།མཆོག་ཏུ་སྙན་པའི་གླུའི་སྒྲས་རྟག་ཏུ་གར་བྱེད་པར་གྱུར་ཅིང་དུས་ཐམས་ཅད་དུ་རྒྱགས་པའི་བདེ་བ་ཤིན་ཏུ་རྒྱ་ཆེན་པོ་དང་ལྡན་པས་ཐམས་ཅད་ཉིད་ལས་ཀྱང་དགའ་བར་གྱུར་པར་མཐོང་བ་རྣམས་ཀྱི་བྱ་འདི་དག་དང་དེ་དག་དང་གཞན་དག་རྣམས་ཀྱི་སྙན་པ་ཀུན་ནས་བརྗོད་པའི་རྣར་སྙན་པའི་གླུ་རྣམས་ཉན་པར་བྱེད་དོ། །དེ་བཞིན་དུ་ནགས་ཀྱི་ནང་ན་རྒྱུ་བ་རྣམས་ལ་རྨ་བྱ་དང་པཱ་རཱ་བ་ད་དང་ཤིང་གི་རྒྱན་དང་རི་ཁྲོད་ཀྱི་གསེབ་དང་ཚང་ཚིང་ན་གནས་པ་རྣམས་ཀྱང་ཤིན་ཏུ་སྙན་པར་གྱུར་པའི་གྲེ་བར་བྱ་རྣམས་ཐམས་ཅད་ཀྱང་འདྲ་བར་གྱུར་པའི་སྒྲའི་སྤྲིན་ཚོགས་རྣམས་ཚང་ཚིང་དང་རིའི་རྒྱན་དང་རིན་པོ་ཆེ་བདུན་གྱིས་རྣམ་པར་བཀྲ་བར་བྱས་པའི་ལུས་མཐོང་ན་ཤིན་ཏུ་ཚད་མེད་པར་ལྷ་རྣམས་ཀྱི་ཡིད་དུ་འོང་བ་ཐོས་ན་ཤིན་ཏུ་དགའ་བར་འགྱུར་བའི་སྒྲ་རྒྱན་གྱི་འོད་ཟེར་གྱི་རྒྱུན་རྣམས་སྐྱེད་པར་བྱེད་པ་སོ་སོར་མཛེས་པ་རྣམས་སྐྱེད་པར་བྱེད་པས་མཐོང་ན་དགའ་བར་གྱུར་པའི་རྟག་པར་རྒྱགས་པ་ལ་སོགས་པའི་མཐོང་བར་གྱུར་པ་དང་ཐོས་པར་གྱུར་པ་ལས་མཆོག་ཏུ་དགའ་བར་འགྱུར་བ་རྒྱན་གསར་པ་རྣམས་ཀྱིས་བརྒྱན་པ་རྣམས་ལས། ཇི་ལྟར་གཙོ་བོར་གྱུར་པའི་བྱ་རྣམས་དག་གི་སྒྲ་འགའ་ཞིག་ཙམ་ཉན་པར་བྱེད་དོ། །ཁ་ཅིག་ནི་ཅ་ཅོ་འདོན་ནོ། །ཁ་ཅིག་ནི་གླུ་ལེན། ཁ་ཅིག་ནི་གནས་པར་བྱེད་དོ། །ཁ་ཅིག་ནི་སྒྲའི་སྤྲིན་རྣམས་ཉིད་དེ། དེ་ལྟར་རྣམ་པ་དུ་མ་དང་རྣམ་པར་རྟོག་པ་དུ་མ་དང་ལྡན་པར་རྟག་ཏུ་རྒྱུན་མི་འཆད་པར་ཡང་བརྗོད་པ་དང་དབྱངས་དང་ལྡན་པས་ཀུན་ཏུ་རྗོད་པར་བྱེད་དོ། །བྱ་དེ་དག་རྣམས་ཀྱིས་མཆོག་ཏུ་དགའ་བར་གྱུར་པའི་བརྗོད་པ་རྣམས་འབྱིན་པར་བྱེད་དོ། །ལྷ་དེ་དག་ཆགས་པའི་སེམས་ཀྱིས་ཐམས་ཅད་ཉན་པར་བྱེད་དོ། །ལྷ་དག་གིས་ཡོངས་སུ་བསྐོར་བར་གྱུར་ནས་ཆེས་རབ་ཏུ་དགའ་བར་གྱུར་པའི་ཡིད་ཀྱིས་ཏེ། དེ་རྣམས་ཀྱིས་དེ་ལྟར་ཐོས་ནས་དུས་ཤིན་ཏུ་རིང་བར་ཡང་ཆེས་ཕལ་ཆེ་བར་གྱུར་པའི་སྲེད་པ་རྣམས་ཀྱིས་ནོན་པར་གྱུར་པས་རྩི་དག་འཐུང་བ་རྩོམ་པར་བྱེད་དོ། །རོ་དང་དྲི་མཆོག་ཏུ་ཕུན་སུམ་ཚོགས་པར་གྱུར་པ་ལྷའི་འཇིག་རྟེན་དང་འདྲ་བར་གྱུར་པ་རི་ཁྲོད་ཀྱི་ཕུག་གི་གསེབ་ནས་འབབ་པ་རྣམས་ལ་བུང་བའི་ཚོགས་ཀྱིས་ཉེ་བར་མཛེས་པར་གྱུར་པ་རྣམས་འཐུང་བར་རྩོམ་མོ། །ལྷ་དེ་དག་ཕན་ཚུན་དུ་རྒྱགས་པ་ལ་དོན་གཅིག་ཏུ་གྱུར་པས་པད་མའི་བདུད་རྩིའི་ནགས་གཞན་རྣམས་སུ་ཉེ་བར་འགྲོ་བར་བྱེད་དོ།