་བར་བྱེད་པའི་དྲི་བླ་ན་མེད་པ་རྣམས་དང་མཆོག་ཏུ་དྲི་ཞིམ་པར་གྱུར་པ་ཡང་རྣམ་པ་དུ་མ་རྣམས་སོ། །དེ་དག་རྣམས་སྣོམ་པར་བྱེད་པས་ལྷ་དེ་དག་ནགས་དེར་རབ་ཏུ་འཇུག་པར་བྱེད་དེ། མཆོག་ཏུ་མཛེས་པར་གྱུར་པ་རྣམས་ཕན་ཚུན་ལྷན་ཅིག་ཏུ་རྒྱགས་པ་ལ་དོན་གཅིག་པ་ཡུལ་གྱི་བདེ་བས་ངོམས་པ་མེད་པར་གྱུར་པས་ཡོངས་སུ་སྐོར་བར་བྱེད་དོ། །རྣམ་གྲངས་དུ་མར་དེ་དག་རྣམས་དེ་ལྟར་རྣམ་པར་རྒྱུ་བར་གྱུར་པ་དང་རྩེ་བར་གྱུར་པས་གང་ན་རིའི་ཕྲེང་བའི་རི་བོ་དེ་ཉིད་ཀྱི་མགོ་བོ་ཡོད་པ་དེ་ལ་ཉེ་བར་འགྲོ་བར་བྱེད་དོ།